Day 4: Check out > ots取第2架車 > Check in @ 恩納SUNMARINA >  恩納ガラス工房 > lunch@岸本食堂 > 海中展望塔 > 玻璃船 > 琉球村 > dinner@本格炭火燒肉 > 酒店

今日一早就CHECK OUT, 跟住又去OTS取第2部車,好彩租2架車,一架4人車尾箱只放到2個中喼,跟住要放下一面座椅再放2個喼,我地2個女仔就逼埋一齊,好彩我地都唔係太肥。由於我地有拎車經驗,今次都好快搞掂,但今日拎個架仲細,又冇乜力。

拎左車就直接去北部沙灘酒店"SUN MARINA"CHECK IN 先, 搞掂後就諗住去玩吹玻璃,我地早左到酒店都好好比我地提早拎房。
呢間房勁正, 這酒店所有房都望到海景, 房間很寬敞,正!

我地酒店附近都有好幾間沙灘酒店

玩玻璃既地方"恩納ガラス工房"就係酒店對面,本諗住行過去,但反正有免費泊車就揸車過去,這裡好似一個工場,但就沒有一個特定既價錢,佢有個房放左好多玻璃製品,佢叫我地係個度隨便選一個款想做都可以,價錢就跟上面既LABEL,但我地睇左好多都要幾千円以上,同之前係琉球玻璃村見到既價錢好似差好遠,同埋冇最簡單個D款,又預算不到製作時間,所以最後我地也放棄了,真係失策左。

冇得玩就去食個LUNCH先,今日去左間傳統手打拉面店"岸本食堂"食LUNCH,呢間野本身都有好多本土人去食,之前網上介紹經上大排長龍,真係冇講錯,去到已經排緊隊,店內SIZE也不算很大,好彩佢食身既款式不是太多,所以食客都唔會坐好耐。

呢度只有3款食物, 大碗面,細碗面同飯3種! 消費2550円

食完野就去睇海中展望塔同玻璃船,玻璃船有時段玩的,所以一去到就睇左時間表先,我地就因為要就時間,所以先玩左玻璃船才去睇展望塔,我地架玻璃船人不多,差不多每組一個玻璃格睇。今日都有少少浪,本來想買魚糧餵魚,不過佢話今日唔賣(唔知點解),但船家都有放子魚糧引D魚過來。

玩完行去展望塔,又係超大風,其實落左個塔都係睇D窗口,唔係用好多時間都睇完,好彩我地去既時間都唔係好多人,唔洗爭位睇,睇到既野都同玻璃船好唔同。

本來今日仲有個行程係琉球村,但由於我地over run左小小時間,本來諗住其實琉球村同王國村都係差唔多個d野,諗住唔過去,但發現原來係ots有買到琉球村門票,咁就趕過去,結果過到去已過左佢既最後入場時間5:00,咁我地係門口問receiption, d飛係咪可以留來下次去,因為門卷冇寫expiry date, 結果雞同鴨講,講極佢地都唔係好明,之後又帶左我地去買飛窗口,窗口位女仕就好少少,佢最初提意而家比我地入去,但只得返半個鐘行,問我地ok唔ok,不過最終我地決定唔入,因張飛冇寫明到期日,我寧願賣返出去比人,最終就係門口拍一拍照,到此門口一遊吧!後來都因為有朋友去沖繩,所以張飛特價賣左比佢地。今日第2件失策既事

睇地圖就好似都幾大,幾多野行咁。

 既然冇得遊,食飯又book左7:30,仲有時間就返酒店休息下,參觀下間酒店先。

我地酒店附近都有2間沙灘酒店,間間都有自己私人沙灘,亦有d大型吹氣浮床比住客玩,岩哂一家大細,而酒店都有d day tour可參加。

行完一圈都差不多去醫肚了,今晚晚餐食"本格炭火燒肉 <琉球之牛>",這餐廳跟酒店非常近,大概2分鐘車程就到,真好!好彩有book位,真係超多人,唔book位真係有排等。
呢一餐真係好難忘記,因為真係太好味了,其實未出發前已經有唔同既朋友推薦我食呢間餐廳,真係冇介紹錯,d牛肉勁冧,入口即溶,我地都encore左幾個round,以呢個價錢食到呢d質素既牛,真係超值,返到香港食唔返,點算...... 消費22158円

用炭爐燒, 前菜都好好味

牛肉好好味,ENCORE左幾次

呢個牛肉壽司勁好味,食左3轉

由於北面呢邊其實冇乜shopping既地點,食完我地就去酒店附近既family mart買煙花返酒店玩,係呢間family mart撞見很多香港人,周圍都聽到廣東話,好親切 我地買左1少包煙花。
酒店沙灘有規劃左個範圍比住客玩煙花,我地去到已經有人玩緊。
係酒店玩煙花都有d規矩,10點後不準玩,我地初初唔知,放左1,2個就有"實蕉"走過來叫我地唔可以放有響聲,話會嘈住住客休息。
係度玩煙花都有d難度,因為真係超大風。

戀戀沖繩自駕遊6日之旅 DAY 1
戀戀沖繩自駕遊6日之旅 DAY 2
戀戀沖繩自駕遊6日之旅 DAY 3
戀戀沖繩自駕遊6日之旅 DAY 5
戀戀沖繩自駕遊6日之旅 DAY 6