以往每個月我哋都會寫下有咩推介同有咩雷品，
但最近收到好多姐妹們話：好多時有人網上推介嘅嘢，
買咗番屋企試，根本就唔係佢哋預期嘅效果，
老實講其實無一樣產品啱晒所有唔同膚質嘅人用，
亦因為咁，今次就由我哋4個同事夾錢買啲產品番嚟試下，
（保證係真心感受！）
今次就買咗唔同嘅mask嚟試啦∼
我哋4個同事皮膚質地都唔同，
所以大家可以因應自己皮膚性質揀啱用嘅產品啦！
開始當然就簡介我哋4個係咩嘅皮膚性質啦∼
Irene:
中性皮膚，唔算好多瑕疵，
有啲黑眼圈，唔算好大問題
Jellia:
混合性皮膚，T 字位易出油易紅，
兩邊面係中性皮膚，
皮膚比較薄，
其他位置都無咩問題
Joan
混合性偏乾皮膚
容易出粒粒，面上比較多印，
冇乜血色
Karen:
屬於乾性皮膚，有雀斑、紅印、
膚色不均問題，冇乜血色
Fueki 好朋友高效保濕彈力美肌面膜 $48/4pcs
Irene:
呢塊mask主要成分係馬油，
初頭會以為好笠，
但敷落都唔錯，精華一啲都唔笠唔油，
而且佢帶有少少香味嘅。
塊Mask係棉質地唔算好厚，都可接受，
而袋裡面都算多精華，但拎出嚟塊Mask，
又唔會多到係咁滴，因為我最怕啲mask一路敷，
一路係咁滴啲精華，搞到周圍都係。
呢塊mask就連埋敷眼，但我自己就唔鍾意敷住對眼，
因為想一邊敷，一邊睇電視，
而塊mask唔算好fit我塊面，鼻翼位都敷唔到，
同埋側邊多咗好出嚟，不過下巴位就啱啱好！
敷咗10分鐘，塊面都有剩幾多精華，
我多數會按一陣，等佢吸收多次，
之後就同紙巾印走多餘精華，
敷完效果都好水潤，幾保濕。
不過效果唔係話超突出，
價錢除開要$12蚊一塊，都算中等價格，
我相信一定有再平過佢嘅mask都可以做呢個效果。
Joan:
呢款好朋友Mask包裝十分可愛!
睇返佢加入咗馬油,蜂蜜,乳木果,透明質酸,骨膠原和蘆薈精華等保濕成分,
覺得可以試下!
一打開張Mask厚薄適中,而且棉質地感覺幾舒服,
由於棉質Mask精華會比較吸收,
我就將袋裡嘅精華倒埋係面膜上再敷上面!
敷上面後我覺得面膜都幾貼面!
而且眼部位置都照顧到,
唯一鼻翼位置比較短,覆蓋唔哂鼻嘅位置!
敷左15分鐘之後,面膜上都仲好水,唔會乾爭爭!
起初都怕馬油會好潤,但用後又唔會太滋潤!
屬於比較保濕嘅面膜!
價錢唔算貴,平時敷下都唔肉赤!
Fueki 好朋友高效保濕彈力美肌面膜
Jellia:
Mask 主要成份係馬油，
雖然佢背後包裝袋上寫嘅係日文，
但唔睇真係唔知佢係“Made in Korea"
打開塊mask都見到有幾好精華，
Cotton質地都唔錯，
不過上咗面除咗個鼻位唔係太啱之外，
其他位置都算貼面，
（我對呢塊mask有啲疑問：
就係以我本身個鼻都唔高，點解都唔啱位呢？
佢其他位置都做得好好，
真係有啲美中不足！）
敷咗10分鐘，面膜仲有好多精華，
由於我兩邊面屬於中性肌膚，
所以對我嚟講有啲過潤同小小笠！
敷完之後需要去洗面，
洗完面都仲覺得有小小笠，
今朝訓醒仲出咗幾粒油脂粒添！
加上呢款面款要成$12塊，
我覺得呢個價錢可以有更好嘅選擇。
總結：呢款面膜啱啲皮膚比較乾嘅人用！
Karen:
mask嘅size比一般mask細啲，尤其是鼻位，
因為多數mask都會大過塊面好多，
可能因為size唔會過大，都算幾貼面。
一開個mask唔會好多精華漏出嚟，
只係剛好份量，唔會整到成手都濕晒，
厚薄適中，質地算軟，容易攤開唔係易爛果種。
敷咗10分鐘，精華都吸得七七八八，
再用手按多幾下幫助吸收，感覺幾滋潤，
feel到好黏，用清水沖一沖之後，
都仲有少少黏黏地，但就唔笠，
初初聽到係馬油諗住會好潤，
但係試完整體都算OK，唔會太潤太笠，
中性至乾性皮膚都用得。
不過計番＄12一塊又好似唔太抵，
呢個價錢仲有好多其他選擇。
Benico 超立體 3D 面膜 $5
Irene:
我呢一款係熱敷嘅，
所以敷前我會將佢掉落熱水到，浸一陣先，
mask唔係全棉質地，但比Fueki 薄身，
而拎咗塊mask出嚟，個袋裡面就無咩精華剩，
而精華質地都係好水潤，唔笠身。
佢呢個Mask重點係sales 3D立體，
而佢一開出嚟中間係有條線，
真係好似一個立體面具，好似直接可以笠住塊面，
佢都幾貼面，係鼻位長咗少少之外，
側面同下巴都啱啱好，其他位置都係fit哂，無多無少，
對於我嚟講，就做到3D效果。
敷咗10分鐘，面都吸得七七八八，
唔算有好多精華留低。
敷完效果唔算好保濕，同last得唔耐，
係塊面明亮咗少少。
不過價錢都算平，日日敷都唔係好心痛。
我試嘅mask同Irene係同一款∼
都係首先放係熱水到浸一陣，
等mask熱熱地嘅時候再敷係面，
我比較鍾意呢塊mask嘅設計，
佢好貼面而且啲位置啱啱好！
雖然保濕效果一般，
不過以佢個價錢$5一塊的確係好平，
就算隔日用都唔會心痛呀！
總結：Benico 超立體 3D 面膜同Fueki 好朋友高效保濕彈力美肌面膜,
我比較鍾意3D 面膜多啲∼
一嚟價錢平，二嚟係我面上效果好啲。
Joan:
我呢款3D Mask就係冷敷嘅!
用之前雪入雪櫃5-10分鐘再敷~感覺冰冰凉幾唔錯!
味道係藍苺昧,
感覺雖然好甜果香但一啲都唔笠!
面膜賣點就係3D貼面,當然比較期待啦!
一攞出嚟已經feel到佢比其他mask薄身,
一打閞就整爛左額頭位置,
真係要輕手啲!
面膜嘅中間係一條線打造左立體感,
除左鼻嘅位置比較高同長,
總括嚟講面膜都幾貼面!
敷完後將袋嘅精華倒返出嚟都有圖中咁多嫁!
咁我當然唔好再按下塊面啦!
我嘅用後感就覺得唔算勁保濕,
只係咁嘅價錢不過不失啦!
當妝前mask補補水都唔錯嘅!
Karen:
我呢款都係冷敷嘅，雪一陣個mask好冰涼，
本來感覺幾舒服，
不過我覺得一開封個味太勁，
敷上面之後就好啲。
質地好薄身，輕輕撕開都撕爛咗(我已經好小心！），
明顯比之前個mask冇咁貼面，
整貼咗一陣又會卜番起。
而且呢個mask個鼻位長好多，
所以對我嚟講，基本上3D同唔3D都冇乜分別，
唔覺得特別貼面。
精華份量算多，但唔會過多，
感覺好水潤，敷咗十分鐘都未吸晒啲精華，
＄5一塊都划算，妝前敷一敷補水都唔錯。
如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup
