距離而家去camp既時間只係大約係8.5個小時，我呢個時間係收左工，我係屋企悶極無聊，又未想訓，所以呢我就開左電腦係呢個時間打日記。

咁今日返工，我真係好無奈咁對住一個好難頂既同事豬欣，唉!今日返工午時就冇咩問題，但係呢我就係晚時做到仆街，我係咁係公司走黎走去，為左幫d客傳菜，我係咁幫客搵，當然呢個情況我係前所未見，因為從來只會係水吧做到仆街，廚房係冇咩負荷，但係今晚好得人驚，全場爆滿!

我今日食飯既時間，係好似我係新年年30晚個時，樓上樓下爆哂，但係當時係老闆係水吧爆哂單，個d單係可以封哂個水吧台，個下其實壓力幾大，因為我都好怕埋錯野，埋錯野真係會比人屌到彈起!

咁今日係有好多客仔話我公司欠效率，出菜好慢，咁當然呢公司只係用兩個晚市廚房佬，唉!咁當然慢啦!咁今晚全場只係得5人係公司，即係我老闆校長，我阿頭Irene，廚房大師兄同埋執碼既細師兄，我同事豬欣，同埋我自己!晚市唔同午時，午時可以話係幾忙，但係有足夠人手，但係晚市就唔同啦!由10個減到得返5個，有時我冇返工得4個，真係做到仆街!

今晚係只可以話平時學既野，一次過用返出黎仲要谷盡，我可以咁講，我既樓面功力其實唔係真係好好!我外賣個邊就話得姐，始終開工多數都只係係咁出車，而我手車又ok既，至少我未試過連人帶車帶外賣3者一齊炒!

我係今晚講得最多既係:「唔好意思」，公司出唔到咁快既野，只可以講既係萬分抱歉，客人多到要出面排隊，就快好似茶樓咁!直頭要叫咪:「紅色飛88號6人坐請到櫃面」又或者大家樂或大快活形式咁:「牌仔88號版請到櫃面取多謝」唉!今日幫客仔爭取一d送爭得好辛苦，唉!我爭到干牛河，但隔離台又攞唔到野比佢，覺得好可惜!我會覺得好似係戰場上槍林彈雨，傷兵不斷出現，自己係醫兵
醫唔哂既局面!

前所未見咁忙，呢個情況比以前屋企鋪頭甜蜜蜜既情況更可怕，至少甜蜜蜜唔洗鐵人賽啦!係咁跑上跑落真係好辛苦，我只係好慶幸公司同屋企鋪當時比我既訓練，我先至有今日既功力，我係甜蜜蜜基本上都係收銀、落單、洗碗、清潔，所以我而家真係做收銀其實係冇問題，因為呢d野真係好簡單!我覺得最難係落單，因為要記價錢，我好多時都記唔起f價，講真型式多，我做既都係盡人事。

我既工作效率向來都係嚇壞d客，我係快到嚇親人!我d同事平均去劍橋一轉要15分鐘，但我唔洗，快既係5分鐘來回，所以我好多時間比我「吞撲」，慢慢咬煙!

黎緊我星期一、二同三都係會係大嶼山貝澳渡過，我同一班同學一齊去玩，希望會係一個難過既經歷，仲有既係如果有咩事想搵我既，麻煩你打我手電68092374!