| «‹ June 2026 ›» | | S | M | T | W | T | F | S | | 1 | 2 | 3 | 4 | 5 | 6 | | 7 | 8 | 9 | 10 | 11 | 12 | 13 | | 14 | 15 | 16 | 17 | 18 | 19 | 20 | | 21 | 22 | 23 | 24 | 25 | 26 | 27 | | 28 | 29 | 30 | |
|
|
春夏粉底大比拼
2014 年 3 月 31 日 星期一 | 
上次同大家介紹咗唔同品牌嘅粉餅，
今次就試用咗三個粉底液同可能大家比較少用嘅粉條，
四隻粉底質地都各有不同,
所以同上次一樣搵咗我地workshop同事試用，
大家可以根據番自己膚質揀番啱自己嘅粉底啦！
今次3位測試專員都有不同comments,
每個人皮膚性質都唔同,
所以揀粉底除左聽人推介外都要親身試下啦!
Karen:
屬於乾性皮膚，有雀斑、紅印、
膚色不均問題，冇乜血色
Jellia:
混合性皮膚，T 字位易出油易紅，
兩邊面係中性皮膚，
其他位置都無咩問題
Joan:
混合性偏乾皮膚
容易出粒粒，面上比較多印，
冇乜血色
IPSA PURE PROTECT LIQUID FOUNDATION EX SPF25 PA+++
6色 / 25ml / HK$400
加入左Aura透亮光源,
以4 色光學完美反射肌底光線,
有效撫平凹凸,
配合獨創AL Double Shield雙效薄膜技術,
長效防汗、防油,令妝容持久貼服!
Karen:
creamy質地好滑，好易推勻，
遮瑕度好好，紅印、雀斑大部分都遮到，
而且感覺唔會好厚，
我本身皮膚較乾,但再局部塗多一層粉底都唔會覺得乾，
就算面部瑕疵較多，淨上粉底唔做面部遮瑕都可以有好自然嘅修飾效果。
尤其適合面部瑕疵較多，中性至乾性皮膚嘅人。
Jellia:
質地Creamy啲，好滑易推，
輕輕搽上面，已經遮晒我面上紅印，
一啲都唔厚身，
仲令我皮膚睇落滑咗添！
Joan:
Ipsa呢隻粉底液質地雖然比較厚身,
但好易推開，都唔算好厚而且遮瑕度好高,
上左一層已經遮哂面嘅所有紅印同瘡,而且比較滋潤,
好適合較多瑕疵同皮膚性質較乾嘅人用!
Paul & Joe Silky Smooth Foundation UV SPF25 PA++
柔滑搪瓷防曬粉底液 $450
呢隻全新粉底有7種色調,
賣點係將保濕同防曬集於一身,
有高效遮瑕,打造零毛孔膚質,
粉底液推開後會變成粉末,
妝感輕盈透薄,同時打造出柔滑啞光效果!
成份有薄荷精華,微晶纖維,梔子花精華,忍冬精華,
荷荷芭油,橙花水,透明質酸,白百合精華,
功效以保濕控油為主
Karen:
質地較creamy，但一啲都唔笠，
塗勻後感覺清爽，唔上碎粉都唔會笠住。
遮瑕度唔錯，大部分紅印、唔均勻膚色都修飾到。
Jellia:
係4款粉底當中最creamy就係呢隻，
搽咗上面唔會笠，
遮瑕度相當唔錯，
皮膚睇落仲好有光澤添！
Joan:
Paul and Joe呢隻粉底液偏水潤,
同樣都係好透薄,
粉底推開後做到令嘅效果,
均勻膚色之餘都遮到七成紅印,
但瑕疵比較高嘅人可以加返遮瑕膏作遮瑕!
Lancome極緻再生精華粉底液
蘊含珍貴精油成分,配方以極緻昇華再生精華素大大提升護膚功效,
分別有柑橘精油,由近百種成分組成,促進肌膚自我再生能力!
山茶花精油,含豐富脂肪酸,幫助肌膚修護鎖水層!
Pro-Xylane™專利抗衰老因子,
以綠色環保過程萃取,係Lancôme研究實驗室最強效抗衰老嘅分子!
以不同方法如打圏方式搽上可平滑毛孔,
粉底更加入左精華有效提升緊緻!
Karen:
質地較水，推開係油潤嘅感覺，
滋潤得嚟唔笠，而且好薄身，
可以均勻膚色，適合面部瑕疵唔多，乾性皮膚嘅人。
Jellia:
質地好水潤，易推開之餘仲好薄身，
搽咗一層皮膚顏色均勻咗，
面上瑕疵無晒。
如果同樣鍾意薄身粉底嘅姐妹們，
我好推介呢款！
Joan:
lancome呢支粉底液質地比較水,
推開後非常透薄而且好好推,
遮瑕度都高達八成!
均勻膚色嘅效果好明顯!
Bobbi Brown Skin Foundation Stick 高清透滑粉底筆 $390
有3個色系,共14隻色
Skin Foundation Stick突破傳統的厚重質感,
加入左礦物粉及色素,讓更多的光線穿透皮膚,
如半透明的底霜,透薄而不失遮瑕度,
另外加入左橄欖角鯊烷及乳木果成分,
令Skin Foundation Stick能順滑地融入肌膚,
塗抹時不需使用粉底掃亦可輕易及均勻地塗抹,
唔會令肌膚處於太油或太乾的狀態!
如怕太厚可在下巴T位輕輕印上然後推開,咁就會好自然!
Karen:
好多人聽到粉條就好怕，因為一定好乾同好厚，
但係呢個粉條好薄身，一啲都唔厚，
好滑身好易上，質地完全唔乾，
遮瑕度OK，可以均勻膚色，遮紅印。
Jellia:
通常粉條質地比較厚，
但Bobbi Brown呢支粉條令我有驚喜呀！
唔厚身之餘遮瑕度仲好好添！
甚至我只係喺有需要遮瑕嘅地方輕輕印多小小，
連遮瑕膏都慳埋呀！
Joan:
呢隻係Bobbi Brown最新推出嘅條狀粉底,
起初一聴到係條狀粉底就覺得一定又乾又厚,
但一試上面感覺好好,
質地好好推,粉底滋潤又唔厚,
半面我只係畫左兩三下就已經遮得哂九成瑕疵,
好適合混合性偏乾皮膚嘅人士用!
總結:
Karen:
我覺得四款之中Lancome效果最透薄，
Ipsa遮瑕度最高，滋潤度亦唔錯。推介!
Jellia:
四款粉底各有特色，
如果鍾意粉底液嘅人，我會好推介Lancome，
粉底易推又貼面，
如果比較多瑕疵嘅人，
我推介Bobbi brown，佢嘅遮瑕度係一流呀！
Joan:
我就最鐘意Bobbi brown,
佢嘅遮瑕度好高,而且唔乾!Like!
另外Paul & Joe都做到好啞緻妝感!都唔錯!
介紹左幾隻新粉底大家又有冇興趣先?
有興趣就快啲去睇下啦!
如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup
| |
發表時間：2014-03-31 01:29 PM [ 訪客留言(0) ] [ 編輯日誌 ] [ 分享至FACEBOOK ] |
|
Joan & Karen: 將勤補拙之道
2014 年 3 月 30 日 星期日 | 
成日都有人問報讀我地嘅化妝班有冇前途,
學完係咪會有Outjob啊,自己係咪可以接Job啦,等等問題,
我都明白要攞一舊錢出嚟一定想問個明白,都想有好嘅前途,
我當年學嘅時候都有擔心過,
但都決定膽粗粗博一次,
諗返起以前學嘅真係好流,
真係靠自己唔怕付出,日練夜練咁捱今日嘅成就!
所以未報讀嘅朋友仔或已經讀緊嘅同學仔真係要勤力啲,
人地一定會俾機會您,只係睇您自己有冇好好裝備自己,
如果你化到一手靚妝,怕咩無野做啊!
嚟緊我地都會搵啲同學仔,workshop化妝師,畢業學生等分享下讀後感,
等大家了解更多化妝師點滴啦~
而加就由畢業同學仔,
現已入職Workshop嘅同事Joan同Karen分享下啦!
Joan:
唔經唔覺已經讀完新娘化妝半年,
係Workshop返左3個月工啦!
仲好記得初初讀完化妝,大學又畢左業,
有段空檔時期,又冇Job又冇Freelance,
人地睇我就好Hea好自由,其實都幾大壓力嫁!
雖然屋企人都唔會比壓力我叫我慢慢搵工,
但畢業後遊手好閒無家用比屋企都唔好啦!
好彩Janice比機會我係workshop返工邊學邊做!
大家睇我地返工係咪無咩做呢?
起初係度學化妝果時我都有諗咁過嫁!
當然入左嚟workshop做野緊係無咁簡單啦!
我入職無其他同事咁耐,初頭個多月都係處理文書野多~
有時會跟下Janice Outjob咁,但都係做啲比較基本嘅野!
直到有一次同同事一齊同Janice出Job,
單Job係幫雜誌化妝影大頭!
要係短時間幫model轉妝,
我就負責抹妝,同事負責補底妝,
有個妝係用油彩化,
一抹完Janice就話:"唔係呀,連落妝都落唔乾淨!"
最後緊係快快手再抹過啦!
事後再檢討,因為無練妝,生疏到連抹妝都做唔好!真係抵罵!
但Janice反而無罵我地,只係叫我地要自己練多啲,
仲同我地傾返,我地花左唔少時間,心機,金錢,
無理由個目標只係做文書工作,
都想有一日做到成功嘅化妝師嫁!
雖然我地係僱主關係,但Janice從來唔會只係當我地同事,
仲會教我地工作以外嘅知識,俾好多機會我地!
經過上次教訓,而加都勤力左練妝,
雖然都有好多地方要改進!
但練左起碼仲有機會改善,唔練連改正嘅機會都唔會有!
所以一有時間就要多練習,唔好比機會自己生疏啊!
嚟緊有個大型event Janice都再俾機會我地見識多啲!
將會同同事們一齊出Job真係又期待又緊張!
到時再同大家分享出Job嘅感受啦!
Karen:
之前都分享過化妝師除咗化妝，有好多其他嘢要學，
除咗出outjob之外，而家都開始接觸其他方面，
比如修眉指導同上堂助教咁。
而家Janice上堂嘅時候，
為咗可以照顧到每位同學，Janice會親自指導之外，
我都會幫手睇下同學仔嘅steps、手勢啱唔啱，
從中都知道同學仔有時手勢或者步驟錯咗，原來自己係唔發覺，
可能知道正確係點做，但係可能化緊妝嘅時候，
不其然又會犯錯，
比如最普遍見到同學好鍾意化妝嘅時候，隻手會放咗喺model頭上，
可能model唔介意，因為上堂model都係自己朋友，
但係當真係出去做嘢果陣，客人可能會好介意，
亦可能會整亂客人髮型。
所以睇到嘅時候都會諗番自己會唔會都係咁呢，會警惕自己。
另外，個人化妝班會遇到唔同面型特徵嘅同學，
而且大部分都係唔係好識化妝，
所以有啲我地化開妝覺得好容易嘅化妝技巧或者知識，
佢地會唔熟識，需要多啲時間去解釋同指導，
所以我同佢地溝通嘅時候，都幫到自己增值，
因為本身比較被動，唔習慣主動同人傾計溝通，
所以而家多咗好多機會接觸唔同嘅人，
都係一個好好嘅學習機會。
其實對我嚟講最大嘅挑戰係對住成班同學講嘢。
由細到大身邊啲朋友同屋企人都話我講嘢太細聲，
有時真係聽唔到我講乜，
出嚟做嘢就好少少，
以前做銀行對客就完全冇問題（可能因為太勞氣），
唔係對客嘅時候就會變番陰聲細氣，
所以而家要對住成班人都好唔習慣，壓力又會大啲。
仲有就係我講嘢好慢，有好有唔好啦，
好嘅可能係同學仔jot notes可以好啲，
唔好就係同學仔可能會聽到訓著覺。
Janice都好清楚我呢啲不足，
比咗好多機會我去train up自己，
平時睇Janice上堂都覺得好厲害，
因為同我完全相反，
Janice講嘢好快又流暢，做嘢又快手，
真係要多多學習呀！
如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup | |
發表時間：2014-03-30 01:55 PM [ 訪客留言(0) ] [ 編輯日誌 ] [ 分享至FACEBOOK ] |
|
春夏粉餅大檢閱
2014 年 3 月 28 日 星期五 | 
成日都有好多人send msg嚟問我哋有咩粉底推介，
知道好多姐妹們原來都好重視粉底，
所以今次就同大家分享一下唔同嘅粉餅，
用係唔同皮膚性質嘅人身上會有咩效果啦！
相信一定有款啱搵緊粉底嘅你地！
介紹同事們皮膚性質：
Irene:
中性皮膚，唔算好多瑕疵，
有啲黑眼圈，唔算好大問題
Joan:
混合性偏乾皮膚
容易出粒粒，面上比較多印，
冇乜血色
Karen:
屬於乾性皮膚，有雀斑、紅印、
膚色不均問題，冇乜血色
由於同事們都係自然光底下影相，
所以會有光暗不一情況，
大家可以focus睇番面部瑕疵修飾方面啦~
IPSA PURE PROTECT POWDER COMPACT EX $460
IPSA PURE PROTECT POWDER COMPACT EX 重點針對改善底粧嘅膚質問題，
例如: 油光, 浮粉, 脫粧同變暗嘅問題,
當中嘅智慧控油粉末，有效吸走多餘油份，避免油光。
全新油狀固化粉末可以避免因為出油問題而出現嘅浮粉問題。
全新防脫保濕成份含有大量透明質酸保濕因子，
令粉底更貼面，望落皮膚更加滑。
而獨有色感調控技術可以避免因為出油而令到皮膚變得暗啞咗。
Joan:
ipsa呢隻粉餅偏薄,
而且遮瑕度唔差,
我皮膚比較多印都遮得七七八八,
對於我嚟講佢唔算好乾!唔錯!
Irene:
IPSA粉質好滑，遮瑕度都OK，
基本上一般紅印都遮到，
輕輕掃上面好貼薄，
啱晒一啲面部唔係好大問題嘅人。
Karen:
質地好薄，好滑，
遮瑕度OK，效果好自然，
本身瑕疵唔多嘅朋友淨係用呢個粉餅都OK。
Lancome Teint Miracle Pressed Powder
Lancom Pressed Powder 含有AURA-InsideTM科技，
保持肌膚幼滑，更令皮膚睇落好通透。
而佢當中有玫瑰珍珠填充物同豐富礦物粉未，
能夠輕易遮到瑕疵，唔會出現卡粉情況，
另外成分仲有三種玫瑰精華配合水凝因子，
能夠令到皮膚全日都維持保濕狀態。
Joan:
Lancome呢隻粉餅屬於蜜粉,
比較透薄,遮瑕度較低,
皮膚較多瑕疵嘅人適合先上粉底再加上呢隻粉餅!
用嚟補妝就一流!
Irene:
Lancome呢隻粉餅好幼細好滑，
有小小閃，但一啲都唔誇張，
配合佢個掃掃上面，
有好透薄效果，
由於質地透薄，相對遮瑕度一般，
建議先上粉底再掃上呢隻粉餅效果更好。
Karen:
粉質幼細，好透薄，相對遮瑕度較低，
感覺幾滑，唔乾身，
適合用嚟定妝。
Laura Mercier Smooth Finish Foundation Powder $420
呢個LAURA MERCIER粉餅內含乳木果同粉末的結合，
做到持久貼面的效果，
而大豆成份有助減淡細紋，均勻膚色，同時亦有提亮肌膚嘅效果。
Joan:
Laura Mercier呢隻有色粉餅遮瑕度好好,
感覺唔算太厚,而且好易推,
用後皮膚幾滑,
唔會有好乾嘅感覺!
Irene:
Laura Mercier有色粉餅一啲唔厚身，
遮瑕度唔錯，
上咗面好薄好滑，
就算唔上粉底，單單用佢都OK。
Karen:
遮瑕度好好，大部分瑕疵都修飾到，
粉質好幼細，就算喺多瑕疵嘅地方上多兩層粉都唔會好乾，
效果亦好貼薄，唔會感覺好厚粉。
Laura Mercier New Invisible Pressed Setting Powder
呢盒柔焦隱形蜜粉餅係透明顏色，
獨有柔焦效果令肌膚更細緻效果，
有效定妝同控油, 令到個妝更持久,
而且透明色適合任何膚色嘅人用。
另外配方有Silicone, Silica同極細球狀粉末，
有效控油定妝，令皮膚好似絲咁滑。
Joan:
Laura Mercier呢隻透明蜜粉都係建議返啲面部比較多瑕疵嘅人上左粉底先用!
粉質好幼而且細滑,非常透薄!
上粉後超滑好似摸緊自己皮膚咁,
重手左都唔會粉樣,
都幾鐘意個效果!
Irene:
Laura Mercier透明粉餅係透明色，
所以掃咗上面係無遮瑕度，
建議先上咗粉底先再用，
佢嘅粉質好幼細好滑，
薄得嚟控油度又唔錯，
最緊要一啲都唔乾。
幾推介呢隻粉餅比大家！
Karen:
白色嘅蜜粉餅上咗面會變透明色，
唔會白咗，效果好自然，好透薄，
上完面一摸感覺超滑，
爽身得嚟又唔乾，用嚟定妝或補妝非常好!
推介!
Shu Uemura Lightbulb UV SPF30PA+++ $430 (共16色)
Shu uemura呢盒粉餅有16種顏色，啱晒亞洲女仔嘅膚色，
佢哋當中專業貼膚配方，令到妝容持久貼服，
而佢個 lightbulb雙面化妝棉，兩邊物料都有唔同功用，
一面可以輕易掃到適量粉底，輕易控制底妝嘅厚薄度，
而另一邊布質纖維可細緻修磨肌膚，提升底妝光澤度。
而佢亦有多源光感成分、水感亮澤成分同夏威夷果油,
能令肌膚係任何角度下都有自然嘅光澤感,
另外,仲有lightbulb tm白瓷珍珠成分, 能夠令皮膚水潤柔嫩透薄。
Joan:
Shu uemura呢隻粉質比較厚,
遮瑕度高,紅印位置完全遮蓋!
但對於我混合性偏乾膚質嚟講就比較難推同乾!
眼尾位置都現左啲啲乾紋!
但遮毛孔就一流啦!
比較適合中性至油性皮膚人士使用!
Irene:
Shu uemura粉餅遮瑕度好好，
輕輕掃上面已經遮咗大部人分紅印，
一啲都唔厚身，
就算之前鶴搽粉底直接單用佢都得，
加上佢比較爽身，
啱晒夏天用呀！
Karen:
感覺好爽身，對我嚟講有啲乾，
會比較容易’cake’粉，
所以我只係塗咗薄薄一層，
但已經均勻到膚色，遮到紅印，
遮瑕度算唔錯。
YSL Forever Light Creator Compact SPF30 PA+++$520 (共三色)
YSL呢盒粉餅含有 Glycanactif WT TM複合物同活光亮采技術，
重點係可以淡化膚色，有效遮蓋所有色階損害，
妝感自然透薄，輕易做到自然裸妝。
skin light complex含有透明藍色珍珠粒子同純正色素,
可以提升肌膚本身嘅光澤,均勻膚色同有撫平毛乳嘅作用。
long-wear complex 含吸收填充物, 令到底妝持久, 提升透明感。
呢隻粉餅仲有SPF 30PA+++, 控制色素沉澱,抑制色斑。
Joan:
Ysl呢隻粉餅都幾貼面而且遮瑕度都唔錯,
紅印都遮到八成,
以壓粉嘅方式上面會更貼服,
做到透薄自然嘅妝感效果!
Irene:呢個粉餅好貼服，遮瑕度麵唔錯，
如果係用粉餅之前用埋佢哋新出嘅CC cream嘅話,
均勻膚色嘅效果會更好添!
Karen:
遮瑕度幾好，
一層層印上面都遮到紅印同少少雀斑，
而且感覺唔會好厚!
如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup | |
發表時間：2014-03-28 11:31 AM [ 訪客留言(0) ] [ 編輯日誌 ] [ 分享至FACEBOOK ] |
|
底霜打造零妝感
2014 年 3 月 27 日 星期四 | 
唔知各位女士化妝嘅時候有冇用Makeup Base呢?
好多人都好注重化妝嘅技巧反而忽略左妝前準備,
除左Skin Care要做足外,
Makeup Base都有效均勻膚色,令粉底更貼面持久,
所以唔好以為搽左skin care就可以skip左Makeup base啊!
首先就等我地教大家點揀Makeup Base先啦!
其實Makeup Base主要分左無色Base同有色Base,
點揀就視乎返大家平時係用濕粉啊定2way cake同碎粉啦!
而加就同大家講左無色嘅Base先啦!
無色Makeup Base主要係搽liquid foundation嘅人用!
因為用左粉底液再遮瑕再上碎粉其實已經好厚!
可以的話緊係捒返個無色或者微淡粉色嘅Base,
化返個透薄自然嘅底妝!
如果皮膚性質比較乾可以揀返帶令身嘅Makeup Base,
比較油的話就可以揀返啲控油或matte質地嘅Base!
而有色嘅Makeup Base主要俾啲鐘意用2 way cake或淨係上碎粉嘅女士們用!
而加潮流好興嘅BB Cream CC Cream同corrector base都係屬於有色Base嘅一種!
因為2 way cake同碎粉都比較薄所以遮瑕度都比較低!
有色Base有助均勻返膚色,再上碎粉同樣透薄自然!
咁輕輕講一講調色base嘅功效啦!
粉紅色就可以改善暗啞,令面色紅潤啲,
紫色就可以改善暗黃膚色,令皮膚望落白淨啲,
黃色就可以改善黑眼圈,可局部使用,
肌膚色就可以均勻膚色,修飾瑕疵!
分享完點揀Base之後,
等我地介紹下近排收到嘅新Base同一啲長青嘅Base啦!
首先介紹左無色嘅Base先!
分別有Lancome嘅La Base (右) 同Laura Mercier嘅Foundation Primer (左)
Lancome La Base
佢嘅係質地GelGel地透明狀,
有效修飾幼紋及遮毛孔,
而且推開好滑好細緻~
大家可以睇下個效果,
我自己就好鐘意個質感啦!
真係遮到啲細紋,用左皮膚仲好似絲咁細滑添!
而且聽佢地同事講,平時化妝整污糟左都可以當Remover咁用,
唔講真係唔知啊!
呢個Laura Mercier Foundation Primer係化妝師大愛Makeup Base之一,
成份有超微細粉紅珍珠粉末、雲母、甘油、
荷荷巴油、角鯊烷、微海藻、維化命 A、C 及 E。
保濕度好高,非常水潤,
質地有啲似gelgel地嘅lotion狀,
擠出嚟顏色帶微粉色,
但推開左係無色好快吸收,又唔笠,
效果透薄自然!
適合中至油性皮膚使用!
介紹完啲冇色Base再介紹有色嘅Base,
分別有Clinique嘅全新勻淨料研淡斑防曬液(左一),
Laura Mercier清爽Oil Free防曬有色Base(左二,中),
YSL亮光妍活調色CC霜(右二),
Benefit Big Easy衡久無瑕調色霜(右一),
而加我地逐一介紹啦!
首先講左Benefit嘅Big Easy衡久無瑕調色霜先,
佢係Benefit最新推出嘅春夏季Base,
佢採用左liquid-to-powder 液狀粉式配方,
非常爽身,適合油性皮膚,
質地薄身易推,遮瑕度都幾高,
成份添加左植物甘草複合精華,可保濕和防止乾燥細紋,
保持肌膚水油平衡,改善皮膚膚色,
而且有SPF 35防曬可以保護肌膚!
之後介紹Clinique嘅全新勻淨料研淡斑防曬液,
以革命性科技 (Invisible Screen TM) 研製,
是百分百非化學性低敏防曬,
仲係品牌首次推出 SPF45/PA++++ 高效防曬功能,
但仍能質地如絲的輕盈清爽，不油不黏的淡斑防曬液呢隻有色Base非常透薄,
帶淡粉橙色,質地水潤帶令身,推開後好爽,
而且有SPF 45/PA++++,
一Base兩用,適合中性及油性膚質使用!
Laura Mercier清爽Oil Free防曬有色Base
據我所之呢隻oil free base係Laura Mercier第一代嘅有色底霜,
雖然睇落好厚身,但好易推,
只要薄薄一層,質地都好清爽,
而且蘊含抗氧化複合物,
可以補濕同時控油,
不愧係出名底妝產品一流!
適合中至油性皮膚使用!
YSL亮光妍活調色CC霜
其實YSL上年已經推出過CC霜,
成分加入左 “colour cancelling pigements" 配方,龍珠果精華,辣木,
可調整原本膚色,保濕等,
而且有SPF35 與 PA+++ 防曬功效!
集護膚化妝於一身!
今季再推出3種全新基礎色調,
分別有#Rose 玫瑰粉紅、#Lavender 薰衣草淡紫、#Apricot 杏黃色,
#Rose可以修飾皮膚泛紅.過敏性等皮膚,
#Lavender最主要是修飾偏黃膚質,令皮膚透白自然,
#Apricot最貼近皮膚色,可修飾皮膚上容易暗沉的膚色如黑眼圈,
顏色都係針對膚色偏黃的亞洲人士而設。
今次我地揀左#Apricot,
顏色接近膚色,膚色中至深都可以使用!效果自然!
質感比較輕薄水潤,
除左均勻膚色外輕微嘅紅印都可以遮蓋,
直接用2Way cake或碎粉定妝,妝感更透薄自然
好啱而加呢啲濕度咁高嘅天氣用!
睇左咁多隻唔同嘅Makeup Base大家又有冇心動先?
但唔同人有唔皮膚性質,
大家快啲因應返自己嘅膚質揀返啱用嘅Base啦!
如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup | |
發表時間：2014-03-27 12:39 PM [ 訪客留言(0) ] [ 編輯日誌 ] [ 分享至FACEBOOK ] |
« | 94 | 95 | 96 | 97 | 98 | 99 | 100 | 101 | 102 | 103 | ... | 137 | »
|
