我個腦好易唔記得野，所以趁依家仲記得，盡量將整個旅程既所有要事瑣事記錄。
10/6
呢日好彩冇掛紅雨，有得去玩了~
8:00am番燴雞集合，帶左好多件衫&波褲，一條大毛巾，同埋5斤生菜(供食用...[一])
人齊了，坐旅遊車去深灣碼頭，唔洗半個鐘就到，仲落緊微雨。
深灣碼頭距離目標船有一段距離。因為碼頭水淺，大船無法駛入，要坐艇仔(又稱街渡)前往目標船上船。
分成四隻艇仔，將所有人送走。
隻艇仔行左一段時間，終於見到隻船，船身刻住「賽馬會歡號」。
爬上一條垂直既鐵梯(約2-3米長)就可上到歡號。(條鐵梯對之後跳海有重大既用途)
所有人上哂船之後，隻船就開始郁。
船長叫明哥。明哥講野超快，脾氣有點暴燥。
第一次見到佢既時候，佢正企係船欄上。
欄前係甲板，欄後就係海，該欄僅20-30cm闊，一個唔小心就會跌落海。
另外有一個船員Ben哥令我印象深刻，佢o係眾目睽睽之下由主樓頂爬梯落甲板，
落地果下扇親，好彩冇跌。佢講野好搞笑，死都拗番生。
人齊之後，船長終於肯番落黎，介紹自己叫明哥，又介紹一下隻船(廁所o係主樓有一個，船艙有三個)
佢叫我地放哂所有行李係船艙，然後番上甲板集合。
船頭個艙同樓梯女仔專用，男仔唔准行；船尾個艙男仔用，人人入得。
番上甲板上面。四十幾人分成四組，我第三組。
船長講左好多野，內容圍繞住講d活動幾恐怖，叫我地克復恐懼，放心跳海等等(我唔識游水~~~)
講完野之後，叫我地一齊拉起個中國式帆。有成四十幾人一齊拉，但係都要好用力，個帆好重。
拉完帆，船長就叫一半人跟船員參觀歡號，另一半人學打繩結。
參觀緊隻船果陣，我同志輝俾人叫去煮飯，我負責"拾"生菜。
拎哂d生菜上船尾廚房，然後番去學繩結~
參觀完船，學完繩結，入番廚房煮飯。好多人暈船，不過我冇事~(一早食左ceci粒暈浪丸^^)
係我果組負責既午餐...滷水雞翼每人一隻，超高濃度蒸水蛋，蠔油生菜，勁多飯....
滷水雞翼同飯由船長幫手整，蒸水蛋、生菜我地做...蒸水蛋開唔夠水(我都話左要開多d水架啦~"~)
結果"送"唔夠食，飯就多到爆....
d碗都要自己洗，不過呢日唔係我做。
隻船行左好耐，去到"岩蛇尖"附近水域拋錨[二]，去到果陣已經冇落雨，天氣好好，冇乜浪。
船停左就開始活動。四組各自輪流執行不同任務。d活動個名都幾......
第一個係"鯉躍龍門"，要爬上一碌圓柱橫樑(離甲板約兩米高...)，然後落番黎。
我第一個爬上碌木，下面有好多人輔助我爬上去。上到去果下都咪話唔驚，望落地下就想跌....
志輝上埋黎，我地兩條友就坐係碌木上面拉人上去&推人落地。過程十分順利，不過最後果個(阿星)上去有d難度，
因為冇人扶，試左好多方法都唔得，唯有跳上去。好彩佢夠高，試左幾次終於搞掂。
跟住到我落地，一下就落到黎，志輝隨後。
咁就完成呢個活動。活動後集體檢討十分鐘。
隨即開始第二個活動，名為"採青"。呢個活動要係海上進行，全部組員拉個浮台接近目標位置，
然後搵人係浮台上面，諗辦法拎到支晾衫竹上既字條(晾衫竹離水平面2米多)。
要跳海了~~~著起救生衣，二話不說我第一個就跳落海(我對件救生衣好有信心  )。
跳落去果下真係心都離埋，感覺同跳樓無分別......
跌到落水，成個人入左水裡面，飲水、吸水，感覺十分暢快，海水同樣很美味=0=
唔識游水，o係水中不斷掙扎，好快俾件救生衣"救"番上水面......
之後我組d人相繼墮海，游去拎果塊浮台。
原來happy仔唔識游水冇人知，又冇著救生衣，跳左落水掙扎救命，之後d船員掉個水抱俾佢= =
將塊浮台逼近晾衫竹，原本計劃由阿星跳起去拎果張紙條，點知d力俾浮台卸哂，跳唔高拎唔到。
然後改變計劃，兩名壯男托住輕型既女仔去拎，失敗~
之後又到我出場了~我半跪o係浮台上，志輝踩住我個膝，跳上去。
第一次失敗，第二次失敗，第三次得左~努力沒有白費。
爬番條鐵梯上船，淡水沖身，然後又到十分鐘檢討(happy被揶揄頭先既事...)。
著住件衫落水，全身濕哂，上到水又有風，吹下吹下，勁打冷震....
第三個活動唔記個叫咩名。呢個活動係靠槓杆原理，用船邊作支點，伸一碌好粗既方型木棒出船外，
一個人行條木出去(冇野扶，冇救生衣，玩波斯王子[三])，
其他人坐住支點既另一邊，防止行出去果陣條木一反就跌落海=0=
出到去仲要摸摸最遠果度果張紙先算數。
志輝o係船邊伸手出去俾人喳住，咁都放心d~
輕巧d既人行先，全部都好安全~ 到我果陣，由於我太重，條木一度差d反，果下令我感到死亡既恐懼...
據講呢個活動發展至今，從未有人跌過落海...我差d成為第一個=0=
好彩最後都成功.....又到十分鐘檢討時間。
第四個活動名為"奈何橋"。又有一碌半圓柱型木柱連接船身同一隻快艇。
又玩波斯王子，唔著救生衣行果碌柱，由船身行到快艇，3-4米遠，腳下就係海.....
最衰唔識游水，行果碌木好淆......不過有人伸手出黎俾我喳下，喳喳手就解決左~
全部人過哂隻快艇，再由快艇行番過隻船。
桃桃最後一個行番去隻船，接近隻船果陣失平衡，將要跌落水，情急之下一跳企圖跳去捉住要鐵梯。
雖然掂到條梯但係都跌左落水= =.........唔服氣要行多次，呢次成功了。
十分鐘檢討時間。
玩哂四個活動，完成上半part，Take個break。
接住玩下半part既兩個活動(快艇&空中飛人)
呢下又將四組重新編排，變成ABCDEF六組，我係B。
AB組先玩快艇。要著救生衣。
隻艇加速好快，d浪打過黎，隻艇拋下拋下，過癮。
每人都試下喳快艇幾分鐘(其實只有加速減速，個舵由船員Ben哥控制)。
冇幾耐就玩完，有d未夠喉。
番上船，d人已經玩緊空中飛人。
成個活動唔准著救生衣，雙手喳住個鞦韆飛出船外再飛番黎，鬆手就會落海=0=
呢個都算易玩，冇人墮海。(好戲在後頭)
每人飛過一次之後，再玩激d。呢次要飛出最遠既位置(point of momentary at rest[四])，
轉身笑一笑，拍兩下手，然後放手垂直飛落海，落到海先會有人俾水抱.........
真係唔係講笑...全部人都要跳(我唔識游水.....)
船長話人一定會浮番上黎，叫我地放心跳=0=
我既興奮又淆底地放手，轉身笑唔出，拍左兩下手，跟住直插入水。
唔知係咪我個姿勢太好，入水好深，掙扎左幾秒先浮番上黎，即時就有人俾水抱....
爬番上船，排隊準備玩第三回合~
第三回合難度更高。同上形式，高度增加三、四尺，自選落水動作，冇得俾水抱。
跌落水後要自已游兩步去喳住水中既船員個水抱，再游兩步去下一個，如此類推直至登船。
行上個"跳台"(船欄)，鼓起勇氣喳住個鞦韆飛出去
掙扎中游左兩步企圖去喳水抱，奇蹟發生了~
我居然識游水，冇任何輔助之下可以自己游番去隻船~(然而只限自己游，要我救人就唔掂= =)
好正！連海都跳過，以後仲會怕乜野？！
跳完海就完成今日既水上活動。
o係甲板上用淡水沖身，大概七點，等食飯~
等食飯期間，幾個人坐係船頭甲板傾偈。
坐在好耐，番入船艙。
ceci志輝yoyo桃桃o係船艙入面玩"襟棉胎[五]"。我唔識玩= =
佢地教左我~教完就夠鐘食飯。
晚飯終於有飽飯食= =
食完飯又開始玩。玩襟棉胎俾yoyo話反應遲鈍....唔識鋤D俾楊怡話蠢= =真係好多壓力未解決....
過左一陣反應時間增快~因為夜晚正是我活躍時段
之後上甲玩killer，好少人玩。有d人就話冇興趣。
十點幾船長叫集會，安排今晚守夜。11:00p.m. - 7:00a.m.每組輪更兩個鐘。我守1:00a.m.-3:00a.m.
有個船員出黎講點樣巡邏，教我地點樣斷定隻船有冇"爬錨[六]"、檢查橡皮艇有冇俾人偷、
船既左邊叫紅火邊，右邊叫綠火邊等等。
講完我地繼續玩。
坐係船頭甲板，食薯片、玩七級豬[七]，我升級得最快，玩幾回合就變六級.....
係咁撩人講野，結果vivianfung俾我拉落水，六級架dee冷[八]~
最後又係我輸，被罰"嗌救命".....好求其嗌完即閃= =
跟住11點vivian等人夠鐘巡邏。
11/6
行行企企又到凌晨1點.....我組全部聚集甲板。期間有人未訓醒= =
甲板上又同ceciyoyo桃桃阿星玩UNO，玩玩下到三點....
三點鐘番入船艙訓覺(訓梳化....)。一訓就訓到七點。
七點前有d無聊人嗌過我起身......「冇官方既指示我係唔會起身住= =」講完跟住繼續訓.....
起身梳洗之後，七點搭三全部人上甲板做早操。
接著馬上又要跳海=0=..........游早泳
跳到落水先會有救生衣，又跳落海了= =
d水勁凍，一邊游一邊震。繞船游三個圈，有浪。游完跟住上番船。
上到船仲凍，因為有風~~~
淡水沖身，有得食早餐了。
早餐有通心粉，熱阿華田暖下身~感覺良好~
食完take a break~
船長講緊野，突然響警鐘！眾人搶救生衣
接下來又係跳海活動----棄船演習
演習模擬隻船失事著火，要棄船，所以全部穿上救生衣預準跳海。
蛙人先生講解點用繩槍(得佢講，我地冇得用。成個演習都冇用過繩槍)。
活動愈黎愈精彩。
第一回合，要o係綠火邊船尾爬上船欄，行船欄去接近船頭既出口爬番落甲板。
欄僅20-30cm闊，叉錯腳會跌落海....(波斯王子)
好在頭幾米路程有條鋼線扶下，但最尾果兩三米乜都冇得扶....
我十分符碌地行過左(一步一驚心)，然後落番甲板，跟住跳海..............d水仍然係咁凍......
跳到落海要繞過船頭，去到紅火邊先可以上岸，仲要爬繩梯=0=
vivianfung游得太快，痛苦地自已爬上繩梯
由於我游得慢~到我爬繩梯果陣已經有人幫手撐住條梯，十分輕易咁就爬左上去~
上番船，見到紅火邊有個細路唔肯跳，俾人強行扔左落海=0=.................................................
第二回合，換邊再跳海。
形式同上，加高難度....直接由欄上跳落海=0=(高度增加3-4尺)
紅火邊船尾個欄較高，爬上去比較困難。
經過商量之後，決定我半跪o係甲板，俾個膝其他人踩住上去；桃桃就企係欄上面拉人上去。
前面d人跳得好慢....我企係上面排隊、等...係好驚的，因為隻船o係度拋下拋下....快快趣趣跳落去好過=0=
跳落海後同第一回合一樣既形式游番上船。
第三回合，集體跳海。
未跳之前船長恐嚇我地，話一齊跳果陣邊個冇跳，大家就要上番船同佢一齊跳多次...
立即開始跳海活動！
排排企企哂係欄上，一齊數一二三~跳海！！！
我見到有人冇跳！yoyo同埋另一個女仔.......
好有壓力，佢地被迫跳海。
番上船，除哂所有救生衣，任務完成了。
以下係整個旅程最後一個水上活動----游水登陸沙灘
船距離沙灘400-500米，每組六人只有一個水抱，咁就話要游上沙灘....
我地組當中，只有vivianfung識游水...我同另外三個略懂，一個完全唔識= =
排隊跳海....o係船上監視我地跳海果個人好鬼惡~"~
六個人捉一個水抱，個水抱沉左入水。
朝著沙灘游，我地游得最快，差d可以"遲黎先上岸"
但游到距離沙灘約50米果陣突然落微雨...
係則邊睇住我地游果個船員姐姐叫我地游番轉頭上船，因為落雨危險=0=(仲諗住就黎可以上沙灘玩.\ /.)
逼於無奈地要游番轉頭...冇幾耐就停左雨........由於我地游得最快，折返果陣距離隻船最遠= =
一路游，見到其他組好多都俾快艇接走，就係冇快艇黎接我地=0=
結果游足幾百米番上船.........好攰
最慘係唔識游水果個，游咁耐驚咁耐，仲要游咁遠=0=
上船沖身之後，所有水上活動就完了。兩日共跳海九次。
等食飯。午餐好豐富，好多野食。(幾餐裡面唯一一餐我食到兩碗飯)
食完飯到我組洗碗。我淨係負責喳住隻水喉拎d煲去沖水，不過都唔易做(因為隻船拋下拋下企唔穩)
洗完碗就冇野做，去船頭睇風景。船頭好抛~好似玩海盜船
甲板上，有人暈船、有人訓覺、有人玩。
ceci嗌我去玩鋤d，我又唔識玩= = 佢教我，不過我太蠢學唔識....
冇幾耐ceci暈浪，去食暈浪丸；
另外我去船艙拎回條&錢上甲板交俾mr.ma，拎到去果陣mr.ma有d暈，叫我落車[九]先至交。
唔交回條，番去玩= =
岩岩玩鋤d果因為太悶，解散~
走哂去同好多人玩"蒙羅麗莎"，好好玩= =
跟住就落雨，解散=0=
落好大雨，番入船艙。
Mr.Leung同其他人玩啤牌，我趴o係枱度訓~
咁都會訓得著，跟住就俾人叫醒洗船。
洗船，我被指派去倒垃圾&抺牆。
搞掂哂，番上甲板集合。
隻船停左o係深灣。船長對所有人訓話一番後，番落船艙拎齊行李，咁就結束整個海上旅程。
最後係甲板上影張大合照，接著坐"街渡"去碼頭上岸。
轉車番學校。第三組o係學校門口影張合照，解散。
番到屋企好似仲o係甲板上咁，腳步浮浮差d跌。
完
乘風航超好玩~下次有既話一定要再去！！
注釋：
[一]四組各自負責船上一切膳食，我果組負責第一日既午餐。
[二]錨，金屬造。錨重，拋落海床可以將船停泊。
[三]波斯王子，PS2/PC Game。動作遊戲，控制王子做出好多高難度動作以完成任務。
經常要行過橫梁、獨木橋。
[四]momentary at rest，物理現象，自由物體離地上升時受地心吸力影響，動能不斷轉成勢能，
當所有動能全部轉成勢能時物體就會瞬間靜止，然後向反方向加速，即勢能轉成動能。
[五]啤牌遊戲
[六]爬錨即錨失去作用。
[七]啤牌遊戲，每回合輸果個升一級，升到七級變豬要罰。唔同級既人唔准對話，一但對話自動升級
[八]架dee冷，鶴老話，意思係"自己人"
[九]落船後會搭旅遊車返ucc
| 
)。