之前Part 1教咗大家簡易整Gel Nail所需嘅工具，
大家準好未呢？
今次準備教大家六款簡單嘅款式，
呢六款都係1分鍾內就能畫到嘅款式，
啱晒一啲要快捷，要簡單的你！

今次由平時連指甲油都唔太搽嘅我親自動手整gel甲，
同事係我身邊step by step地教我整，
原來真係無我想像中咁難!!
第一次整雖然唔係好靓，
但對於新手嚟講都算ok見得下人啦!

第一款就係教大家最容易嘅法式款：

Step 1: 塗上Gel甲底油
Step 2: 照燈機30秒
Step 3: 於整片指甲塗上橙紅色gel甲油
Step 4: 照燈機30秒
Step 5: 將甲油掃橫放，
用鮮紅色gel甲油一口氣由左至右橫掃一下
Step 6: 照燈機30秒
Step 7: 塗上gel甲面油
Step 8: 照燈60﹣90秒

第二款其實同第一款好似，
只要一個STEP就變另一個款啦！

首先為指甲塗上gel甲底油，照燈機30秒，
Step 1: 於整片指甲上塗上桃紅色gel甲油
Step 2: 照燈機30秒
Step 3: 將甲油掃斜放，一口氣由右下至左上斜掃一下
Step 4: 照燈機30秒
Step 5: 將甲油掃斜放，一口氣由左下至右上斜掃一下
Step 6: 照燈機30秒
最後塗上gel 界面油，照燈機60﹣90秒。

頭先個二款係咪超簡單呢？
熱身完之後又嚟一個簡單款：

Step 1: 塗上gel 甲底油
Step 2: 照燈機30秒
Step 3: 於整片指甲塗上紅色gel 甲油
Step 4: 照燈機30秒
Step 5: 將桃紅色gel甲油滴係紙上
Step 6: 建議先係紙上空白位置用點花筆練習，
當你識得控制力度時就可以畫係指甲到。
Step 7: 用點花筆於指甲上畫一個十字圖案
Step 8: 照燈機30秒
最後塗上gel甲面油，照燈機60﹣90秒。

嚟到第四款就要準備小小用具啦，
用具：膠紙，剪刀

首先為指甲塗上gel甲底油，照燈機30秒，
Step 1: 準備膠紙
Step 2: 用剪刀橫剪一條膠紙
Step 3: 把膠紙貼上指甲上，再係指甲邊位塗上藍色gel甲油
Step 4: 照燈機30秒
Step 5: 於白紙上滴上桃紅gel甲油
Step 6: 建議先係紙上空白位置用點花筆練習，
當你識得控制力度時就可以畫係指甲到。
Step 7: 係藍色與紅色邊界畫上一條桃紅色橫線
Step 8: 照燈機30秒
最後塗上gel甲面油，照燈機60﹣90秒。

好啦介紹咗四款以紅色為主嘅gel甲款，
而家就介紹第五款以紫白色為主嘅甲款，
準備好未？

首先塗上gel甲底油，照燈機30秒，
Step 1: 塗上紫色，白色gel甲油
Step 2: 照燈機30秒
Step 3: 將白色gel甲油滴於紙上
Step 4: 畫心形就用點花筆好似左“V"字咁，
建議先係紙上空白位置用點花筆練習，
當你識得控制力度時就可以畫係指甲到。
Step 5: 於指甲面上用白色gel甲油畫上心形
Step 6: 照燈機30秒
最後塗上gel甲面油，照燈機60﹣90秒。

最後一款亦都係今次咁多款當中最難嘅一款，
如果呢款你哋都畫到嘅話，
證明以上個五款你都已經識晒啦！

首先塗上gel甲底油，照燈機30秒，
Step 1: 將紫色gel甲油滴於紙上
Step 2: 畫出一條有弧度嘅線條加上點圓點，
建議先係紙上空白位置用點花筆練習，
當你識得控制力度時就可以畫係指甲到。
Step 3: 於指甲面上用紫色gel甲油畫上有弧度嘅線條，
係線條下點上圓點，
Step 4: 照燈機30秒
最後塗上gel甲面油，照燈機60﹣90秒。

大家睇完呢幾款係咪真係好易整呢？
正如我哋標題一樣，
“輕易完成的Gel Nail”，
嚟緊我哋總會繼續教大家整不同嘅簡單gel甲咖，
想係屋企為自己指甲扮靚嘅你就要繼續留意我哋Blog啦，
你都可以成為自己嘅扮靚專家！

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup

一聽到"Oil"好多人都好驚，
覺得實會好油淋淋，好笠
同出現油到生瘡等情況，
如果係咁的確係好嚇人嘅，
但係有可能份量控制得唔好先會咁架。
我本身屬於乾性皮膚，尤其係咁乾燥嘅天氣，
皮膚乾嘅情況更加嚴重，
初時都會擔心，Face oil會唔會太油，
漿住塊面好易出粒粒咁，
但係真係太乾，所以就決定試一試。
用完覺得真係幾好喎，皮膚滑啲，上粉都貼啲。
以前外國品牌face oil選擇會比較多，
但近年好多大品牌都有出face oil,
所以其實而家用face oil都好普遍，
等我share一下佢嘅用法同介紹下唔同牌子嘅face oil比大家啦!

Face oil都可以有幾個唔同用法，
等我同大家分享下啦。

1. 一朝早皮膚繃緊想急救下嘅話，
洗面後取一泵face oil份量，按摩全面約3至5分鐘，
再用暖毛巾印乾，之後搽toner同skincare,
皮膚就會即時變得柔軟細緻啲，更加易上妝喇。

2. 洗面後先搽toner,再加face oil按一按面，最後搽skincare
呢個可能係最多人用嘅方法，因為多數beauty consultant都係咁教客人，
我自己亦試過，但覺得搽完oil先搽cream，效果唔係咁好，
唔覺得潤咗，反而好似之後用嘅護膚品滲唔到入皮膚，
令皮膚唔可以完全吸收。所以我會用第三個方法。

3. 洗面後先搽toner,跟住serum,cream,最後印上face oil,
有需要可以喺特別乾嘅地方再加多啲，呢個方法個人認為效果最好。

4. 如果大家做完護膚程序後仍然覺得好乾，
可以拎一至兩滴face oil mix埋粉底，
令粉底更潤身，易推啲，冇咁易"cake"粉，
死皮亦冇咁現架。

5. 除咗用喺面上，亦可以用嚟搽指甲邊緣位置，
有時成日生倒刺嘅原因就係因為太乾。

另外手肘、膝蓋，腳跟皮膚都係比較乾同粗糙，用oil可以幫助軟化皮膚。
仲有好多人都會忽略嘅頸部，我地可以用oil以推淋巴方式按摩，
按完用熱毛巾印一印走多餘嘅oil，再搽番skincare,
咁做可以令護膚品吸收啲，感覺仲好relax架！
如果用牛骨幫手按摩，仲可以有助去水腫瘦面添！

CANVAS天壇木緊緻衡肌油 ＄770
來自澳洲嘅天然有機品牌CANVAS，
品牌皇牌嘅抗氧煥肌系列裡面有呢個special care product,
成份有天壇木、茶花籽油、熱情果油，
能深層潤膚，抗氧去皺，撫平細紋，適合成熟皮膚。
爽膚水後滴幾滴喺掌心，輕拍於面同頸部，
用嘅時候仲聞到好香嘅花香味，感覺好舒服呀。
想了解CANVAS更多產品，可click入佢地嘅官網：
www.canvasbeauty.com.hk

產品盒底部有列明製造日期，建議開封後12個月內使用

雪花秀Concentrated Ginseng Renewing Essential Oil $1,290
人蔘籽油成份提高皮膚防禦能力，
促進皮膚自我修復能力，有助改善皺紋，
有效抗氧嘅冬柏油成份令肌膚更透亮光澤。
用法有兩個，可以先用Oil後搽面霜，
或者喺基本護理後，攞少少份量於掌心塗勻，
再按摩面部，長時間滋潤肌膚。

產品底部有列明製造日期，建議生產日期後3年內使用

Clarins Blue Orchid Face Treatment Oil $380
法國製造，含有榛果肌底油，無防腐劑及化學香料，
配方中添加廣藿香及蘭花精油，滋潤肌膚達至水油平衡，
適合乾性及缺水性皮膚使用，
可於夜晚單獨使用或者同平日嘅護膚品配搭使用。
塗化妝水後，肌膚仍然微濕時，
用掌心溫熱face oil,再按壓面及頸部，
幫助吸收，注意需避開眼周位置。

Paul & Joe Facial Treatment Oil $450
主要成份有白絨花籽油及橄欖油，
加上另外七種天然植物油，有鎖水及抗衰老功效，
其中紫蘇油及有機紅花籽油蘊含豐富亞麻油酸，
可防止肌膚因缺乏亞麻油酸而乾燥發炎，
仲有清甜嘅柑橘香味，令人更鬆弛舒適。
每週一至兩次，於清潔肌膚後，
取一茶匙精華油於手心中，輕輕按摩整個面部。
按摩後如果覺得笠或者好油，可用紙巾輕輕印走多餘嘅精華油。

ORIGINS悅肌再生抗皺精華油 $475
呢支精華油喺我地早前“內外急救”blog都有介紹過架，
佢加入咗好多天然嘅植物成分，
比如向日葵籽油、摩洛哥堅果油、橄欖萃取等等，
仲加入咗輕盈紓爽配方，質地唔會油立立，
唔會堵塞毛孔，引致暗瘡或油脂粒，
可以撫平細紋、乾紋，改善肌膚自我水油平衡功能。

喜歡有機同天然成份產品嘅朋友，
可以留意下以下兩個品牌嘅產品呀。

 

MUKTI Antioxidant Facial Oil ＄519
可能大家對Mukti唔係咁認識，
佢係由澳洲製造同生產嘅天然有機護膚品牌，
包裝上清楚標籤住產品係有機認證，
產品不進行動物測試，包裝環保，
做到愛護地球的宗旨。
產品亦不使用合成化學成分，不含基因改造成分、防腐劑等。

主要成份有玫瑰果、月見草，適合中性、乾性、敏感性肌膚，
可以促進骨膠原增生，提升肌膚彈性及淡化色斑。

搽完toner滴幾滴喺手指按壓面同頸，
拎多少少份量仲可以當massage oil架，
仲可以當eye makeup remover添，
只要滴幾滴喺化妝棉上，輕輕卸走眼妝就可以。
如果你係極乾皮膚，想再滋潤啲，
可以滴一兩滴face oil，mix埋night cream用，
咁就可以加強滋潤效果。

Pangea Organics 有機草本平衡緊致護膚油 $569
來自美國科羅拉多州，
係全美最大生產全天然化妝護膚品嘅品牌，
護膚油主成分有有石榴樹果子精華油、植物角鯊烯，
能刺激骨膠原增生及修護細胞，有效對抗肌膚色班同幼紋，
適合任何肌膚。

其實無論你係咩性質嘅皮膚，都可以用face oil嘅，
只要用嘅份量適當同方法正確，就唔會咁易出暗瘡同粒粒喇！ 

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup

繼上次復古禮帽篇之後，
有好朋友都會問，咁帶冷帽可以襯到咩髮型同妝容呢？
成日買完之後都唔識點去配搭，見大家咁疑惑，
所以今次就想為大家講下，每個人冬天都必有嘅冷帽！
我就用咗兔毛質地嘅冷帽做今次試範。

妝容解構

妝容就會以眼部加上閃粉做重點，
營造冬日嘅效果！

妝容步驟

1. 在眼蓋上印上淡粉紅色creamy eye shadow。
（建議產品：Shiseido Shimmering Cream Eye Color #PK214)

2. 加白色下眼線
（建議產品：M.A.C. Eye Kohl #Fascinating)

3. 畫上啡色眼線後，on top再加啡金色閃粉liquid eyeliner
（建議產品：MJ Liquid Eyeliner #Brown
Etude House Tear Eye Liner # 4)

4. 下眼線加上白色閃粉liquid eyeliner
（建議產品：Etude House Tear Eye Liner #1)

5. 之後再印上眼蓋上幻彩閃粉。
（建議產品：Etude House Pigment #3)

6. 掃上粉紅色胭脂。
（建議產品： # MAC Sheertone Blush #Pink Swoon)

7. 最後塗上淡粉紅lip gloss
（建議產品： Chanel lip gloss #139)

Check Point

想整個妝容出嚟效果充滿冬天感覺，
大家就可以係眼睫毛加上少許閃粉liquid eyeliner，
眼頭和眼窩再加以打亮，瞬間就有身處於雪地效果。

髮型解構

今次會以大波浪外捲，增加空氣感，
而且令整造型加添女人氣質。

Font

Right

Left

Back

造型步驟

1. 髮尾塗上捲髮造型/抗熱打底產品。

2. 帶上冷帽固定位置

3. 將後面頭髮分為兩個section

4. 右邊頭髮將電髮夾，向右邊外捲

5. 左邊頭髮將電髮夾，向左邊外捲

6. 留海部分同樣向外夾捲

Check Point

想增加髮型層次感，夾髮尾時注意要捲3﹣4個圈，
先可以加強輕盈，而且要視乎自己頭髮長度，
愈長所捲圈次數會愈多。

《冬天必備飾物篇（一）復古風禮帽》點擊瀏覽全文：
http://www.girlstalk.hk/blogs/?p=5493

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup

相信大家對韓國品牌嘅護膚品一啲都唔會陌生，
亦因為韓國護膚品口碑唔錯嘅關係，
每次推出新產品， 一定會得到好多人愛戴，
今次我哋就介紹2個韓國新晉品牌比大家啦！

第一個就係韓國一線人氣尊貴護膚品牌“The History of 后”，
佢終於係今年11月8日正式進駐香港啦！
（香港國際金融中心和時代廣場連卡佛）
記得係佢未進駐香港前幾個月，已經有blog,雜誌介紹佢，
“The History of 后”產品特別之處在於採用咗韓國古代
只向皇室呈獻嘅宮廷秘方“拱辰秘丹”結合現代科技，
解決肌膚多種衰老問題。2003年係韓國首次推出，
係短短10年間，已升為韓國的一線人氣美容品牌，
演出<<大長今>>紅遍亞洲嘅李英愛都係佢哋品牌粉絲，
李英愛總做埋佢哋嘅代言人添！
佢哋品牌宗旨係為客人打造出皇后般嘅亮麗膚色，高麗清雅氣質。
我聽完之後都都忍唔住要即刻試下呀！
我哋今次收到「后」嘅2 set禮盒，
分別係佢嘅皇牌產品“秘貼自生精華禮盒”，
另一款就係“拱辰享活膚清潤套裝”

首先就係呢SET皇牌“秘貼自生精華禮盒” $1,638
(合適中性至乾性,混合性)

(左1 & 2)秘貼自生精華45ml & 20ml:
抗衰老精華液能一次改善所有肌膚問題。
一唧出嚟係啫喱狀,輕輕力就可以推開,
只係塗上隻手到,好快就吸收晒!!好正呀!!
隻手啲皮膚即時柔軟咗!!
果然係皇牌!
(其實未試之前都擔心會唔會好笠)
試完之後真係好鍾意。

(中)津率享滋潤液 (20ml):
佢成份有紅山參,用咗之後肌膚會紅潤同有光澤。
初頭會以為有好大一陣紅參味，
點知嗅起上嚟，有啲似BB 爽身粉味，感覺好舒服，
佢真係好水呀，又係好快吸收，
塗完頭先個枝精華同呢枝滋潤液後，
皮膚好快就變得超軟同好滑!!
飲飽水嘅皮膚，真係一摸就知!

(右)津率享滋養乳(20ml):
呢支都有紅山參成份，可以調理肌膚，
達到水油平衡的健康狀態，
激活肌膚細胞，促進血液循環。

另外呢set都係「后」嘅拱辰享活膚清潤套裝 $1,368
呢個系列係有沉香成份，沉香會令肌膚回復彈性，
最正係有緊緻面部輪廓嘅功效!!
(合適乾性, 極乾性嘅人士)

(左1)氣津滋潤液 (150ML):
呢個韓方嘅柔膚水有滋潤同軟化作用，
我覺得佢個設計好細心呀! 有個蓋封住，
啱晒成日會唔小心倒瀉野嘅我呀!!
佢質地係有小小gel gel地，
比起水狀嘅滋潤液會更加保濕。
如果極乾皮膚嘅人，可以沾濕棉花重點保濕。
重點保濕可改善脫皮狀況。

(左2)活膚清潤乳 (110ml):
佢有豐富營養，會令到啲皮膚有氣息。
塗咗上面之後我會輕輕按摩，同樣都係有帶少少爽身粉味，
等佢慢慢吸收後，塊面有光澤咗!
加上呢條系列主要係可以做到緊緻效果，
所以會建議配合按摩效果更正!

另外還有幾件sample，(左3) 活膚清潤霜，(右3) 氣津精華，
(右2) 氣津修護眼霜，(右1) 氣津臉頸修護睡眠面膜
呢個系列都係重點緊緻嘅功效，
呢set野都真係幾好，
可以一次過試埋同系列嘅唔同產品，
大家不妨試下啦!!

講完「后」之後, 就講下令一個新晉韓國品牌,
就係「belif」啦!記得第一眼見到呢個品牌產品時,
以為係外國嘅醫學品牌,因2佢包裝好簡約,
慢慢睇真啲先知係韓國品牌!!

同埋我好鍾意佢個份細心，
好小韓國品牌會係產品背後印有到期日。
另外,吸引到我嘅就係佢嘅品牌哲學,
「真實」:減少不必要嘅包裝宣傳,
「簡約」:用天然有效嘅草本成份,令產品安全有效
「真誠」:產品上標註成份,唔會誇大成份
淨係呢3點就令我放心用佢嘅產品。
而家係時代廣場連卡佛都有專櫃啦!

1)紫芹26hr潤澤炸彈霜 (50ml – $350)
呢隻係cream狀質地,有小小薄荷味,
塗上手有小小涼涼地嘅感覺,
佢有助舒媛乾裂不適嘅皮膚。
合適乾性同甩皮人士使用。

2)斗篷草高效水份炸彈霜 (50ml – $350)
一打開個蓋好勁薄荷味,
佢質地同頭先個隻唔同,
佢係gel狀嘅, 一推開就變得好水嘅效果,
保濕效果ok,
塗上手都一樣有小小涼涼地同清爽嘅感覺,
呢隻cream合適油性同混合性皮膚使用。

3)匈牙利女王保濕水精華 (75ml – $370)
係咁多隻產品中,我最鍾意呢支,
因為一唧出嚟係好水潤, 好清爽一啲都唔笠!!
佢結合咗超過15種精選的植物萃取精華而成,
令皮膚唔單止保濕總好柔滑細緻添!
合適混合性皮膚,乾性皮膚使用。

4)巴西莓果活力抗衰老精華 (75ml – $370)
呢個用法同頭先個幾款係唔同,
用之前要搖一搖將液體混和後先塗上面部,
佢有金盞花成份, 所以做到強力保濕同舒緩,
而且高濃度巴西莓果活力抗衰老精華有抗養化作用,
合適女士們使用。

5) 26hr經典保濕精華 (50ml – $370)
呢個保濕精華係乳液狀,
加上有高營養度草本精華的nutrition complex成份,
比起之前幾枝精華佢會滋潤啲,
合適極乾皮膚嘅人使用。

6)糖衣水嫩護唇膏 (15g – $130)
呢個係限量香港特別版,
為咗慶祝belif係香港開幕而設計,
呢隻護唇膏含有維他命E,
搽一層都好潤啦!
合適乾燥唇部嘅人使用。

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup