教會搞既行山通常都係好簡單,不過原來黎真既,亦都唔係一件易事...
尋日返教會之前,好無奈地我既手電不知咩原故,突然失靈...對於行山人黎講,冇左電話就好似斷左隻手!例如失去救求既方法(係山上面個d救求機聽人講mayday要好耐)
咁蚺蛇尖出哂名係香港既尖頂山之中既最高,亦係西貢最top,同時亦係西貢當中最險要既山!雖然我同細佬都係行過,不過都知道行蚺蛇尖係非常辛苦,上山係好容易好「抽根」...少行山既好易會頂唔順!我唔知教友既體能去到咩程度,我就諗佢地一定既好吃力,同時有好多人都係未行過夜行,行山經驗少...
夜行要講個勇字,因為好多時d路係睇唔到,隨時會有危機出現,可能係跌倒、什麼大仆骨折,又或者比動物昆蟲咬傷
咁係晚餐既時間,係白沙澳青年旅舍個碼頭煲野食,係海風下!食住d公仔麵,諗起都可怕成隊人有九個,居然可以食左7隻麵加大量既腸仔、菜、魚蛋之類既野!真係食到我都驚,我咁大個人都未試過食咁多麵!
之後係碼頭睇住人地釣左一輪魚,都係見到幾條魚毛,釣左等於冇釣...係個度真係有好好既海風,好舒服!講真如果唔係同教友一齊玩,我肯定食左唔知幾多枝煙!咁舒服既環境,真係爽到狂抽...
到左0045,我地一齊開始行,食左野個人係覺得難行少少,因為身體需要一段時間去消化,令腦部既控制更多活動花左消化上,導致行山時表現不太優,不過都比原定時間快...
蚺蛇尖上面,既大風又大霧,而且可能經過一輛既大雨,令泥土變得非常濕滑,石頭脫石仔既問題變得更嚴重!難唔難行就見人見智啦!咁都好睇係著咩鞋,如果係一對行山鞋,咁小心d行都冇咩問題,不過如果係著一般既波鞋,咁就慘d,吃力d!不過d白飯魚伯伯就真係強者之中既強者,一對白飯魚可以行西貢通山走...
上山個時,教友d體能就冇咁好啦,消防員哥哥就咩得較多gear,30幾磅,可能因為咁而慢d,我同細佬基本上由頭帶到尾,係上到山頂個時係0230,同預算時間一樣,其他教友就慢15分鐘,真係爽到七彩!係山上面,我地一齊換左上身個件衫,因為趁d女既教友未上黎個時,換左咪冇咁唔好意思lo!
之後係上面渡過一個通頂,講真係夜晚同日頭係蚺蛇尖真係兩回事,除左大風之外,仲非常黑!我同細佬好好彩就帶左件風褸,呢件風褸對我地黎講係好有感情,因為佢陪住我地行山咁多年山,陪住我地渡過落雨既時間,落狗屎都係搵佢...
消防員哥哥同少傑後來開左個1人營,我本來都想帶營,但後來諗下,山頂既位唔大,石頸又多又大,咁我點開呢?就算開左訓都唔舒服啦!比d石頂住哂...
到左4點半,我地一齊開爐煲朱古力飲,咁凍既天氣(上面只有18度),再加上一杯暖粒粒既朱古力,好飲之餘,仲可以慢慢睇日出,爽!
係6點正,我地正式下山,無奈地d教友上山下山都係咁慢,可能比較驚,有一位最年輕既教友,比我細佬更細,佢就真係慘,由於佢係咩住斜袋,仲要著對all star,真係好野!佢有咁既毅力落山,但係冇咁既腳力,佢由山頂落個下,真係坐住落,我同細佬當然就好欣賞佢啦!第一次行咁高既山,都可以咁有毅力去行!回想起我同細佬當時第一次係樂行行蚺蛇尖,雖然係有返咁上下程度,但都係比較吃力!始終個體能未到而家個水準,以前只係咩住4磅之內,而今次係12磅,不過消防員就真係厲害,咩住35磅...因為佢比我地多好多衣物,仲要加一個一人營...
最後行赤徑係最考耐力同耐性,咁我都係由頭踩到落尾,都幾累!
到左北潭凹,可以話係最開心既時間,因為一來有廁所去啦!同時有水洗面,成面都係汗!
總括黎講,黑夜同白天既蚺蛇,真係兩回事,我就兩種都鍾意,當然日頭就可以睇到好多靚景,而夜晚就好有神秘感啦!夜行有時都幾辛苦,因為夜晚又冇得訓,但咁樣好有行軍feel,因為行軍係只會訓2個鐘,之後又要不斷咁行...
我成段行程之中,最鍾意既都係睇日出,因為實在太靚啦,如果可以既話,我真係好想同青蛙一齊去睇,因為西貢既日出,始終我都覺得係最好,不過呢個可能性唔大,因為佢都唔行山,而且體能實在未能應付,分分鐘上得山之後,落山先黎「抽根」,咁就唔抬佢走都唔得,要係一個好斜既斜坡抬住一個人,都係一個幾高難道既動作!因為要保住自己安全,同時又要保埋佢,我自己係個山坡都打滑左一次,何況抬人?
|
