下雨天...我放假!對我黎講都係倒米...講真我平時放假都係係單車上渡過，有幾何會係冇車踩?

星期日既今日，基本上都冇停過雨，由尋晚係公司見到開始落，至到今日夜晚，都係落到九彩...唉!單車活動泡湯...我都唔知有咩好講!

咁我尋晚都有同得得傾計...佢話冇人陪佢出街睇化妝品!好，橫掂都冇野做，不如一齊出去散下心好過啦!

好耐冇出街既自己，去到紅磡站有d迷失，因為個站真係變得好緊要!即係呢我好唔容易先記得點樣行去科學館個邊既通道，一行就出左去紅館個邊，傻瓜...右邊咪有一個隧道狀的行人走廊囉...

第一眼見到阿得，佢瘦左!第二下感覺佢化妝比我岩岩見佢個一次進步了，佢搵岩個粉底同刻劃到自己應有既輪廓，呢個係好事呢既，人係應該有進步而唔係停流係自己既時光!

同佢去到金馬倫個邊...我想起以前係GCS工作既日子，每一日好努力咁跟師父jimmy學習，但係自己學習能力好慢，做工程笨手笨腳，諗起其實都幾好笑...不過我真係唔想對住過千條電話雜色線...講真呢個唔係開心既日子!每一日練習接線...每一日練習整RJ45，每一日學MIC同CIS，真係好痛苦...

有時侯，從阿得背後看，其實佢都幾得意!我諗起當天認識的阿芯，從背影看...又有兩分似!

之後轉戰旺角，又係去睇化妝品，去左兆萬既彩光，我地一齊試下閒個D洗頭水味道，我聞完一隻係士多啤利味既洗髮液，我覺得超難頂，個種超甜既味，好噁心呢...另外仲有一隻消毒既，個陣味又係惡搞...有如滴露!我心諗，不如我買一枝滴露，淋一D係頭再渣滿成頭好過啦!

有時D野總係好難忘記，就係感情事...係同阿得行街個陣，見到一個精神不太正常既男士(應該係乞衣)，我不自覺咁拖住佢隻手...避開左個男人，之後我唔好意思咁放開手...我諗:「阿得唔係自己女友，似乎咁樣唔係幾好播?」

兩個人一把遮既時間，由尖東延續去到旺角，其實真係好有第一次拍拖的回憶...但係今日的情況告訴我...當初你唔珍惜，今日會重覆當日既情況。

我認我的問題，同阿得係先達道別之後，我有種沮喪的感覺...原來一個人真係好寂寞!

我去左公學社搵DANNY同WELLS(貓仔)，WELLS大隻左好多...亦分享左好多單車經!都幾開心既...但ZIP人時間，其實好似好衰咁...但係我真係唔知去邊好...

咁我選擇去左新之打機，其實我冇乜心機打，只係純粹係找個時間打發下，咁新之既人玩灣岸既地步已經超乎我想像，因為佢地玩到已經有2萬幾星，我都冇野好講...咁我自己落場打只有4百幾星...真係肉酸!多場都係陪跑，成日都包尾，唉!..

一個人返屋企，我選擇左坐巴士，不錯的!有得坐睇住出面既雨景，完來自己一個睇雨景係咁靚...表面的安慰，卻難蓋過自己既寂寞!

人家不會再選擇自己，自己卻還想自己被人再次錄用...戇居也!好想有感情生活，但望一望自己照個鏡，你有甚麼條件值得人家欣賞?詞窮只有滿口粗言，貧窮口袋沒有多一個錢，技窮沒有一門手藝只有一個爛鬼保安牌，唉!無樣無身材無學歷，算...繼續踩住TYRELL過日子，至少TYRELL唔會對我太多埋怨...