大家好！我叫Karen，係Janice Lam Makeup Workshop
幫手嘅Full-time員工之一，亦都係Workshop嘅畢業生。
上次同大家分享過Workshop工作嘅點滴，同埋作為畢業生嘅少少體會，
今次想更深入咁同大家share下自己對化妝既睇法同一啲有趣既經歷。

 

 

 

可能有人會覺得讀化妝既人大部分都係讀唔成書或唔鍾意讀書，
但我自己就完全唔係咁諗。大學畢業之後我有諗過做PR、Marketing，
但其實自己又唔係太鍾意寫野，後來純粹出於「搵兩餐」既心態去做銀行，
做左幾年頂唔順都係辭左職。後來有朋友同我講：
「既然你咁鍾意化妝扮靚，點解唔試下向這行發展呢？」
於是，係朋友既鼓勵之下，我就開始儲錢去學化妝，
向住自己既興趣去發展啦！

 

 

 

其實屋企人都唔太清楚我呢行情況係點，
雖然佢地唔係咁清楚，但係知道我都想向化妝師呢個職業發展，
佢地都冇反對嘅，亦都好好彩佢地冇比壓力我。

 

 

一開始學化妝個時覺得好難掌握技巧，又擔心學完之後會點。
依家畢左業，其實仍然覺得呢樣野好難！
身邊有朋友結婚，自己做姊妹個時，見過好多化妝師，
但並唔係個個都化得好。
我朋友就話：「佢地都可以做化妝師啦，點解你唔得？」
但其實我仍然覺得自己有好大進步空間，
都想再學好D、專業D先正式投入呢行。
始終，化妝師既口碑真係好重要。
唔係話識化一兩個妝就可以應付到全部人嘅需要，
喺我既心目中，一個專業嘅化妝師係應該要全面啲，
要因應每個人既特徵去化妝，可以改善到客人既缺點，
突出佢既優點係最緊要，
另外就係要有好既應變能力，比如新娘嘅頭花裝飾準備唔夠，
就要就地取材去搵合適嘅花或者頭飾去代替，
務求令客人放心同滿意。

 

 

 

自己學完化妝一段時間之後，有時會跟Janice出去做野，
真係覺得仲有好多野要學習。除了實際既化妝技巧之外，
待人接物方面都唔係想像中咁容易。例如要同客人有良好溝通，
話比佢知點化最好、最適合佢，要比到百分百信心客人，
咁佢地先會放心交個樣比你化靚佢！

 

 

 

當然，係出面做野同課堂上練習個時完成係兩回事。
上堂時可以慢慢練習，可以化到最滿意為止。
相反，出去做野除左要化得好之外，更加要化得快。
而且要學識「執生」，曾經試過客人臨時要求黏上一束束既假眼睫毛，
好彩我地有預先準備多啲唔同既款式，
先可以達到客人既要求。
 

 

 

 

雖然係出面做野並唔簡單，不過我仍然好享然每一次既out job，
因為真係學到好多野，可以累積好多經驗。
記得有次幫雜誌shooting化妝，
個次只有我同另一個同事負責，亦都係第一次係無Janice在場既情況之下出job。
所以事前都做咗唔少準備，特登搵朋友返workshop練習，
Janice就逐一指出我做得唔好既地方，
例如skincare妝要注意model睇落好似冇化妝但係又要好精神啦，
眉要好soft，輪廓光暗位要突出等，
初時化完以為都OK，但係比Janice睇完之後先知道有好多方面都做得唔好，
例如條眉唔balance，上粉太厚等等，
原來就算看似好簡單既一張搽cream上面影既相，
點樣搽上面都好有技巧架，所以都幾擔心出job個日既表現。

 

 

 

到咗shooting日，其實開頭真係好驚，
加上開始時間又遲左，所以一切都變得好趕。
最surprise就係Janice突然之間出現係現場探班，
令我地更唔敢怠慢！好在最後都可以on schedule完成拍攝。
個日我地喺店裡面化妝同拍攝，
由於當時係營業時間，所以都有客人出入，
個陣化完妝我同同事都掛住跟shooting，
冇即時收拾好地方，Janice就即刻提點我地要整理好地方，
免得阻礙店裡面既客人，
呢次經驗都令我知道化妝師除咗化妝，仲有好多細微地方要做好。
自己都知道仍然有好多不足要改善，
例如化妝速度上可以更快，set頭方面都要再練多d！
其實客人滿意或者唔滿意都未必會即時話你知，
咁點先知道客人既滿意程度呢，
就要睇下佢會唔會再搵你做嘢喇，
人地唔再搵你就一定有原因，
所以自己每次做完嘢都要反省下做得好同唔好嘅地方，從而改進自己。
 

 

 

 

曾經有人問過我，會唔會做返九晚六既文職工作，我立即say no！
因為自己最想係化妝呢行繼續發展落去。
雖然我地工作時間無其他人咁穩定，少左好多時間陪朋友、家人，
但我都覺得好值得，最緊要係自己做緊既野係自己真心鍾意！
成世人流流長，無六十歲都唔使旨意諗退休，
所以緊係要揀份自己有興趣既職業，先可以長久繼續做落去，
人生先會活得有意義！

 

 

 

 

 

相信唔少女仔都鍾意買唇膏，
曾經聽過Ｄ朋友話，自己買過Ｎ咁多次唇膏，
差唔多中、西、日同韓國既牌子都試過晒，
但係都未揀到一款自己真正鍾意既唇膏。
我地非常明白你地既諗法，
所以今次特登精選左幾支熱辣辣新鮮出爐既唇膏，
幫大家試下邊款最實色，邊款最易襯！

我地首先會測試下搽上嘴一次之後既顏色，
之後會搽第二層，睇下個效果係點。
當然，呢個測驗係以我地自己嘴唇為準，
唔同人既唇色深淺亦都會唔一樣，所以搽上嘴嘅效果都會有唔同架。
比如唇膏比較水潤既話，一般效果會較透薄。
相反，實色唇膏又可能冇咁潤身，
所以大家揀唇膏嘅時候都要因應返自己需要去買呀！

 

 

 

 

 

 

 

Laneige Serum Intense Lipstick $210

 

 

 

先為大家試下Laneige新出既Serum Intense Lipstick！
呢支Lipstick有好高既保濕度，
成份包括甘油、低敏滋潤修護霜及純天然角鯊烯，
可鎖緊水份，有護唇功效，並有效減少唇紋。

 

 

 

輕輕一搽，顏色已經好平均，
加上我自己個嘴本身好易乾，搽左一次之後唔會覺得
乾。再搽一次之後個唇色會更實
更立體，而且有光澤令唇紋無咁明顯，
咁就可以唔使搽多層Lip gloss啦！
呢個有少少偏橙既顏色可以令
唇形望上去更飽滿圓潤，
絕對係今年初春的大熱色彩！

顯色度：★★★★
滋潤度：★★★★
持久度：★★★★
透薄度：★★★★
均勻度：★★★★

 

 

 

 

 

 

同樣地，輕輕一畫已經可以遮蓋本身唇色，
出到原色效果。
畫完出黎成個唇形好靚，仲可以顯得膚色更白添。
如果怕個嘴顏色太sharp太紅的話，
用呢隻唇膏個時，建議輕輕搽一層就已經好夠！

顯色度：★★★★
滋潤度：★★★★
持久度：★★★★
透薄度：★★★★
均勻度：★★★★★

 

 

 

 

LUNASOL Full Glamour Lips $260

 

 

 

今次LUNASOL一系列柔和色系唇膏，以自然唇色為出發點，
內含修護精華成分，希望為雙唇帶黎水嫩效果。

 

 

 

唇膏顏色好自然，貼近原本既唇色，
感覺好水潤，
自然粉紅色可以改善面色，令望落去更精神！
平時返工或者配搭日常妝容就最啱喇！

顯色度：★★★
滋潤度：★★★
持久度：★★★★
透薄度：★★★★
均勻度：★★★★★

 

 

 

 

 

 

RMK W Crayon & Gloss Lip $360

 

 

 

RMK全新既雙頭唇妝筆一邊係Lip Crayon，
而另一邊就係半透亮Lip Gloss的，
感覺非常方便，唔使左一支Lip Gloss，
右一支Lip stick咁麻煩。

 

 

 

同其他唇膏好唔同，呢支好似蠟筆咁好得意，
畫上嘴既時候好似油顏色咁。
筆頭比較細，所以嘴角呢啲細微位都可以搽到。
呢隻啞色比較nude，基本上搽一層同
兩層既分別都唔算太大。
搽完之後再上多一層Lip Gloss，個嘴即刻’令’晒無晒唇紋！
其實我自己本身幾怕搽Lip Gloss，唔鍾意佢
’油笠笠’，好似搽左層油，「漿」住個嘴。
但呢隻Lip Gloss就完全無呢個問題，
質地好順滑易推，感覺輕爽而唔黏膩。

顯色度：★★★★★
滋潤度：★★★★
持久度：★★★★★
透薄度：★★★
均勻度：★★★★

 

 

 

 

 

 

另一支唇膏顏色好明顯比上一支深，
深粉紅色調貼近原色，有少少似桃紅色，非常紅潤。
其實一搽上嘴顏色已經好出好sharp好rich，
其實我自己就幾鍾意呢隻顏色，可以同依家
流行既咬唇妝非常配合。
如果你覺得自己唇紋比較多既話，就可以即刻
搽返一層Lip Gloss，咁樣就可以達到保濕同
遮蓋唇紋既效果，個嘴仔就唔會甩皮啦！
呢種做法仲可以令唇膏持久力加強，
咁就唔使成日keep住補妝啦！

顯色度：★★★★★
滋潤度：★★★★
持久度：★★★★★
透薄度：★★★
均勻度：★★★★

 

 

 

 

 

 

effusais essenc gloss $100@

 

 

 

跟住我地又試下ettusais 全新既essence gloss 啦！
全新「明亮著色成分」加上「清爽豐唇油分」，
令唇色更鮮明，望落去飽滿有光澤！
呢支唇彩更加入左玫瑰油同透明質酸等修護成分，
可以滋潤雙唇，帶黎水嫩效果！

 

 

 

三支唇彩入面呢支就最顯色，搽出黎之後帶少少桃紅色，
但又唔會感覺太誇張。
質地方面滋潤得嚟唔會有黏住黏住嘅感覺，
如果你個嘴長期處於極乾燥同甩皮，
呢支有修護成分既唇彩就啱晒你！
啱啱上嘴之後唇紋即刻唔見晒，
而且好濕潤，感覺似潤唇膏。
如果平時唔化妝，又唔想比人覺得面青青無咩血色咁，
可以試下呢支唇彩，
搽左之後望落個人精神啲，
當佢潤唇膏搽都完全無問題！
建議大家可以用手指沾上唇彩後再印上嘴，
份量會較易控制，咁就搽得更均勻貼服啦。

顯色度：★★★★★
滋潤度：★★★★★
持久度：★★★★
透薄度：★★★
均勻度：★★★

 

 

 

 

 

 

呢支唇彩顏色就比上面個支稍為淺一度，
屬於自然粉紅色調，感覺好可愛！
加上晶瑩剔透既glossy效果，令成個嘴唇
變得好水嫩飽滿，而且有種白裡透紅既感覺。
基本上搽一次已經可keep兩至三
小時，持久度唔錯！

顯色度：★★★★
滋潤度：★★★★★
持久度：★★★★★
透薄度：★★★
均勻度：★★★

 

 

 

 

 

 

有名你叫「裸色」，當然係行自然路線。
呢支唇彩顏色Nude得黎仍然帶少少粉紅，
同其他有色潤唇膏既效果非常相似，
搽出黎幾透薄而均勻，
而且無咩唇紋，值得一讚！
鍾意自然淡妝既你，
搽呢隻顏色就岩晒！
相反，有時眼妝比較濃既話，用返呢隻
淡色唇彩，就正正可以突出返眼妝，絕對唔會
喧賓奪主！

顯色度：★★★
滋潤度：★★★★★
持久度：★★★★★
透薄度：★★★★
均勻度：★★★

希望以上既介紹可以幫你搵到心目中理想既唇膏啦！
黎緊我地仲會介紹埋其他新色眼影、胭脂等等，
想知邊隻好用同抵用，
就記住密切留意我地既blog啦！