星期一，新既開始，又要返五日工，你地就要返五日學喇~~

今日成日都落雨，搞到個人冇咩精神咁(可能我尋晚3點先訓啦)，一朝返到去就好想訓，d工作就迷迷糊糊咁做，發生左一件事，就係發覺itsu房有野唔見左呀，星期5放工都仲係度既(我果日係最遲果個走)，果d野仲係我管理添，唔知係有人偷左定係有人拎左唔出聲，但成日都冇人同我講拎左喎，咁除左兩個人之外，同it組有關既人(陳主任同潘主任都有份)都問過，全部都話冇拎過，件事一定係星期6同日之間發生既，依家同左陳主任講，搞到件事嚴重左添~~唔理喇, 錯不在我，果件事已經鎖左係個櫃度，得我同陳主任有key開，咁我星期6就短週唔駛返，果日得兩個it組人返，可能有人拎左陳主任條key黎開啦，呵呵!!好一件密室偷竊事件丫~~

放左去左返學，係巴車訓到好似死左咁，差d唔記得落車，返到去上堂，出奇地冇訓覺，仲有聽書添，聽唔聽得明係另一回事啦，哈哈，放學又行左去黃埔買晚餐食，買下買下咁又一百蚊，我發覺自己真係好鍾意shopping~~

搭車返屋企果陣我又傻左喇，戴住個耳筒聽緊收音機，聽到個主持講緊d搞笑野，我就係咁笑，不過冇笑出聲，仲笑左好耐，唔知有冇人見到呢~~