今日起身時差唔多十點鐘。起左身食左幾粒朱古力同埋幾塊餅乾就睇電視了。邊睇電視邊夾頭髮。攪到成十二點幾先完成，仲要拿拿聲去換衫、汁書包。真係熱死人…趕頭趕命。

十二點半明賢Call，佢話行去輕鐵站了，我個時仲係屋企，我仲同佢講叫佢係天榮等我。落到去輕鐵站，原來佢個人仲未到，我由屋企黎輕鐵站都用左起碼五分鐘。佢可以仲未到，真係…返到學校都13:10囉！但係只係得小貓三四隻，Miss 仲未到添。仲要驚遲到添，攪到成身大汗，熱烘烘~~補課時都冇咩留心聽書！之前D野都未攪掂，又學新野。我真係頂唔住~佢講咩我都係只係明佢講咩，但係唔明點做點運用。唉~有時Notes 要寫的東西我都可以無寫，真係…...臨落堂同明賢講左尋晚收音機的男仔故事佢聽，佢都Get 到。我仲下定決心，係廿歲前儲到兩皮野！雖然好少咁~但係我而家工都未有，要我係一年內搵到錢真係談何容易？

走個時我地仲係門口猜包剪槌，輸左送明欣、Carman同埋韻韻返屋企。我輸了，我送Carman~阿昌仲同我講【阿麟，自己汁返自己個件呀！】聽到真係唔知比咩反應，得個笑字。最後都係陪左佢地行書局就走了。

約左DT去踢波，我就行去買鞋，得返阿鋒陪我，其實都唔知佢跟住我做咩？-_-"我去左買白飯魚。佢又跟埋黎。佢仲想跟埋我去踢波添！最後佢都係驚同我的Fd 唔熟，無野好講，咁佢就走左了！其實我都好耐無踢波了，又唔係同佢地成日見，我都驚到時成個自閉仔咁呢~

去到球場，原來成班都到晒！個窿比左條褲我，我之後就去左廁所換，出到黎都冇咁快有波踢。等左幾個字終於可以上場。落到場，唔知係耐無踢定係隻左腳腳跟腫左，踢得好屎！跑又唔想跑，但又想射波。最後都係係個埸度上上落落！D 體能又差喎，踢左無耐已經氣喘，最後都係要換人！踢左都係得個半個鐘都無就已經咁o既死樣，真係豈有此理。之後都係得個睇字，都唔係幾想踢了！最後都係踢得個半個幾鐘！有機會同埋時間真係要好好練下。

之後去左搵亞扁拎相，都唔知拎黎用咩，但係唔拎又俾佢拋，唔想咁浪費。最後都係問佢拎左。之後就搭車返屋企喇！返到屋企周身黏立立，但係個時已經八點！沖涼就睇唔到Yummy Yummy~最後決定唔沖，邊食飯邊睇電視~食完又繼續睇，直至做完妙手仁心，我都未沖涼。-_-" 之後仲ICQ 一陣先去沖添！沖完就返回電腦面前打日記同埋ICQ喇！ 

(佢沒有補課，-_-" 心裡唔知點咁。睇佢日記又唔公開……)  

仲有兩日就放榜了，我……心內竟然一點緊張也沒有。係唔係我真係唔知死呢？真係覺得好平常咁。我仲未諗我往後的日子點，完全無諗過考到會點，考唔到會點！我到這刻都都仲未有任何準備……我是否真係不在乎呢？真係好唔想做任何決定，世事很多的事都係殘酷，自己常常都不會遇上太大的困難總是覺得自己還未成長。現時仲未諗任何關於放榜的東西，唔知係唔係真係覺得自己Pass，但總是……唉！算喇！這重要的決定到時先作出吧！我不是怕什麼，只是唔想煩，我不會逃避的！

今日踢波時見到釣浩踢得好出色，個時心裡已經諗。係球場上的每個人都有強項，讀書有讀書的，運動有運動的，而且今日佢地講的前途問題，我個時真係一粒聲都冇出到！我自己真係沒什麼東西可以講，讀書又唔係得，佢地仲要講到好深入，我只係得個聽字！我真係唔想俾人睇死，但係我覺得自己真係唔係讀書的材料。我有努力過的，但又唔算好努力個種！我可以點？ 我真係好辛苦呀……