今天早上，我原本出去坑口交返低張地盤白卡比風哥（工頭），然後就辭職唔做。當我在巴士上時，我先親自打了比老闆陳生向他交代了我點解唔做，我想都冇想到他竟希望我先想清楚，留下來２個月睇吓份工係咪真係唔啱做先再決定；他話他留我的原因是因為佢昨日同風哥食晚飯時，風哥覺得我唔錯幾好 ；佢同我講請人唔難，但請好伙記就好難，所以希望我留下來試吓做住先；但我都同他講多謝他比個機會我，我唔做的原因係我覺得由屯門去將軍澳醫院返工太遠了∼ ！！！！同埋我真係覺得對冷氣系統好陌生，我唔知自己對它有冇興趣和可否應付。佢話都好明白我的困難，話我只係返了一天工，希望我認真慮清楚，他想我留下來 ，但我仍然拒絕了他的好意。（其實當我一邊拒絕陳生時，一邊好感動他留我，我感到自己被人重視，因為做嘢咁耐我都未試過比老闆留我，每次我提出辭職唔做時，老闆都會覺得我可有可冇 ；但今次我呢份我只返了一天的工的工頭竟然同老闆講我好∼！！！）
之後，我打比風哥同他交代一切時，我估唔到連佢都主動想我留低！！佢覺得我辭職好可惜，但我多謝他後也拒絕了他的好意。（真係冇想到我只返了一天工就有人賞識我，重視自己，仲連續比兩個高層留tim）他尊重我的決定，約我去坑口B出口，等我交低D嘢比佢。當我到了出口跟他交代好一切後，風哥竟然不放棄我，最後竟然話如果我想清楚後，幾時想返去做的話，可以打比佢，我真係超感激他竟仲為我留後路！！，我最後同他握手，仲同他講了句＂好多謝您。＂然後同他道別了。
我去到九龍灣轉巴士返屯門上了車一陣，突然我的手機響了∼風哥竟然打比我，他說佢會KEEP住我張工人白卡兩日，叫我想清楚，如果想返來做，通知佢一聲就可以了。（天呀∼∼∼我真係冇想過我出來工作都會有上司咁為我着想呀！ 這使我內心百感交集。）
我謝過他的好意後，我認真再重頭想一想，呢行係好專業的，反正我現在未有能力做生意，我現在學了這個＂冷氣系統測試＂技能，未來我總算有能力揾食，而且人哋又睇得起我，就算我兩個月後，我再覺得我唔啱做，到時我再走都可以，反正我豪得起兩個月呢！！！ 況且，依家揾過另一份工都唔保証啱自己做；而且呢份工放假日子叫正常了：放星期日和勞工假期 ，雖然要預早２小時起身出門口(最遲約６：３０AM)出門口，仲要在九龍灣轉地鐵去坑口站，之後再要行一段約１５MINS路，但放工時間放１８：００PM（算早），儘管放工後幾乎要２小時才返到屯門，喺我問嘢時，風哥肯教我。我想好後，主動打返比陳生，問佢介唔介意我星期一返返工，他竟答應我，仲鼓勵我要比D信心自己、我再打返比風哥交代聲我星期一會返工。
之後返到屯門同吳媽媽、阿嫂和吳俊賢去了華都的季季紅飲茶；夜晚我同黃偉琪、LIU LIU和LONG YIN一齊去了華都的西貢星食晚飲，賀LONG YIN 生日。
|
