今日突然想起, 有一次同BB去公園玩, 當然公園內有好多小朋友, BB就走過去同佢地玩啦! 玩到咁上下, 有一個比較唔靚仔的小朋友走過來想一齊玩, 結果BB竟然唔同佢玩, 中叫佢走開, 我見到個小朋友好唔開心咁一直站住不走也不動, 然後BB就同其他小朋友一起走到另一邊玩, 我好仔細地睇了睇那被遺棄的小朋友, 其實他並不醜, 只是瘦削了一點, 穿著得冇咁帥而已. 隨後我叫BB過來, 問她為何不跟那小朋友玩, 她竟說我不要和他玩, 從BB的眼神及表情我知道她是因為人家沒有其餘小朋友靚所以才唔同佢玩. 小朋友也如此以貌取人, 會比較.

外表真的那麼重要嗎? 記得同朋友睇醜女大翻身時, 朋友說一個又醜又肥的女人如果做出嬌嗲動作或表情時一定會被人狠狠地打一窩, 但如果那個是靚女的話比左條命佢都願意. 同一件事發生係唔同人身上有唔同待遇, 對人唔對事的大有人在, 又何止我一人呢?

昨晚一夜難眠, 這是因為我竟重複犯錯, 一個月內竟然大意地掉了兩次錢, 放的位置竟然是相同的, 就在我一直放手機的位置, 可能是因為我拿電話時不小心弄掉的吧! 一直都在生自己的氣, 何以會這樣不小心, 一次尚可以原諒自己, 但這已是第二次了, 而且是重複地犯錯, 完全找不到藉口去令自己好過些. 於是我決定來個大教訓給自己, 就是不斷去責怪自己, 不為自己找藉口, 罵得自己都心痛起來, 我希望這是最後一次…..不可以最大意的了…..

這次大意使我想到, 其實我以往的觀念是錯的, 因為我只會給一次機會別人, 當他重複犯錯時, 我便會覺得他是故意的, 而不是不小心或不知道, 他是有意地犯錯, 去挑戰我的容忍度等等. 其實這些都錯了, 莫非我在挑戰自己嗎?

原來當發現自己犯錯或重複犯錯時, 自己的內心已很不好過, 已很痛苦的了, 他會想盡辦法去補救, 但有些錯是無法彌補的, 就如我這次, 我連在那兒掉了也不知道, 怎找呢? 就算知道在那兒掉了, 相信也找不到吧? 如果我是執著於此事, 我就會一直辛苦下去, 對嗎?

(因昨晚飲了太多紅酒, 所以今日好像還未醒過來, 昨晚我試了兩隻紅酒及食雪茄, 真沒想到, 昨晚終於知道如何飲紅酒及雪茄的味道是如此品嚐的. 上了一課.)

今日看到師父的留言, 竟然出奇地沒有生氣而且還很樂意地接受了他的意見, 這使我感到, 我真的長大了, 因為以前的我一定會很不服氣, 會為自己找很多反駁他的說話, 或許會在留言板內來個大決戰, 但今日的我沒有了以往的野蠻, 這個是否還是我呢? 一直以來我也知道自己有好多缺點, 是可以改的, 但我會不斷問自己, 當我改了這些, 這個人是否還是自己呢?  她已沒有了自己的性格, 她只是別人眼中應為這就是乖巧有家教的一個女生而且, 一個沒有自己的自己還是自己嗎?

我不知道是否因為我已經歷太多了, 對一切也看得開了, 所以不再執著. 是的! 以往的我太執著, 就是因為執著太久了, 所以累了, 現在的我好像一隻斷了線的風箏, 沒有目標, 每日如是, 心情沒有起伏, 簡直就是行屍走肉, 沒有靈魂.

天生我才必有用, 我自問沒有才華, 也沒有用處, 也不知道自己的興趣是什麼....唉! 煩!

朋友何價! 朋友本應是冇價的, 但我的一些朋友卻有, 這價是他們自己給自己的.

今日我知道我又失去了一個朋友(都唔知人家係唔係真係當我是朋友.) 唉!

他於幾個月前問我借了五佰, 我一直也沒有再主動找他, 是因為怕他誤以為我追他還, 直到這兩天因為有朋友想出海玩, 他是與友人合資出租滑水或遊船河的, 我們也試過做這門生意, 知道有多難, 所以一有朋友要船便立即通知他想問他有冇期, 誰不知他一直也沒有覆我電話, 我還怕他會誤會寫了信息給他, 但他還是不回覆, 激死人啦!

今日我在此發誓以後也不會再借錢比朋友, 太過分啦!

以前師傅都係因借了錢才沒有聯絡, 我還很掛念他們圍村的盤菜呀! 因為那時一有盤菜宴他就會叫我們一起去食, 好正架! 他的小朋友也不時到我家玩的, 但現在卻不再有聯絡了. 如果有得再黎過, 我都唔知是否還會借錢給他…..唉!!!

今早終於打完星期二想打的日誌了, 因為此日誌太長了, 所以分了幾天才打完, 感覺也不同了, 沒有當時的激烈了, 但還是約略記下我的感覺, 打完後突然想起睇過大丈夫2, 令我印象最深刻的是女的去叫鴨飲醉後於酒店房內說出自己的感受, 明知道老公的不忠, 但因怕失去而要去騙自己, 還要幫他找藉口去說服自己, 但另一方面又好想知道老公是否真的去滾, 要不斷去追查, 但到就黎水落石出之時又怕去面對... 唉! 這就是女人啦! 好矛盾呀!

 女人點為之幸福呢? 我二嫂是嗎? 何以我會這樣說, 因為昨晚我和二佬同二嫂一起去接媽回來, 去時因為二佬尚未放工, 所以在家等他, 那時家裡只有我和二嫂, 我沒有說話, 因為她不斷地傾電話, 傾完後二佬也回來了, 二佬問她要不要一齊去接媽, 順便係深圳食晚飯才回來, 她就用有氣冇力的語氣答了個等於冇答的答案給二佬, 那時其實我真的火滾了, 我好想問她: 死得未呀! 我知妳大左肚都唔使咁架, 而且妳有冇諗過二佬工作回來已經好辛苦, 好累啦! 重要睇妳大小姐面色, 媽回去十幾日個家同垃圾站沒有分別, 一個女人可以做到咁, 都真係萬中冇一啦! 而且我二佬還要對她那麼好…..唉! 真係…冇話可說.! 最後她當然一起去啦! 但目的只為了去食飯…而不是為了去接自己個女, 真係…我不得不比十個叻佢呀!

到左上水佢話肚餓要買飽食, 但食左兩口就話唔食, 要二佬搞掂佢…二佬當然照收啦! 重要問佢肚唔肚餓, 唉! 死未! 我二佬前世一定係採花賊而且就係冇採到二嫂呢支奇花, 所以今世就有此報啦! 成個過關路程二佬都好小心保護二嫂. 看到這裡我諗起曾幾何時當他們有了第一個小朋友後不久他們差點要離婚的, 二佬那時也說過十分後悔咁早就結婚生仔, 而且還有動手打過二嫂, 那時是二嫂不肯離婚所以就冇離啦! 隨後不久二佬係出面有第二個, 到最後還是給二嫂知道了, 但還是沒有離婚. 有時我真的很佩服二嫂, 她尚可以這樣信任二佬, 二嫂同我講: 二佬話冇同過個女仔發生關係這點二嫂好有把握一定可信, 因為她覺得二佬絕不會做對不起她的事, 而實情是, 她錯了, 我知道二佬有搞過人家. 唉! 其實呢件事本小姐早就知道, 我也有同二佬講過叫他收手, 但他沒有. 他說就算二嫂知道了, 她也不會跟他離婚的, 起碼有一次幾會. 結果真的一切盡在他掌握之中. 厲害!

原來每個女人都好叻去騙自己架, 因為她們怕失去對方, 所以會用好多方法說服自己去安慰自己, 他沒有超過她的低線(即冇搞過人家.) 為何她們真的可以這樣完全地摧眼自己呢? 她們不會去想想其實就算他真的沒有搞人家, 但他的心已背叛了, 妳認為一個男人去叫雞, 只是因為肉體上的需要而做這個衰d, 還是一個個心已愛上其他女子而未發生關係的男人可最呢? 佢返轉頭, 妳中會愛他嗎? 有擔試嗎?

其實男同女都會有機會有第三者的出現, 只是睇你能否作出取捨或玩這個齊人之褔的遊戲是否高明, 是否可以瞞天過海, 對方也不會知道第三者的存在.

可能係我成長背景及身邊朋友的感情都會遇到這些問題, 所以我覺得感情呢d野太兒戲了, 絕不能太信任一個人對你的忠誠(我是指伴侶.) 不要相信承諾, 就算他真的因為承諾而同妳一齊而非因愛而一齊, 都係冇意思架.

有幾多個人可以做到專一呢? 有幾多對情侶夠膽講自己從來冇背叛過對方?  

其實有伴侶的人比單身一人還要辛苦, 因為他們在乎對方, 所以煩惱也多了.

二嫂是否真的用耐心去感動了二佬還是二佬本身就不是愛滾的人呢? 真的會有浪子回頭嗎? 真的就這樣可以白頭偕老嗎? 真的不會再有第二, 第三次嗎? 有貓兒不食魚的嗎? 除非那隻貓曾幾可時因為食魚得到很慘痛的經歷, 才會不想再食魚或怕了食魚.

早前有一個男性朋友講開女人心態, 他的一個女性朋友, 才20歲, 剛出來社會做事沒多久,

她對我朋友說: 依家要找個好的男朋友好難!

我朋友就問她: 妳有什麼要求呀? 有幾難呀? 

她說: 我的要求也不太高, 只係養得起我, 有份穩定工作, 就算我唔做都唔會有咩問題.

當我聽到時我覺得好奇怪, 女性找老公或男朋友不是最重要就是要他愛妳, 對妳尊一嗎? 就以上女方之回答, 我好自然地想, 女的到底是愛上男方的事業或什麼, 為何女的會有這種想法, 我有點不明.

隨後我問這位男性朋友的感覺. (以下是他的一些意見, 請各位女士不要太激動. 你們知道我何以一直也不說出他的名字啦! 是不想他死於咁多靚女手上咋...)

他覺得有此想法是正常的, 因為每個人於每個階段所想要的也會不同, 但是好多男的也會希望自己的另一伴可以自己搞掂, 不要太依賴對方, 不要成日都拿自己的男友跟朋友的男友作比較, 不要有太多的要求, 太多的限制, 這些都會使他們氣喘或逃亡. 而且有一點各位姊妹要小心的是原來很多男人也不喜歡自己的老婆或女朋友會太過追求名牌.

最後我發覺我身邊的朋友在思想上已有很大的改變, 而只有我還是停在愛情至上的幼稚時期.

不過我還是覺得如果他知道你跟他一起是因為他所擁有的事業或名利, 他一定會看不起你, 因為妳不是在他一無所有之時尚在他身邊支持他的那個人.

所以各位姊妹還是找一個一無所有的一起建做你們的未來吧! 別要給對方太大的壓力, 也不要給他們太多的意見, 因為有時他們只需要我們的支持而不是要聽我們的看法. 更加唔好拿他來比較, 要永遠覺得他是最好的.

因為表姐的突然到訪, 使我想起了好多兒事的開心事, 一定要記下, 因為怕有一天會完全忘記….表姐於星期六下午3, 4 點左右突然打電話比我話現在同老公係香港機場, 他們是從馬來西亞回鄉的, 但必須於香港再轉車或轉機才可以到家鄉. 因為佢地冇預先找我們, 所以那天我已約了朋友去玩, 於是我叫佢打電話比二佬, 結果個晚由二佬去接佢地….第二日我才見到他們…我跟表姐已有十多年冇見過啦, 而佢老公我就更加未見過, 連他們去了馬來西亞也不知道…幾時結了婚及生了孩子也不知, 因為這個表姐是不太同我玩的, 因為三嬸他們冇得生, 所以領養返黎, 所以由細到大佢都唔多出聲, 我對她也不太了解, 因為那時的我是一個小霸王, 可能是排最細, 所以所有人也會就我, 不會跟我硬碰, 因為他們知道如果跟我硬碰的後果是…..死梗…嘻嘻..  (現在的我已改了好多啦! 再不會霸道啦! 還會諗下對方的感受…)

幼時我媽生了我後沒多久便要帶同大佬來港工作了, 只剩下我同二佬比外婆照顧, 而外婆是同五叔嬸住的, 而五叔就有三個子女, 再加我們兩個合供有五個啦! 而且我們五個的年齡是一層層的, 每隔一年就有一個出現…所以五嬸就負責照顧我們5人啦! 而隔離左右就住了三嬸同二叔兩人家, 因二叔他們的小朋友比我們大太多啦, 所以不會跟我們玩的, 三嬸那邊也是, 所以我的快樂回憶只圍繞著五叔嬸他們. 外婆也有…

聽五嬸講我幼時成日同表弟爭奶食, 咁解要爭呢, 明明有兩個奶頭的(我們是食人奶的), 原因是我要一邊食, 一邊玩….哈哈…(這是五嬸講的, 我也不知是真是假.) 但有樣野是真的就是我對五嬸的感情比我媽的還要深, 記得有一次五嬸病了, 我一直都係佢身邊, 幫佢做哂我能夠做的家務, 還第一次煮粥比佢食(我們以前是燒柴的, 鄉村地方就是這樣!) 等到她好為止. 佢到現在也會同別人說起呢件事, 因為當時只有我照顧她, 而其餘四個就掛住去玩冇理五嬸, 我那時雖然係好野蠻, 好霸道, 但亦好真心去愛護我愛的人.

夏天我五嬸會帶我們五個去河裡摸蜆, 好好玩的, 那時我們天不怕地不怕, 蛇蟲鼠蟻都可以玩一餐飽….又不怕污衊, 摸完蜆回來我們會5個一起去井口打水清洗自己, 五嬸就會將d蜆變為美味的晚餐. 晚上會一家大細上天台一邊睇月光, 一邊聽大人講故事或聽五叔唱歌, 最後一定是兩個大人抱我們回房啦! 因為我都未試過自己落樓梯. 五叔就是教我食煙的啦! 那時我該有3至4歲吧, 好苦的又難食, 都唔知點解佢地食煙食得咁開心....五叔有時會駕駛電單車出外的, 每次一聽到有電單車聲時我們5個就會睇下係唔係佢返黎, 一見到係佢就會5個一齊走出去橋度等佢, 然後佢會停下來等我們爬上電單車後再開車送我們回家, 我同表弟永遠也是坐在前面鐵的部分, 所以好熱的, 但又好開心……

回到家時五叔一定比五嬸罵, 說這樣太危險啦!試想想一架電單車上有1大5細喎, 何其壯觀…..

下雨後我同表弟就會出去玩, 玩咩呢? 就係玩蚯蚓啦! 當揭開石頭時, 你就會見到好多條蚯蚓架啦! 好興奮架, 然後捉佢地來比鴨食, 哈哈….(但後來因為肚生蟲, 而且那些蟲真的好似蚯蚓咁大條咁長, 我點解知道是因為它們會爬出來, 出來後還好活躍咁係度爬, 好嘔心架,  要食d好甜的糖去搞掂佢地先得, 至始本小姐就好怕蚯蚓啦! 一見到就會毛管棟…)  唔知係唔係報應呢?

有時我會同表弟去爬樹, 但有一次表弟係樹上掉下來, 頭碰到石頭, 那次大家都以為他會救不了, 好彩冇事, 如果唔係我就係千古罪人啦! 因為是我要佢同我去爬樹的.

到了收庶的時候五叔嬸他們會帶我們一起落田(當然我們就只有玩同破壞啦!) 我們幾個會一起用庶葉弄一個窩出來, 然後玩爸爸媽媽的遊戲…

而我同表姐有一次想玩煮飯仔, 於是就用兩磚頭架起一個碗, 碗內放了些米及水, 就生火煮啦! 結果好似真係煮到喎, 不過唔記得有冇食到啦! 因為這些趣事都是在我3至6 歲發生的, 所以記得不太清楚了.

到了冬天我五嬸會要我坐在她懷裡面對住火爐同我講故事, 或同我傾計, 這個我契媽也會, 到現在我還記得我契媽身上的香味, 雖然佢離開我已有十多年, 但還是會記得的, 我第一條頸巾是為她編織的, 雖然她不知道, 我也沒有幾會送給她, 但我還是會把它好好保存的, 每當我想起媽說契媽走時還是很想見我最後一面時, 我都會對媽有少許不滿的, 因為契媽病時我已身在香港, 不能立即回去見她, 我是明白的, 但原來那年新年回鄉時我還是一到步就走去契媽家找她, 但那次我跑了成間屋, 都找不到她, 因為平時她一知道我們回來一定會在家等我的, 她知道我一定第一時間跑到佢家. 我那時又沒有問一問隔離….後來返回香港後不久媽才同婆婆講我契媽過了身, 她有點不安, 因為新年時媽有去醫院探我契媽的, 她是知道契媽病了, 而且契媽有要求媽帶我去見一見她, 但媽怕會嚇壞我所以還是沒有告訴我, 也沒有帶我去見契媽. 媽問我嬲唔嬲佢, 我話佢都係為左我好才有此決定. 但心理還是有點不滿.

頭先去左沙沙的日誌, 睇完後忍不住留了言給她, 好緊張呀! 因為她應該唔知道我有闖入她的日誌, 而且不是第一次, 我之所以會想上去睇係因為小生, 因為她是小生的姐姐, 我想對她多些了解, 但我一直也沒有問她是否同意我睇日誌(我感到自己好似賊咁, 偷完野中要寫下感想, 十分荒謬!) 唔知佢睇完我的留言, 會有咩反應呢? 會好嬲, 還是會同我做朋友呢?好緊張呀! 中緊張過會考放磅呀...

錢! 今日突然好想同朋友討論一下關於個錢字, 點解想討論, 係因為我唔係好明係別人眼中錢到底係咩? 我記得細個我不太在乎錢, 朋友問我借我就會借, 如果自己冇會回家同媽或大哥取, 他們是會比的(如果細數目的話.) 也不會問理由. 到了中學因為搬回來同家人住, 知道他們原來不是有用不完的錢, 而且每每是月頭有錢月中開始難過 (這是指大哥) 睇到佢月尾要問媽取回些少家用, 媽是一定會比佢的, 也不會罵佢, 因為媽實在太疼愛他了, 但媽會同我講佢有多煩惱, 怕大哥亂花錢, 唔識譇錢, 又怕他被朋友編….又不斷同我講佢一個女人帶大我們三兄弟有多辛苦, 以前生活有多苦等等…(一般阿媽的說話.)

到了快中學畢業了, 因為家境真的越來越窮困了(這我覺得是因為我媽理財不力的問題, 有好多錢是白花的, 花了只是為了面子, 花了給別人看, 但辛苦有誰知呢?) 初初出來工作, 賺的錢十分少(簡直係廉價勞工!!) 所以覺得每一分都得來不易, 所以我開始不太喜歡花錢了, 每用一分係自己身上都會覺得好浪費, 心會好痛.

到了這幾年, 經濟得到改善, 但用錢觀念還是改不了, 除了花在家人身上外, 我好少用錢, 我好想好似一些朋友們咁會花錢哄自己開心, 但我就是覺得一花錢就會心痛, 我會想, 如果不買這衣服咁就可以將d錢留下來以後有咩事都唔使咁驚, 或者這些錢可能可以再變錢的(即係投資囉!)

到了現在我會同自己講想要的就隨心去買吧! 一個月不譇錢也不要緊, 因為如果現在你就會死, 咁你有幾多錢都冇用架, 你有享受過咩? 所以我依家會盡量去取得一個平衡, 要有計劃地享受現在與將來.

今日又有一個難題, 就是如果老闆請食飯, 你會如何呢? 會去還是不去呢?

我不太想去, 不是我老闆不好, 而是我不想欠人家呀! 我也不知道為何我會這樣想, 我知道佢都唔志在這少少, 但就是不想佔人家便宜, 係唔係太多餘呢? 我也知道, 但改不了這觀念…

搞左半日, 其實又冇咁耐, 只係一路同朋友msn一路整日誌.

好開心呀! 整到啦!!! 我想信大家第一次整完都會有我這感覺吧!

點解我會整呢個日誌呢? 其實係因為我的好師傅架. 因為我想回覆他的留言, 卻被拒絕, 要我成為會員才可(不知我是否誤會了呢!不過唔緊要啦, 都整左啦! 嘻嘻....)

今日有件趣事, 一早回來就睇到小生的留言, 然後回覆他一大堆我也不知自己用意的說話給他...其間有個朋友叫 laris 的有講了兩句, 但因為打緊比小生, 所以對佢不太專心, 好啦! 到左可以專心同佢傾時, 剛好見到佢出現, 咁就一直傾, 傾左成個幾鍾啦, 當我話我阿嫂也有買388這股票時, 佢同我講 :我係你阿嫂囉!

我中要話:唔明佢講咩?

咁佢就話啦! :我係 lris 呀!

我個下真係嚇左一跳, 跟住我同佢講我一直以為佢係 laris 我朋友, 跟住佢同我講從未試過msn錯人架, 咁我就話 妳知我一向都係傻下傻下架啦! 佢回覆話 :我都冇話可說囉....