最近單車訓練都愈來愈密，咁的確6月既比賽真係好近，但係我覺得教練最近出既訓練成效唔係好大，而得出既結果係上斜方面係快左少少，但係平路既情況變化唔係好大，我都覺得有D莫名其妙，照道理...下午操練既時間少人，應該同人與人影響既情況唔多，另外既就係天氣，最近創新路都係好大風，經常性出現「斜踩」(太大風令車身一面側著行車)既情況，氣溫非常之熱，我相信個溫度好接近什至等於30度攝氏。

尋晚，教練權打比我，佢問我操programme如何?我話:好累...風阻令我完全發唔到力快!咁之後佢就話:你個d圈速做到6分尾未?我老實答佢:梗係未啦!...

佢就開始撞火，佢就話我搞錯操左成差唔多半年都未見有d咩進展，佢就引用左佢自己d弟子既情況，人地操左果個programme五天，已經見到個成效係快左幾秒...

人同人比...咁我無野好講啦，咁人地真係有咁既運動素質而我無既，我亦都無野好講...好老實講，我向來係運動上都係接近零獎項，我從來未試過係陸運會企台，最叻仔咪中五個年環校跑得到一個牌就係跑得最多個3個之中既其中一個，之後個D同運動有關既獎項係積極參與樂行之友活動(優點)之類...

有時我唔係好同意阿權引用一D個別例子去做一個我同佢既弟子做比較，其中既係因為佢D弟子好多都係運動冠軍，獲獎不少既人，而我只係一個初出茅廬既小人物，我唔係話睇低自己，而係覺得咁樣去做一個比較真係好唔公平，即我會覺得佢好似用一班好叻既人踩返自己，有如一個比較就係李家誠搵到咁多錢，點解你搵極都係幾千蚊?你唔係咁水皮嘛?

佢後補一句就係話:你再唔做快d個時間，咁我對上既另一位老闆就會接手，到時你可能仲大鑊仲辛苦...

喂?家陣已經唔係辛苦與唔辛苦既問題，想比賽有好成績，的確係要下D苦功，可能佢認為該老闆既手法會比較惡搞，不如咁諗呢D都係遲早發生既事，到最後阿權操練既情況咪又係一樣?唔好話阿權咁單一好似好針對性，應該係話佢車隊公司對上既教練或者同佢差唔多職務既人，不論邊一個都好，都有好大機會用同一類手法冶我...邊個教都好，手法係一樣，唔係學到左一家右一家..如果學到.幾廿個家派既手法，東不成西不就咁，咁我到時就真係「多謝」啦!

有時訓練對方唔係話急於求成，而係真係要有一套，只係今日或者未有一個較佳或最佳既訓練既方式，老實說...我個人既學習能力真係比一般人慢得多，而且我係比別人花較多努力而成效都唔係話好大，呢個情況係學業、工作、運動都係一樣

講真以前係califonia fitness都遇過呢d情況，果個教練都話join成年，玩左幾次training plan都唔係好見個大變，我唔知係我個身體比較慢熱，定係有d咩問題?但有一個情況就講得出，耐力做幾多都唔係問題，一叫我做一d競速，有爆炸性既事，我好多時都比人慢一點，都唔知點解?