尋晚，其實我本身個心情麻麻，始終同miki講完一d表白既說話，結果我係一無所鑊，唉!真係有d唔開心，或者我自己冇運啦!
細佬尋日生日，基本上都冇咩特別，只不過係冇生日蛋糕咁解，講真屋企已經唔完整，個蛋糕又有咩意思，因為已經唔係一家人咁享受...其實對於我黎講，屋企完唔完整已經冇所謂，因為我覺得根本呢個家都唔快樂!不如好食枝煙咁，由得個家慢慢滅跡!
心情頓時受到打擊，我自己其實想一個人靜下，尋晚我選擇左係屋企樓下公園，自己一個人練習拐法。我覺得係練習個一刻，個人仲係有好多放唔低既地方，即係好多雜念，令到尋晚練習既過程有唔流暢既地方，唔能夠完全既發揮!
坦白講，一心想搵個心怡既對象，但係正當炭燒得正紅既時候，突然落一大筒水打熄左，變得死寂!
人傷心，總係有更多問題要面對，好簡單!尋晚，我練習拐法時候，練習高速轉動枝拐，點知出事啦!而家左右手同時起水泡，當然係痛啦!不過就算我受傷，又邊到有人明白?
由一場練習，變成一個發洩唔開心既心情既時間，結果自己傷了!
我練完拐，小穎打比我，唉!又係想我幫佢解決感情問題，其實我想講，如果條仔真係喜歡你，相信每日都有一個電話既calling，可以關心對方，又可以知道對方發生左咩事，至少病左都有人知!但係條仔已經成2個幾月冇搵過阿穎，我唔明白阿穎為咩要為佢男友喊、等電話、等msn既回覆、等到眼都乾...曾幾個時，其實我第一次拍拖都係咁，等對方既電話，icq既online，但最後只係講「不如我地分手啦!」，呢個回覆我到今日我都放唔低，因為呢個回覆，我個時幾晚都訓唔到，依然都係梗梗於懷，令我到今日諗返起既時候我依然都係好唔開心
拐法雖然有突破，但感情事遲遲未有，我對感情事失望一次又一次!
今朝起身，冇精打彩，周身勞累!由其覺得肌肉酸痛，不過咁又點，咪又係自己面對，有老婆既男士，至少有家中既妻子可以按摩一下，我?唉~食自己啦!
返到學校，旦丁今日好早返到學校就已經進行殺龍行動，對住部psp係到係咁玩monster hunter...上堂聽老師講書，咩都聽唔入腦，事關我都冇心機讀，又點會有心去聽?
放左學成班友仔去左mk88打機，都係玩我最愛既灣岸，yan仔同alex都有唔少既進步，開頭我讓賽包尾，兩條友開心到不得了!不過我係呢個時候就開始發返力，咁就四人對戰，我同alex加yan仔同埋我一直都未對過既kelvin一齊打，就係咁我贏返第一，其實我覺得唔洗咁緊張個輸贏，愈緊張，愈玩得唔好!
之後我對住佢地幾個，出現3連勝局面!原來佢地三個既功力都係已經做到一般水準，比起以前呢，佢地已經係好好多!
之後我同gary對打，gary當然係一向水準，佢係比我強!不過我今次同佢玩，我同佢個距離近左好多，除左山路之外，我就通常都係輸比佢3至4米，即係話我開始得到一個小成!
而今日我覺得玩得唔錯既係小新，小新係岩岩學識玩灣岸，但係佢都係贏到，而且有唔錯既表現，我覺得係唔錯，講真個句，小新向來都係打開winning或者fifa呢類既足球game，叫佢踢波就話得姐，叫佢打車就真係兩回事，但佢比我感覺係共預期中好!反應快，有思考，有時間性觀念!
yan仔同alex比我感覺係浮燥，因為佢地兩個成日都係為左上前攻位，但其實進攻係咪一定要同對手有一段磨擦撞擊，先至係可以突圍而出?其實唔洗咁，只係需要睇準對手失手既時候，呢個就係一個理想既主攻機會!
kelvin第一次同佢玩，我覺得佢其實係戰略上係唔錯，因為佢係進攻既時候我見到佢有諗zip貨櫃、點樣趁我自己失手既時候進攻!
|
