今日同大家介紹幾款新出嘅BB cream同CC cream比大家。
一向用開粉底液嘅我，一直對BB Cream嘅印象係比較厚身，
而CC cream就係BB cream嘅進化版但顏色會偏白。
呢啲都係我對佢哋嘅第一個印象！
另一個印象就係，如果要極快出門口就用BB cream啦！
因為佢會一支有晒護膚同粉底嘅功能！
今日我就嚟個素顏同塗咗BB cream或CC cream嘅
before after比大家睇下個分別啦！

 

 

第一隻就試Maybelline Pure Mineral 純礦物BB Cream，
一唧出隻手到嘅感覺同粉底差唔多，
好水潤好易推開，上咗面係好薄，
遮瑕度都唔錯，一般面上嘅小瑕疵紅印都輕易遮晒，
真係做到BB裸妝嘅效果！唔錯唔錯！
之後睇番佢有咩成份啦，原來有荷荷巴油，
杏桃油，熱情果油，堅果油同胡荽油，
全部都係滋潤皮膚嘅油，唔怪得之真係幾水潤啦！
呢支BB cream真係推翻咗我之前對BB cream嘅厚重感覺。

遮瑕度：＊＊＊＊
易推度：＊＊＊＊＊
滋潤度：＊＊＊＊＊

 

 

 

Maybelline Pure Mineral 純礦物BB Cream $109/30ml

再嚟就係試Rodial BB Venom Skin Tint 胜肽緊膚BB霜，
一唧出嚟質地比起頭先個隻會厚身小小同滋潤啲，
上咗面嘅遮瑕效果好好，
基本上所有瑕疵都好易瑕晒！
注意一點就係如果用掃上就要輕力慢慢推，
相反如果太大力就咩都推走晒㗎啦！
但如果想要又薄又貼嘅效果，
我建議用手上會更好！
加上佢成份有三胜肽synr-ake神經胜肽，
會令皮膚回復緊緻效果!
用手上BB cream 會令緊緻效果會更明顯！
不過就要留意佢嘅到期日啦!!
因為佢只有6個月期限，
所以開咗嚟用就快手用晒佢啦!!

遮瑕度：＊＊＊＊＊
易推度：＊＊＊＊
滋潤度：＊＊＊＊＊

Rodial BB Venom Skin Tint 胜肽緊膚BB霜 $390/40ml

 

試咗2枝BB cream係時候試下CC Cream啦！
banila co.呢個牌子想試好耐啦！
未試之前已經收到好多人都讚呢隻韓國品牌啲化妝品好好用！
我有用開佢支base都覺得唔錯！
好啦！入番正題，佢呢個係cream狀CC cream，
我用粉卜上，只係印幾下就遮咗啲紅印，
好易就印開到！上咗面唔會好令身，
（我真係好怕成面令到好似面油咁！）
但佢絕對無呢個問題，
出嚟個妝又薄又貼皮膚都好滑！
佢真係將底霜+粉底液+粉餅的優點結合埋，
睇番成份先知，原來都好講究!!
28%水份，15%粉末再加上55%修護油成份，
唔怪得次上到面可以咁薄咁貼同keep得耐啦!
最緊要只要用粉卜印幾印就搞掂出得街！
絕對啱晒唔到最後一分鍾都唔出門口嘅我！
另外，佢盒上 印有到期日2016年，
啱晒我啦!!可以慢慢用!

遮瑕度：＊＊＊＊＊
易推度：＊＊＊＊＊
滋潤度：＊＊＊＊

 

banila co. CC cream (01 Light Beige) $280/13g

最後呢個係Dr Jart+嘅CC cream，
佢呢個CC cream就有啲特別，
佢係一圈白色一圈CC cream，

外表好得意，好sweet嘅感覺，
白色個啲原來蘊含咗多種天然嘅保濕成分，
有米糠油，辣木油，白芒花籽，維他命E。
我都係一樣用粉卜印上CC cream塗上面，
佢比起頭先banila co.滋潤度貼面度都差唔多，
不過佢比起banila co.多咗一樣野，
就係佢將亮肌功效和調色護理互相結合，
而研製成白色及裸色的粉體組合，
所以佢塗上面會多一份光澤感，
如果皮膚比較暗淡無光嘅人就真係合適啦！
佢開封後可以keep一年，大家要注意啦！

遮瑕度：＊＊＊＊
易推度：＊＊＊＊＊
滋潤度：＊＊＊＊＊

 

除咗以上個幾隻BB cream同CC cream之外，其實都可以比啲資料大家參考下：

 

Dr.G Moist Ample CC Cushion水份精華氣墊CC霜SPF50+ PA+++ $256/13g
呢隻CC霜內含的保濕精華相等於一瓶的分量，
一聽到已經好吸引我!!!
佢係氣墊粉底質感，
所以可以打造到輕薄透明及具光澤的妝容，
因為佢屬於CC霜，所以遮瑕度好好!

 

 

T.E.N. CREMOR AIR LIGHT BB 礦物輕柔BB修飾霜 SPF35 PA++ $208 / 40ml
佢主要成份有T.E.N. 金津礦物水、角鯊烷、 澳洲堅果籽油、
刺阿幹樹仁油乳油、 木果油、庫拉索蘆薈葉、蘭花、
玫瑰果、雷公根、寶城綠茶，
所以唔單止可以防止水份流失，令妝容更水潤的持久外，
佢總係一支集去皺、美白及調節膚色多重功效嘅BB霜!!

 

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup

 

各大品牌係1月已經出哂春妝啦!
今次收到嘅係Chanel出嘅春季彩妝product,
主題以跳躍的音符為主,以自然和諧嘅色調帶出女性嘅優雅感覺~
品牌選用左紫同桃粉紅色調代表生氣勃勃嘅春天!

 

我地仲收到一本非常精緻嘅product簡介書,
介紹非常詳盡嫁~

 

睇完內頁就等我地分享今次收到嘅產品啦!

 

OUDRE UNIVERSELLE COMPACTE #160 PREFACE $400
這盒粉餅顏色帶淡淡的桃粉紅色,
可以令打造光感底妝,又可以均衡臉部膚色,
令底妝細緻有光澤,就算皮膚比較乾都會有光澤感~
 

LE BLUSH CREME DE CHANEL #67 CHAMADE (上) #69 INTONATION (下) $340
CHANEL繼上季出過CRAME狀胭脂,今季又再出啦!
今次嘅顏色係好少出嘅SHARP色~
個人都幾偏愛CRAME狀胭脂,質地輕透自然,
用手指輕輕印上推開顏色,胭脂就好似自己皮膚散出咁自然紅潤,
而且上左面CREAME狀會變粉狀,唔會痴笠笠~

 

ILLUSION D’OMBRE #92 DIAPASON(右) #93 IMPULSION(左) $260
CRAME狀眼影帶左閃爍珠光令令地,
出黎效果好SOFT好易推,就算用手指上都OK,
而且隨包裝附送左支眼影掃,

 

呢支掃細細帶出街好方便，
我用左黎做唇掃，方便攜帶又易掃，一流嫁!

 

 

LUMIERE FACETTES #537 $510
今次嘅限量4色眼影選用左粉粉紫紫色調,四款眼影顏色自然飽滿,
可以打造出令人驚喜的眼妝!
我們可以用灰紫色打造雙眼立體感,
或者用閃爍珠光的紫褐色蓋上眼做出SMOKY EYES效果!
亦可用桃粉色輕印上眼打造自然眼妝,再利用帶金色珠光粒子的閃爍象牙白作HIGHLIGT,
包裝方面今次CHANEL揀左四方形設計,同以往圓拱形設計同烘焙製造略有不同,
質地非常好,顏色自然易推~
一盒眼影足以打造出唔同嘅眼妝!

LEVRES SCINTILLANTES #179 MURMURE (右) #164 PLAISIR (左) $245
這季的唇彩均是粉色系,顏色粉嫩但偏實色,唇彩閃亮光澤，
就算單用都好出色！

 

 

ROUGE ALLURE VELVET $260
分別#136淺桃紅、#138杏粉、#44桃紅、#45深紫
質感比較啞緻,但不乾,顏色出色!
粉色系可用於日常妝容,不同搽方法可以有不同感覺~
如做韓色的漸變唇，可以搽在唇中央，就可打造另一造型。
而紫紅色系比較時髦型格,適合晚妝妝容~
我最鐘意係#44個色,係今季嘅大熱色~
已經一早俾我收左係化妝袋啦~

 

ROUGE COCO #59 (右) #60 (左) $260
COCO這系列的唇膏比較保濕滋潤,屬於易塗抹的質地∼
而且顏色唔誇張,返工LOOK一流!

 

LE CRAYON LEVRES #70 $190
想要一個完美嘅笑容,一定要勾畫返雙唇嘅輪廓~
今次嘅唇線筆顏色都配合返今季唇色!

 

LE VERNIS #603 CHARIVARI (左) #605 TAPAGE (右) $190
最後點少得品牌HIT爆嘅甲油
今次嘅甲油顏色同今季彩妝系列，簡直係完美組合。

 

收到咁多咁靚嘅PRODUCT,我地當然要試俾大家睇啦!
今次會分別化日妝同轉晚妝~

 

 

先介紹日妝妝容,今次嘅妝會FOCUS係面唇,眼妝會比較淡,
色調都係用返桃粉紅,切合返春季系列的主題~

彩妝步驟

 

先用手指輕印上ILLUSION D’OMBRE #93 珠光粉紅CREAME狀眼影作打底HIGHLIGHT

 

再用ILLUSION D’OMBRE #92 深紫CREAME狀眼影勾畫眼線

 

BLEND返眼尾位置,掃上睫毛液即可

 

 

再利用手指印上LE BLUSH CREME DE CHANEL #67 CREAM BLUSH 推開
如果平時返工，呢個妝唔加唇膏都已經OK，
但如果有特別場合，就可人搽以下顏色嘅唇膏。

 

 

塗上ROUGE ALLURE VELVET #44 桃紅唇膏

 

化完日妝之後,今次會教大家轉妝化返個晚妝~

 

 

由於晚妝眼嘅部份比較深,
我地會用POUDRE UNIVERSELLE COMPACTE#160粉餅印淡面頰位置~

 

然後用手指印上ILLUSION D’OMBRE #92 深紫CREAME狀眼影做smoky eyes效果

 

係眼頭位置再加上珍珠白作HIGHLIGHT

 

再為上下眼睫毛掃上睫毛液

最後塗上ROUGE COCO #59唇膏即完成
本人就最鍾意呢款唇膏喇，
質地柔潤之餘又上色，真係非常滋潤，推薦！

 

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup

 

呢一兩年，都興返呢一款寬邊禮帽，
帶起上嚟非常有性格，但係有好多人都係買完返嚟擺，
因為都係同一個問題，就係唔識去襯，
又驚襯得唔好，會俾人笑。
不過唔駛怕，今次就為大家做一個簡單造型襯返呢款帽！

 

 

妝容解構

妝容會以藍色Cool tone eyeshadow為主，
令整個造型更加有型有格。

 

 

妝容步驟

 

 

 

 

1. 先在眉骨位掃上珠光色Highlight。
（建議產品：Maybelline Hyper Diamonds #BU-1)

 

 

2. 眼蓋掃上淺藍色眼影作主色。

 

 

3. 眼摺再掃上深藍色眼影。

 

 

 

 

4.用黑色Liquid eyeliner畫上眼線。
（建議產品：Maybelline Hyper Super Liner ＃BK)

 

 

5. 在眼線上方和下眼線以黑色眼影Blend開。

 

 

6. 掃上上下睫毛液

 

 

6. 掃上啡橙色胭脂。
（建議產品：Bobbi Brown Blush #10 Blushed）

 

 

7. 最後塗上鮮橙色唇膏
（建議產品：Paul & Joe Glossy Lip Color #05）

Check Point

 

 

好多時帶完帽後，臉型都會顯得好大，
有咩方法可以令面型修長啲，
就係可以選擇偏啡tone嘅胭脂，
由髮線打斜掃落臉頰，唔駛用陰影粉都可以有修容效果。

 

 

髮型解構

我哋會以三手辮，打造一個簡單俐落，
充滿歐洲風情嘅髮型。

 

 

Front

 

 

Left

 

 

Right

 

 

Back

準備步驟

 

1. 將所有頭髮夾捲。

 

 

2. 分成中間留海，右邊留海向外夾捲。

 

 

3. 同樣左邊留海都向外夾捲。

 

 

4. 將夾捲了的頭髮抓鬆。

 

 

5. 以Hair Spray定型

 

 

6. 將頭髮放向其中一邊， 編成鬢辮。

 

 

7. 用橡根固定。

 

 

8. 辮尾用髮夾收起、固定。

 

 

9. 帶上帽子，就可以了！

Check Point

 

想睇落條辮立體啲，就可以鬢辮時將兩邊稍稍拉鬆，
如果唔係條辮會顯得老土同好實，
做唔到蓬鬆、自然效果。

 

 

《冬天必備飾物篇（一）復古風禮帽》點擊瀏覽全文：
http://www.girlstalk.hk/blogs/?p=5493

 

 

《全方位之扮靚教學﹣ 帽子變“髮” (二）》點擊瀏覽全文：
http://www.girlstalk.hk/blogs/?p=5719

 

 

 

 

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup

 

我哋嚟緊每月都會介紹好用同唔好用嘅產品俾大家，
全部都係Workshop同事，掏錢出嚟買，
裡面唔一定係最新嘅產品，
但肯定係經過長年累月試用完先分享俾大家，
不過以下都只係我哋自己嘅個人感受，未必代表全部架，
所以大家都係需要做多啲搜集資料，先選擇買唔買啦！

 

 

 

 

Kesalan Patharan 魔法煥采遮瑕膏今次同大家分享下我覺得好用嘅化妝產品，
第一樣就係KP嘅雙色遮瑕液，
佢2枝雖然細細枝，但可以用好耐！
因為隨住年齡嘅增加，皮膚就變得好乾，
眼圈變黑，眼紋一樣增加，
所以我對遮瑕用品越嚟越有要求。
太乾嘅遮瑕膏我早已OUT走晒！
唯獨淨番呢兩枝仍舊係我化妝袋內，
因為佢係液狀質地，所以好易上眼同好易推開，
唯一一樣就係調色方面比較難小小，
（當然對有化妝底子嘅我就無問題啦！但對新手嚟講真係有小小難度。）
但如果識得調色嘅人就會好鍾意！
因為可以調唔同顏色遮到面上唔同部位嘅瑕疵。
大家有興趣嘅都可以去試下呀！

 

 

 

 

Embryolisse 保濕霜

個妝貼唔貼、持唔持久，就要睇下你個底化得好唔好，
搵一支好嘅base，都幾難架，好用得嚟又要平，
而我今次就為大家介紹一支又抵又好用嘅base！
本身佢係一支保濕霜，但好多化妝師都將佢當作base，
因為貪佢夠哂潤，佢係白色cream狀質地，有少少香味，
佢非常易推、好易吸收同好滑，一啲都唔厚身架，
用完佢打底，之後再上粉底真係貼好多，特別而家天氣用。

 

 

而呢支base係一個法國牌子，我買呢款係for all skin type，
佢仲有一支綠色嘅版本，佢就再潤身啲，啱乾性同極乾性嘅皮膚，
一支有75ml，都算幾多容量，而且價錢就200蚊有找，真係幾抵用，
開封之後可以用12個月，而且每支都刻咗期限日期，
真係好體貼！大家可以去啲水貨店就搵到佢架喇！

 

 

 

 

Urban Decay Naked eyeshadow

作為一個愛化妝的人一定少不免儲好多化妝品，
今次為大家介紹的好物就係外國品牌，Urban Decay Naked 眼影！
試過有啲啞色眼影都比較難推，好易變咗一撻撻，
但呢盒眼影絕對無呢個問題，
只要輕輕印上便能做出很美的漸層效果但又唔會過份誇張！

 

 

佢以大地色為主，一盒足夠化多個不同彩妝，眼影顏色有閃底，
無論自用或者化妝師都非常啱用，化靚女、新娘妝都得，
而且佢包裝細小，方便帶去outjob。
價錢都好實惠架，計返港幣大約4﹣500蚊，而一盒有12隻，
除開都好抵用，裡面仲隨盒附送一支眼影掃添！

 

不過可惜暫時香港無得買，而且香港出面有好多假貨，
所以如果想買就最好係官網購買喇！

 

 

 

 

HANAKA 凍亮掃黑面膜

分享咗好用嘅產品當然都要分享一下有啲買咗番嚟令我失望嘅產品，
當初買佢嘅原因係因為佢寫可以幫助頑固粉刺浮出！
加上有好多人都讚佢好好用，就買嚟試下，
但我已經用過七次到，依舊唔覺有咁嘅效果。
只係塗係面上真係有啲涼涼地嘅感覺，其實都幾舒服，
個人認為佢舒緩效果OK，
但佢標籤上寫嘅可以去除老廢角質同清潔嫩白嘅效果就真係唔覺有！
所以買咗佢用完之後真係同佢盒上個個樣差唔多，
令我覺得失望呀！

 

 

 

 

ISQUEEN Acne Night Waterpack

相信大家都有用過sleeping mask啦，大部分都唔錯，
不過唔係所有sleeping mask都好用啦，
而呢一款就係我好耐之前買落嘅sleeping mask，
買佢原因，就係貪佢平，大概100蚊多啲，
而且當時塊面突然生好多暗瘡留落幾多印，
佢主要功能就係去印同俾暗瘡皮膚用，
第一次佢都覺得幾保濕，
但用多兩、三次，就發覺敷落皮膚開始有啲拮拮地，
初頭以為自己皮膚太乾啦啦，但之後過咗成5，6分鐘都仲係咁，
敷完雖然無紅無痕，但我之後都將佢打咗落冷宮。
因為敷完又無咩效果，而且本身個mask係好香，
裡面成分應該有好多香料，所以敏感皮膚更加唔啱用。

 

 

 

Essential 豐盈滋潤系列—高純度蜂蜜護髮膜

 

初時比佢嘅包裝吸引，而且有”高純度蜂蜜”呢啲字眼，
感覺一定好滋潤，因為通常護膚品或者面膜有蜂蜜成份都會好潤，
嗰排頭髮好乾，想試下喺屋企做啲簡單treatment,
諗住呢種hair mask夠晒方便，好似護髮素咁用就可以，
而且價錢又唔貴，大概六十幾蚊，
啱啱過水嘅時候真係幾滑，但再洗乾淨之後就打回原形，
啲頭髮 “啜”住晒，仲有打 ‘kick’情況出現，
第一次用完之後，都有諗過可能係份量落得唔夠或者時間太短，
未吸收到營養，所以冇乜效果，
但係再試第二次結果都一樣令人失望，
淨係用護髮素嘅效果仲好。

 

 

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup