今日係我第三日返工，外賣多到做都做唔切，更出現收錢位有「沙包陣」情況，我都嚇左一跳，好彩同一個partner阿寶一齊上，咁先至可以搞掂d「沙包陣」既問題，同時呢今日老闆娘都幾滿意我既工作，全餐廳人冇人識去小學曾梅千禧，比我一個人搞掂左，而且比我既工作速度嚇左一跳，佢地預計我15分鐘先到，但係我10分鐘已到左，水吧哥哥阿榮都話:「你唔係嘛?咁都得?」

另外呢，今日係鋪頭個貨倉學上貨，D貨係好鬼重，例如好似一包白砂糖，50磅!抬上手真係好重，我都試兩次先至敢去抬，事關要落樓梯，係個陣時係唔可以出錯，仆左落樓梯呢咁就大檸樂啦!

尋日落大雨，今日曬到煎蛋，收銀傻婆成日都好爽咁等收工約埋成班老友去玩四方城，我同阿寶就送外賣送到手都軟!原來阿寶都係一個「電兔級」人馬，送外賣都係有一手，有速度之餘仲要好平穩，而且係短線加細件係強項，我就行開長線同埋連續性多既單，可以用互補長短咁形容啦!

收工時候差唔多，對單加數銀仔，今日d單有成900蚊咁多，數錢都數左一段時間，咁當然老闆娘既高速數錢，真係令人嘆為觀止，我都好想有佢既速度。

打卡機咔左一聲，亦都係我放工既時候，一打完卡d外賣就突然上，嘩!我仲要出屯門陪老婆wo!而且我已經收左工，呢d野留返比阿寶做啦!

一出鋪，電話就響啦!原來係老婆，哈!打黎真係準時到不得了，咁我一路行，一路同老婆傾電話，佢就準備學結他，唉!呢隻大頭蝦遲哂大到先至到琴行，白白冇左半堂比人，傻豬到不得了!

老婆放左結他班，咁我就可以同佢去玩下，我同老婆去左啟豐個邊，我地買左罐zero飲，事關天氣實左太熱，入返d野相信可以降下溫呢!之後去埋海邊，我地見到d蟹仔，我好努力咁幫佢捉左d蟹仔上黎玩，當然都係不外乎殘害與解體啦!第一隻真係死得好可憐，比我同老婆將個d手同腳扯到斷哂，個身就比我拋回海中，死狀甚為可怕!第二隻就比我捉到之後，我打算攞走個時，蟹仔突然想夾我，我一放手，蟹仔就想走，我老婆眼明手快之下，將佢攔截，不過截得過激之際，踩死左，我例行將蟹仔分解，嘩!好好肉ga!

之後去左一間廢物茶餐廳，食左一個好差既晚餐，唉!連一杯凍檸茶都整得差過人，一飲落去，檸檬太多，糖水太少，茶唔靚，仲要一陣水喉味，如果係我返工既鴻利，根本冇可能發生!食野個邊，滑蛋蝦仁飯賣相可以，不過d蝦呢一陣雪藏味，好難食，我食左兩隻之後都冇再食啦!另外一碟，京都牛柳飯，非常失敗，只有幾片牛柳，汁極少，飯仲要有d係硬硬地，牛柳鬆肉粉太多，令口感大挫...

下次同老婆係屯門，食埋最差既日式料理鋪，相信會好難接受...會有超地獄效果!