今天都冇咩做過！尋日係咁下載MP3，今日又再汁整齊部電腦，又下載左D最新大碟。攪攪下就過左一個早上了。部電腦都唔知咩事，又開始發下神經。周不時自己Reboot，又成日停左係Dos 度，入極都入唔到個Windows。豈有此理！嬲都震呀。

之後下午見無咩野做，拎左件牛仔褲去D.I.Y，整貓鬚。整到條牛周身傷，自己隻手都被Cut 親，好彩唔係好深。之後睇返自己的作品真係麻麻，做唔出自己想要那種效果，不過都算不過不失。之後又再玩下電腦過日子。然後五點零鐘就換衫入麻麻度了。

入到去打左幾球波已經無咩心情打了，心內總是有點不安。之後同扁傾下電話(佢話悶喎，我幫唔到佢呢，只係陪左佢傾一陣就收左線喇！)之後去左細佬仔間房Upload MP3。佢都唔係好多歌岩我聽的，只係Upload 左一點，最好彩就係佢竟然有【我的失戀女皇】，立刻Upload。我係網上搵左好耐都搵唔到呀，首歌真係好聽，但係偏偏又唔派上台。仲有【自己保重】都好好聽！之後都係食飯，And Then 回家。

返到屋企睇電視，但無線已經無左獎門人呢~都冇咩好聽。又去左玩電腦，但個時都仲未有心情打日記的。只不過係上下網咁！到左21:30就返出去睇Jurassic Park。開始都唔係幾知道自己原來睇過，睇左一半時先知道！-_-"浪費時間，之後仲睇到訓埋添。頂頂頂~俾老媽子叫醒後又好鬼死精神，之後就去左沖涼喇。返出黎都冇再睇喇，因為已經睇過，無什麼興趣再睇。返回自己的房間係咁玩下電腦，聽下歌仔。就咁去左點幾鐘喇！個時又唔見眼訓，但已經好夜了，所以就熄機返上床邊聽收音機邊訓喇！最後聽到3:00鐘先訓到。

聽收音機個時聽到一個廿三歲的男仔佢向女朋友求婚，主持人問佢有冇諗過將來，個男仔話有。之後問到佢有幾多儲蓄，男仔都唔多想講，但係主持人好奇係咁估。終於大約知道數目。有成二 三十萬。一個廿三歲的打工仔(文員)做左四五年野已經有廿幾三十萬。我個時心諗，佢真係好男人呢~為自己同埋女朋友的幸福去儲左咁多錢！佢仲話自己食又唔駛點食，玩又少玩，又唔鍾意名牌。聽到Lei 度我已經反問自己好多野了！我而家十九歲都黎緊，一毫了都無。仲想要咩名牌，唉~真係有點不知所謂！照佢咁計，果個男仔一個月要儲成五千蚊先可以儲左咁多錢！我真係有點不相信，佢同女朋友拍拖都要駛錢架麻！一個文員邊有可能搵到咁多！真係真係……真係諗唔明。但個時我已經知道自己唔可以再係咁落去，一毫子都無，做男仔點過活！過多兩日就放榜了，我知道自己如果唔得就一定會出黎做野+進修。現時錢係這個世界真係好重要，好多人都係睇錢份上的。有錢個人先會放心，我下定決心要努力搵錢。搵錢之餘仲要努力讀書/進修。Never Give Up~~~ If i think i can，i can。