中六(6A班): 全新生活
1. 班相回顧
嘩!我又要讚啦，不過今次係讚Miss Ma，靚呀!大家望吓阿彭，真係勁似出面社團坐館嗰啲大佬樣，不過呢，搵勻都少緊個人，Sally呢?唔見咗嘅，佢好似嗰日冇返，係咪?
2. 我愛Campus TV
呢個我諗大家都聽過，我真係好鍾意拍片、拍片、拍片，亦都因為咁，孫老師就推介我入咗CTV啦。一開始入到去，其實邊個都唔識，又唔知佢哋開會講乜，唔知運作係點，又唔知導師係邊個，只係知道自己嘅工作係攝影，後來知道Calbee係導師之後，先開始知道發生緊咩事，開始有目標去做嘢。不過CTV嘅工作都幾繁複，事前要準備、要採排、要整道具，真係花好多時間，如果將CTV嘅工作規模乘返10倍，根本上同出面電視台係冇分別。
入到去，知道自己係Team A的，但好得意喎，有部份成員嘅名都係雙字，好似有波波(我仲記得上次同佢笑到傻咗)、蚊蚊(認識佢之時係佢最唔開心之時，有一個月係晚晚都要SMS安慰)、柵柵(最斯文的那位)等等，由於佢哋個個都係細過我，所以佢哋會叫我做「大哥」(聽講係孫老師叫比佢哋聽先)，有呢個稱呼都唔知係開心定唔開心，知道呢個名嘅由來嘅人都會知咩事，但之後叫叫吓，我都慣咗lu~，不過最令我怕醜嘅事，就係我每次一落去，就會聽到四方八面傳過嚟嘅「大哥」、「大哥」、「大哥」……有時嚟唔切反應，所以有啲人叫我，我都聽唔到= =不過都幾開心，一落到去就好似大明星咁，但其實我好低調。
入咗CTV一段時間之後，我哋嘅表現都獲得唔少老師嘅讚賞，話我哋嘅表現比以往都有好大進步，相信呢個係靠大家一齊努力嘅成果。跟住，我仲要自己做埋演員添，真係勁緊張，跟住採排表現又差，仲比個別成員埋怨我點解搞咁耐都未走得，其間我試過想放棄唔做、想喊，因為我係咁唒大家時間，係咁「安哥」好多次，最後，因為太夜，我唯有返屋企繼續，第二日，都預咗自己會有甩甩漏漏，點知，唱歌跳舞一即過搞掂，在場工作人員拍唒手掌，嗰一刻，我真係好開心，雖然自己都唔知喺度唱「嗶嗶嗶」做乜，但佢哋咁樣嘅鼓勵我真係今生今世都唔能夠忘記，多謝你哋，嗰日我仲記得，一完咗直播，關Sir即刻走埋嚟，比咗10個讚我，我上到課室，我仲以為冇人會睇CTV，但係我一上到去，全班又拍手(希望唔係有人事先要求咁做)，大家都話睇到我另外一面，唔知我可以咁爆，其實我自己都估唔到自己可以咁爆，不過點都要多謝6A+CTV!
去到CTV，有個只係細我一年，係低我一form嘅Team B成員，人稱「導演」嘅細浩，佢做事認真、仔細，好比心機去做好每一場直播，統領整個Team B嘅運作，但係佢就咩都鍾意講一餐，無論學術、交通、食飯等等，都可以有無窮無盡嘅Elaborations，再加Examples、Reasons、Explanations，雖然有時真係聽到厭，所以我會以「嗯」、「哦」、「係」等單字回應，如果我真係忍受唔到，就會Stop佢，不過識到佢都好，見面唔洗怕無嘢講，所以都OK!仲有其他都熟嘅成員，例如洪靜雯(根本完全男仔性格)、阿琳(唔好成日對自己冇信心啦)、杜杜(杜杜鳥?)、春曉、曉潔(根本上呢對孖女我已經當係一個人)、Mi仔(女仔嚟嫁)、揶子等等，但太多回憶，不能盡錄!
仲有一個人我一定要專題咁講，佢就係Team B 導師Simon，唔知想同佢玩定係做咩啦，我成日都大大聲對住佢講:「你好靚仔呀!!!!!!!!!!!」，佢聽完就會即場扮吐血樣(可能佢真係接受唔到)，不過佢真係好玩得嫁，我成日偷咗佢啲零食佢都唔知，因為佢實在太多零食啦。
3. A-Level唔係人讀
曾經有人講過A-Level係呢個世界上最難考嘅公開考試，原來係真嫁，一開始上到中六真係唔慣，好多嘢都好似重新學過咁，測驗成績又差喎，尤其是Econ、Geogra，真係考親試都唔合格，對於一個成績一向係中上嘅學生嚟講，真係完全接受唔到，曾經有諗過放棄唔讀，但邊有得唔讀呀，唯有硬住頭皮頂硬上，雖然成績都係差，但至少我有努力過。但重點都係高考根本唔係人去考。
4. 全班考第尾
如果你考第尾，你會點?雖然話唔同科唔可以咁樣比較，但我而家話比你聽你考第尾，你會心平氣和咁接受咩?會考時代我名次都係中上，無啦啦一下子就去到最尾，你叫我點接受?所以嗰日見完家長，返到屋企，我將所有書Dump唒落地下，喊喊喊，直至有人打電話嚟安慰我，我先好少少，嗰日就好似個天跌咗落地咁，成日都唔想見人，一講起就想喊，我承認我嗰兩科ALs真係好難讀，分數唔高就可以有高Grade，但第尾對我嚟講，即係最廢，根本好難正面咁諗。自嗰日之後，我唯有化悲憤為力量，但其實都化唔到幾多，爭取佳績，亦都因為咁，我有好大嘅心理準備我係入唔到大學。
5. 電腦學會
大家知我邊個教電腦嗎?話說佢搞咗個唔知咩PhotoImpact教學班比人參加，嗰時真係唔想搞，但佢要搞都冇計，我都要教人嫁，唔係點?不過就比我喺呢個教學班識咗Yau Ka Ling同埋Man Tze Sum，佢哋兩個一個Kai一個傻，但份人又幾真。不過我仲好記得Man Tze Sum上次唱K甩鞋呀，笑死我呀!!!!!!!
6. Facebook電腦堂
可能佢年紀都有咁上吓，所以睇唔到我哋上堂玩Facebook，亦都可能佢以為我哋好尊心，佢一講嘢我哋就望住個Mon，喺冇人望住佢嘅情況下，佢都可以繼續講書唔話我哋，應該係做老師嘅最高境界，無人能及。但最後我哋都係好開心咁同佢影相，仲知道佢原來係某外國大學畢業的，勁!如果佢可以教埋通識、中史就好啦!講完!
7. 18歲生日
唔係想唒命，18歲係我收得最多禮物嘅一次，比人重視嗰種感覺真係好滿足!但係呢，18歲，係代表住自己已經成年，但唔知點解，我從來都唔覺得自己係成年人，或者，我真係唔想做成年人，想繼續做細路。18歲，咩都做得，入戲院睇三級片，簽咩都唔洗家長，又有$6000，真係好正!但人到咗18歲，就會多好嘢顧慮，雖然嗰時未讀完書，但我都喺度諗，我幾時會剪返好髮型，形象改造一下，脫離學生樣呢?我幾時可以買得起香港啲樓?我幾時有自己部車?我幾時有女朋友?等等等等，但我知道，我嗰時最緊要嘅都係讀書，根本冇時間去理呢啲嘢，所以我思想上仍然係變返17歲，繼續過我認為理想嘅生活。
8. 歌唱比賽
之前講過話我鍾意唱歌，所以喺又呃又氹又比人迫嘅情況下，我參加咗團體組嘅歌唱比賽。嗰次經歷真係好深刻，因為第一次上台，仲要唱歌，係唱《少年》，唱嗰陣真係覺自己唱得唔好，但唱完後，竟然聽到嘅嘢係:「真心!好聽!」、「估唔到你識唱歌!」、「真心覺得你好聽!啲高音!」，根據Sally講我聽話文傑喺我唱緊嗰陣:「下!點解牛麵唱歌咁好聽嫁?!下!下!下!」，都係啦，我唔係想唒命，雖然最後都係入唔到決賽，但係被受肯定嘅嗰種感覺，真係好好好開心，所以我已經覺得我攞咗獎!而家終於明白點解歌手攞獎會喊唒口咁多謝人!
9. 曾文傑:「垃圾!廢柴!」
其實中五都未開始同文傑熟，可能地理班得兩個男仔，又一組，可以開始認識呢個人，唔知點解，我識得嘅朋友，有好多都係雙面刃，有時你覺得佢好好，有時你覺得佢好衰(可能其實個個識朋友都係咁)。不過呢，我都唔知係咪前世得罪佢，差唔多每次佢都話我:「垃圾!廢柴!」，一開始聽到真心嬲佢，唔明點解佢要咁話我，有冇搞錯，我都有尊嚴嫁!但真係冇計，唔通我真係嬲佢、鬧返佢咩，咪自己激氣，所以算啦，我唯有比佢鬧。但時間耐咗，都已經習慣咗佢咁講，可能佢真係當我朋友先夠膽咁樣話我，如果佢有一日突然陰聲細氣咁同我講嘢，我更加唔慣。至於佢有咩好，就係多嘢講囉，根本上冇嘢唔講得嫁，每次講嘢都會笑，最緊要係笑!仲有呢，有時佢都幾可愛(夠啦，唔好再講，頂唔順!)
10. 智障家庭
唔知幾時，我哋班嘅人好鍾意話人智障，唔知係咪十人幫傳出嚟嘅呢?但事實無可否認，我哋班部份同學真係智障，例如Sally(我覺得佢應該係最智障)、趙家J、Creamy、街坊。上中文堂，成日傻笑嗰三位，但亦都係氹得柯老師最開心嗰三位，亦都係佢哋，令到我哋中文堂咁開心，如果冇咗佢哋，我諗我哋中文堂個個瞓唒覺。至於我有冇加入呢個智障家庭?當然……冇啦!仲洗問?
11. 問世間情是何物?
係呀!又係情史呀!點先!又幾多個呀?3個!但我想講，由中六開始，我嘅愛情只係可以去到有Feel呢個程度，因為情傷實在太恐怖，我已經唔敢成個人沉醉於愛情，抱住希望越大，失望越大嘅心態，從而限制自己嘅行為，減少傷害，但我再強調，我絕對唔係花心，數目多唔一定係唔專一，因為我對每一段嘅感情都係認真!亦都因為咁，我開始思考，既然都係失敗，我點解要花時間同心機喺愛情度?
第一個，低Form的，但唔該唔係你哋成日傳嚟傳去嗰啲呀大佬，唔好再屈我!無意中產生嘅感覺，都係追唔到，又係自己嘅天真無知，唉!
第二個，又係低Form的，呢個唔會有人知，所以我可以講得詳細啲，點識當然唔講得啦，但我想講佢幾靚女，如果有人同你講: 我擇偶條件係唔睇樣嘅，嗰個一定係呃人，邊有可能會唔睇?第一次見面就比佢串，而且仲好見談(大家可能已經可以總結到我嘅擇偶條件係乜嘢啦)，有次嘅適當時機，我表白，但佢大驚+抗拒(頂又失敗)，之後我用屎橋，話我昆你咋，同你講笑玩吓你咋，咁你都信，所以佢應該永世都唔知!
第三個，自己班，有人都知嫁啦(拿我講過唔準講嫁，比我知道傳咗出去我就打死佢)，但最後原來佢只當我係普通朋友，但唔知點解成日我一望佢，大家會對住大家笑(我自己心理作用?係掛?)
中七(7A班): 最後，也是最滿足
1. 班相回顧
冇咩特別，大家都好正常、好成熟，唯一想講嘅係Magic手勢，Magic!!!
2. 2NE1
呢個就勁囉，話說暑假喺ChiLam個Wall度聽咗首韓文歌，雖然唱乜真係唔知，但就比首歌嘅旋律吸引咗，真係好聽，自此之後，我就開始留意2NE1嘅歌同埋Live Performance，跟住ChiLam就發現咗我同佢有相同興趣好開心啦，不過我都係啱啱先留意，起初連佢哋4個邊個打邊個都分唔到，所以一定要ChiLam嚟緊嘅日子洗我腦啦!
講起ChiLam，其實佢有啲可愛Feel(睇返佢啲相就知)，我有幾次試過無啦啦無聊對住佢講:「你好大嚿呀!」，佢嘅反應係好無奈跟住就會扮喊，然後我就會覺得好好笑，有時佢仲會走埋嚟一路扮喊一路打我，所以話ChiLam真係好可愛。
3. Form 7=7/F!
嘩，講起都唔知想點，我哋中六班房係2樓，但係中七呢，就跳5級，去到7樓，真係中七就係七樓。但係我想講，日日咁上法，唔腳斷都難。所以如果有早會，我哋緊係唔會咁傻上咗課室然後又落返嚟啦，我哋就會一返到學校就去小食部坐，亦都因為咁，我哋會有咁遲得遲先返到，日日咁行法，已經當做咗運動，基本上無咩事都唔會落去，我哋就好似同低層脫節咁，冇人理我哋，但時不時都會有Prefect嚟收電話，真係好討厭。
4. MaMa的BB
Miss Ma生咗個好可愛嘅BB，有次旅行仲帶佢嚟海洋公園玩添，好可愛呀!有一日我上Facebook，見到Miss Ma上載咗一段片，片入面都唔知BB笑咩，但佢一笑我就跟住笑，因為BB嘅笑聲真係悅耳。唔知佢喺Miss Ma個肚嗰陣，陪我哋上堂有冇學到好多英文呢?
5. 終極花生王
花生，係攞嚟食嘅，所謂食花生，以我哋班嘅定義就係一堆人坐埋一齊，然後聽一個人係咁講第二啲人嘅事情，大家聽咗之後可能覺得好爆，或者好正，總之就係有種享受嘅感覺，就好似一路睇戲一路食花生一樣，成個過程就叫做「食花生」，至於粒花生係幾大，就要睇「派花生」嗰位講嘅嘢爆唔爆。講咗咁耐，其實我都係想揭曉我哋班嘅花生大姐，佢就係樹彤啦!
由中四開始已經聽佢啲花生，有啲真係嚇死人，仲勁過我呢篇Blog啲嘢，而我某啲往事都可能成為佢嘅其中幾粒花生，想知佢啲花生有幾好食，聚舊嗰時就記得搵埋佢啦，我保證佢每一粒花生都好好食。唔知大家食花生嘅時候，有冇即時諗起佢呢?
以下係佢要我寫嫁，如果有人識得低Form的同學仔或你有細佬妹，請介紹樹彤幫佢補習，佢咁勁一定可以幫同學攞到佳績，宣傳完畢!
6. 九展返工
呢一樣嘢就真係要多謝肥蟲啦，就係佢介紹我哋去九展做帶位呢份Part-time，我哋中七頭段做咗一陣，但因為要高考，所以冇做Lu~。其實大大細細嘅Show都會喺九展搞，大Show固然睇得開心，但細Show都唔知係咩歌手嚟，啲歌又唔識喎。不過做得ok啦，唔算話好辛苦，雖然人工唔高，但總算自己識得搵錢。最記得有一次就係帶錯位，可能自己太緊張啦，兩個女人嚟嘅，一開始緊係好自然跟住我行啦，點知我行行吓發覺唔對路，應該唔係行呢面嫁喎，跟住就好魚咁同佢哋講:「唔好意思呀，應該係呢邊!」，佢哋即時黑唒面，有個仲「著」咗一聲，心諗: 大佬，我都唔想嫁，一時記錯姐，唔洗咁呀?好彩有人陪我，如果唔係我都唔會做，因為我最憎自己一個人。
7. 傑宜弄虛作假
我成日都比人玩，玩玩玩。相信大家都會記得，文傑同樹宜有一日無啦啦喺Facebook in relationship，我真係死都唔信唔信唔信，邊有可能?第二日佢哋Post相出嚟我都唔信唔信，但佢哋都唔知做乜，係咁說服我叫我信，咁我緊係點都唔信啦，信嗰個真係膠(嗰時真係有人信)。好啦，咁我就扮到半信半疑咁回應佢哋，點知仲比佢哋玩返轉頭，仲差啲同文傑嗌交添。到咗佢哋「分手」，咁我咪扮到安慰佢哋咁囉，點知佢哋又真係以為我信咗，唉，玩嚟玩嚟去，我真係冇咁得閒同佢哋玩，總之一句講唒:「我由一開始到而家都冇信過!」唔好以為我次次都咁膠，你講我就信，你信唔信?自己諗啦!
8. 地理去過幾多次Camps?
由中六到中七，我已經唔記得去咗幾多次地理Camps了。有時真係唔想去，但講真嗰句，每一次都係咁好玩，最記得嘅就係有一次，我哋深夜要行墳場隔離嗰條路，我同文傑一齊行，真心驚囉，周圍都係黑色的，終於知道咩叫伸手不見五指嘅感覺。雖然我哋有電筒，但我相信只可以照到前面兩米以內嘅路，有次仲差啲轉彎走咗入去墳場，文傑就攞住個電筒係咁照中咗人哋啲「大頭相」，照中之後仲話:「哎呀~Sorry喎~」我記得我仲一路拍片一路行，但睇返段片，可能太黑啦，咩都影唔到，成個畫面黑色的，只係見到少少電筒嘅光，同埋我同文傑嘅對話，就咩都冇。呢次咁嘅經歷真係體會到原來墳場真係咁恐怖，雖然係短短幾分鐘，但我都可以驚成咁，證明我係無咩膽量，如果我自己一個人行，肯定驚到瀨尿。
9. 大佬!
哈，我哋班嘅大佬，我都唔知得罪過佢幾多次。不過點都好，我都要再講聲:「Sorry，大佬!你啱唒!」對阿彭嘅印象其實由中一開始已經好深刻，嘩!佢嗰時行得幾型呀，擺吓擺吓咁，見到都調頭走，Form 1已經成個黑社會大佬咁，我嗰時真係以為佢係黑幫大佬嚟嫁，但佢成個人好有殺氣就真嘅。中六同佢一班，發現佢好善良(不過鍾意講粗口)，仲係一個才子嚟，聽講佢中史好勁，跟住中文又有佳作喎，勁呀!仲有，上次攞走佢張櫈，佢都冇打我，好人!又有一次，我走過去佢嗰邊，諗住同佢吹吓水啦(我發覺佢每個午息都喺度發呆)，咁我咪問佢:「你冇嘢做嫁，成日坐喺度Hea嘅?」，佢話:「冇呀!冇嘢做呀!」，跟住唔知點，佢無啦啦話肥君扮愛美神發彈，阿彭仲要做埋動作有埋聲，仲要勁誇，真係笑到我趴街呀!!!!!阿彭最勁嘅金句都係:「我咩你個咩!」
不過呢，我都係鍾意喺Facebook挑戰佢嘅權威，佢每次都會好威咁駁返我轉頭，仲有好恐怖嘅懲罰，唔比你做大佬都唔得啦，大佬!你係得嘅!
10. Anthony
我實在冇得唔講你，去到中七中段，真係好多謝好多謝你介紹咗我補Econ嘅Cliff Yeung，認真，如果冇佢，我諗我Econ一定會肥得好慘烈。我都知你係一個與別不同嘅人，好處在於處處提醒人要點要點，有時都幾討厭，但諗深一層，其實你咁講都有你嘅道理，都行得通。不過我都係勸你改改啲壞習慣啦，例如食完嘢，你有時會無啦啦大大聲打咯，仲要大聲到全世界都聽到，唔可以咁嫁，要掩住個口，不過你咁大聲真係好好笑，希望你唔介意我爆咗你啲缺點出嚟啦!
11. 樂樂
樂樂樂樂樂樂樂樂樂樂樂樂樂樂樂樂樂樂!我諗我中七後段先同你熟，起初唔識你，以為你同彭雞佢哋都係咁玩得，點知原來唔係，你係一個好易喊的小女孩，所以而家講你嘅文筆都要德體啲。我仲記得你喺紀念冊度話我其實好可愛，嘩!真的不能接受，我點會係可愛先，你可愛就真!但我都好欣賞你對每個人嘅真誠，相信你人緣一定好好，我唔係作嘢嫁，雖然我講到好似好行咁，但每句說話都係出自真心!
12. 高考
經歷過會考，都會知道會考嗰時有幾辛苦，但係會考過後，接住落嚟就係更加辛苦嘅高考，亦都因為之前咁多次嘅唔合格，慢慢改進，到咗中七後段，我終於踏上軌道，成績開始變得穩定，測驗開始有把握，雖然唔知算唔算太遲，但總算有個心理準備去考高考，到咗高考嗰陣，我真係有返嗰時會考充滿信心嘅嗰種狀態，話我係擾敵又好比壓力大家又好，總算心理上安穩咗先，所以無論你哋點踐踏我點鬧我，我情緒都係咁澎湃，不過呢種心情可能只可以去到放榜嗰日，不過點都好啦，自大總好過自卑，無論結果係點，我都會積極面對，大家都要加油!
13. 比返紀念冊我呀!
專登喺度提人好似好無聊咁，但請未比返紀念冊我的要快啲比返我呀，你都唔想我本嘢入面冇你喺度嫁?係咪?
14. 友誼第四度挑戰
其實已經開始懷疑自己係咪社交能力有問題，對於友誼嘅挑戰，已經去到第4次，究竟我係咪真係有問題，還是只係一種正常現象，每個人都會經歷?有冇人可以講我聽?但點都好啦，今次又係我親手損害呢段「友誼」的，邊個?唔講啦，總之就係我講咗一啲唔應該講嘅說話，做咗一啲唔應該做嘅事。而家雖然我同佢冇事，但佢同我啲Friends應該仲係有段裂痕，唉，好對唔住!
15. 傳聞中的愛情
傳來傳去、傳來傳去、傳來傳去，都唔知邊度傳出嚟，好彩當時人唔介意，加上我又唔介意咋，所以算啦，咪有得你哋傳啦，還掂都唔係真嘅，yay~不過講真啦，中七係對某人有Feel，應該係考Mock之後，不過!!唔維持得好耐，為免損害關係，我係唔會同佢講嫁，但一定唔係你哋講嗰個囉，OK?唔好再屈人啦，試過比人嚴刑迫供，最後都係講咗，不過只係得一個人知，我信佢唔會講，所以大家唔洗問。至於點解有感覺，其實真係冇咩嫁，真係有感覺咗唔耐亦都唔深，所以我根本唔當係有Feel，情況就類似:「如果比A、B、C女仔比你揀，你會揀邊個?」呢種情況，你話啦，咁樣係咪叫有Feel?明就明，唔明就算啦，只能說我們只是普通朋友關係，加上我已經冇感覺(因為一開始就冇咩感覺，有Feel嗰種感覺絕對唔係咁)，所以唔洗問我同佢有咩經歷，因為根本就冇咩，我亦都唔係好了解人哋。好啦，到最尾都講句，唔好成班人喺度屈我，真心唔好!
嚟緊好想達成嘅願望
- 升到理想大學，讀到自己想讀嘅科
- 搵返個女朋友(可能我要45°角)
- 在唱歌方面得到肯定
- 入職電影公司/電視台攝影師/導演或相關工作
- 有穩定收入
- 有穩定工作時間
- 有時間做返工以外嘅嘢
- 有樓(中級住宅就夠)
- 有車(普普通通見得人就夠)
- 整兩隻DVD碟(一隻係For 4A+5A，一隻係For 6A+7A)
- 換智能電話(首選大Mon機)
- 換電腦(我部電腦用咗8年)
- 買手提電腦(一直都想擁有)
- 換高清電視(高清推行咗咁耐，我屋企一直未換，強烈建議政府資助及盡快關閉模擬訊號)
- 入職電腦相關行業(if攝影搵唔到食)
- 剪返個靚仔髮型(我咁嘅髮型有邊個會鍾意?)
- 練大隻啲，唔好咁瘦(我真係好瘦，起碼比返個適中身材我先啦)
- 買過一部新的、大容量的外置Harddisk，我兩個320GB嘅外置Harddisk已經爆了
- 換返一個啱度數同埋靚仔嘅眼鏡
- 買部高清錄影機
- 買部大機
- 買部防水錄影/相機
- 改善自己性格(衝動、易嬲、自我中心、堅持、固執)
總結: 我就是我，你認識我嗎?
話咁快就完咗中學生活，唔捨得一定有，但我始終覺得有啲嘢唔留好過留，所以自己都學識咗取捨。如果我要總結我中學嘅生活，一定唔可以單靠呢篇Blog，而係靠大家嘅回憶。無論係開心嘅回憶都好、唔開心又好，我都要多謝呢7年內同我相處過嘅人，你哋令到牛麵成長、令到牛麵開心、令到牛麵改變……，成日都有呢種比喻，人生就係坐過山車一樣，有時你會升到好高，因為嗰段時間你係最開心，但開心過後，就會直衝落去，嗰時應該係最驚、最有挑戰性，但跟住又係開心，或者我係更極端的，就係不斷連環360°轉圈，開心同唔開心嘅時間都好短。不過，我所注重的，並唔係結果，而係過程，今日你所得到嘅嘢同埋當日你所失去嘅嘢都只係一個象徵，重要嘅係每一樣嘢為你帶嚟咩啟示，從而令自己去改變，當然，人總會有一定嘅堅持，誓要將你唔想要嘅嘢帶走、誓要將你想要嘅嘢攞到，最緊要係對結果唔後悔、對過程有反思。人係自私嘅動物，呢個係真嘅，不過只係睇你有幾自私，只要自私到某一個程度，自私仍然係可以接受的。所以，我打呢篇Blog出嚟，可能都已經得罪咗唔少人，呢點我知道，但係，如果從第二個角度睇，其實呢啲往事都係值得去回味，如果大家可以放下自己成見，以「回憶往事」嘅心態閱讀，大家一定會開心啲。最後，都係想講句，中學生活令我改變咗好多。
我都知道大家都係喺網上認識我多於喺學校認識我，可能同我少講嘢有關，不過我想講嘅就係我寧願你喺日常生活中認識我多過喺網上認識我好啲，因為網絡世界真係咁奇妙，你睇唔到表情、語氣、神態，就算加咗表情符號，都唔可以當係真，加上都係鍵盤上面嘅掣，其實同文字冇分別，所以好多時，我喺網上嘅一言一語，都會令到人誤會，甚至最後比人插返轉頭，不過無論如何，我都唔明點解可以誤會我的意思，但當我誤會人哋意思嘅時候，人哋又覺得點解我可以誤會，哈!所以講到最尾，其實邊有話你錯定我錯吖，只係大家觀點與角度的不同，即是說我覺得冇嘢、但你覺得有嘢，或者係我覺得有嘢、但你覺得冇嘢，其實一直爭辯下去都唔會有結果，不過，最重要就係知道對方點諗、同埋知道自己點解要咁做，亦都要令對方知道你點解要咁做(但通常呢點都好難做得到，因為你就係你、我就係我)。當然，如果對方係惡意的，咁大可以無須理會，因為對方根本冇將你放在心內，但如果對方唔係惡意，又或屬無心之失，那就算吧!只要對方知道你咁做係會令到自己唔開心、同對方講返就夠，相信對方都會大方地收回言論，喺下次發表時多加小心。講咗咁耐，其實呢啲都係我固執、堅持的性格，請大家不要見怪。但係我想強調一點，例如我發一言論，令到對方不快，在禮儀上我道歉是應該的，但如果屬無心之失，就一定要對方清楚自己係冇惡意先，因為你唔講對方真係會認為你係有意，之後再道歉，情況就好似你唔小心踩咗對方一腳一樣，你要令對方知道自己不是故意，再加道歉，已經OK!
我性格就係堅持己見，我不嬲都認，但堅持不代表唔聽其他人意見，加上適當嘅堅持係有正面作用，呢樣嘢都係我喺網上同人相處嘅一種弊病。曾經有人叫我收歛一下喺網上的行為，我都覺得好奇怪，我又冇惡意、又唔係想鬧邊個，只係想發洩一下，有時可能只係講吓，又或者認真咁問吓，有咩問題?但我知道，網上的言論任何人都睇得，我可能會無意中得罪人，就算你係好冇惡意又好，乜都好，你講的可能係一個意思，但人哋接收的可能係第二個意思，發言者不知讀者在憤怒，這也是非常危險的，但就不能因為你的誤會而去怪責我(都講咗對錯係冇咁分明)，歸根究底，其實都係網上言論冇任何表情、語氣、神態，從而令人誤會，你問我會唔會限制自己言論小心啲講嘢?不如我問吓你會唔會理解清楚先嚟憤怒啦~當然，呢種係一個學習，係一個互相了解嘅過程，意思不合在所難免，我仍然相信，適當嘅磨擦可以增進大家嘅關係，因為已經更了解對方或自己，知道邊啲嘢唔講得，邊啲嘢講得，咁點樣分得出?自己之後反省咪知囉!
有人話:「咁你咁講即係唔認錯啦?!」傻啦，我緊係認啦，以上都係我嘅諗法姐，邊有話啱定錯，都話只係觀點與角度的問題，冇得爭辯嫁，我認錯，但我唔係錯在我喺網上發言呢種行為，而係錯在令對方誤會。喺經濟學的角度嚟講，其實我呢種行為已經係Efficient，雖然我要Bear好大嘅Loss，但我認為我唔咁做嘅Cost將會更大，如果我唔發洩的話，我驚我會抑鬱(認真)，所以其實我一直都喺到Constrained Maximization緊，在局限下爭取最大利益。一早講咗Econ.其實係一門人類哲學，但都係唔明點解我誤會人，對方又係話我錯，其實你都可能係無心之失姐?
好啦，好似講多咗(拿!我有限制自己唔再講嫁)，上面的我預咗又有人理解錯誤嫁啦，咁就等我用幾句講唒我想講咩啦，相信睇完呢幾句就會明我嘅意思嫁啦，聽住啦喎: 網上言論不能作準，不能完全代表我的態度，我真的沒有惡意(最緊要我係冇惡意，有時仲係認真)，如果令到大家誤會，我願意作出一切誠意道歉方案，但我會知道下次不要再犯同樣錯誤。(睇多3次啦!)
好啦，講完性格之後，係時候講吓我屋企人啦，真係要感謝屋企人喺會考高考嘅照顧，有時會覺得佢哋好煩，有時仲會諗住離家出走，唔想要呢個屋企，但諗深一層，其實為人父母嘅都係想自己仔女好，雖然有時佢哋發嬲嘅行為已經蓋過佢哋呢種想法(正常佢哋鬧我都係想出氣，都唔會真正為我好)。但點都好啦，都知道佢哋係擔心我嫁啦，放心啦，我講過會還唒所有補習錢比你哋。
由中一睇到中七嘅fans，都應該知道我友誼係傷得比愛情重得多。有時諗返起，我都會問，點解我成日都有呢啲問題呢?講到尾，每次都係同網上有關，所以我日常面對面的溝通係冇問題，所有嘢都係源自網上文化。
曾經有人同我講過:「如果朋友因為你一時嘅過失而同你絕交，嗰啲唔會係真心朋友。」
我再問:「如果我係犯咗一啲好嚴重嘅過失呢?」
佢話:「就算幾嚴重，去到殺死人放火死人都好，再真心的都會原諒你!」
我問:「嘩!如果佢殺咗我最愛嘅人，你叫我點原諒呀?!」
佢話:「呢個係時間問題，如果真係真心，最尾都會寬恕你，免你一罪!因為人到咗某一刻，都會視你嘅過失係過眼雲煙，佢一世嬲你都唔會有意思，自己又唔會有好處/壞處，所以佢唔係原諒你嘅錯誤，而係因為你係佢真心朋友而原諒你!」
我話:「哦，咁我都明嘅，咁如果佢真係點都唔原諒我呢?」
佢話:「咁你自己就要諗吓啦，你自己得罪咗人都唔知，你要反省吓，人哋而家唔理你都係你抵死，你而家Say 100次Sorry都冇用，不過時間可以證明一切，如果你喺佢心目中係好重要嘅，佢點都會同你做返好朋友，但如果唔得，咁你都死心吧啦，因為人哋可能由一開始都冇當你係真心朋友，正如愛情一樣，嗰個人由始至終都冇真心愛過你。」
我話:「咁我可以點?」
佢話:「你做乜都冇用，唒心機!都話叫你等，等到佢原諒你為止，如果你對佢係真心，咁你就繼續等，不過暫時你都係唔好再理佢啲嘢住啦，睇完都係令到自己憤怒、傷心，加上佢都唔會理你，你都係等佢下咗啖氣，慢慢氹返佢都唔遲，都講咗啦，如果人哋係真心，佢點都會原諒你，只係時間問題。」
我話:「好啦，我等…」
佢話:「其實係男定係女?你咁緊張呢個朋友做乜?」
我話:「女仔呀!因為我真係唔想再冇一個好朋友~」
佢話:「其實你係咪鍾意人?」
我話:「哎呀!點解個個都咁講嫁?我點會可能鍾意佢呀?」
佢話:「咁祝你成功啦，記住追到佢就介紹比我識，Bye!」
我: 頂!
自己都喺唔同嘅朋友圈子出現過，有啲仲留得住，有啲就一早離開咗。其實友誼真係好特別，離離合合咁，今日可能你同佢有牙齒印，但10年可能大家係好朋友，不過20年後又可能反唒面，我覺得大家應該喺過程中汲取教訓，唔好再犯同樣錯誤，咁先叫做友誼。如果友誼係經得起考驗，咁先會有更鞏固嘅友誼，但如果友誼係風平浪靜，一有大事起嚟可能大家就反面，關係都唔會維持好耐，係咪?所以我目前要做嘅，就係擴大我嘅社交圈子，如果一邊lum咗，另外一邊都頂得住，不過我覺得已經夠大，只係有好多Hi-Bye Friends!
當然，友誼呢種威力真係對我有好大影響力，亦都令我認清邊個係真心朋友，所以我唔應該為咗一啲好小嘅細節而唔開心，因為人哋要令你傷心真係好易，但你要令自己開心返真係好難，所以我都唔會再為一啲無關痛癢嘅事而傷心，如果唔係我嘅人生只會有更多嘅悲傷。
又嚟到愛情啦，可能今次係最後一次講嫁啦，花生友好食啦，冇嫁啦。即係咁，好多人都覺得我誇張，點解我會對10個以上的女仔有Feel，其實如果唔計我低Form嗰啲低能同埋有Feel之外，我真正愛過的只有3個，有1個對我影響仲好深遠添，所以都係勸大家，要玩得起、亦都要識玩，唔識玩咪玩，講到自己好似玩咗好多次咁，其實唔係嘅，不過我都係提醒大家姐，話唒我都係過來人，不過大家應該冇我咁失敗，所以聽咗就算啦。仲有，我而家任踩唔嬲呀，絕對歡迎任何踐踏。總括來說，我相信我一定可以搵到真愛的，只是時間問題，我唔想做盛男呀!不過小弟真係對愛情嘅認知不多，唔係點解咁多次都失敗，還望高人指點，但都順其自然啦，我都唔想太激進，嘻嘻!
到最後，都係呢篇Blog嘅最後一段，我都估唔到自己已經打到第27,450個字，在此感謝「追睇」我Blog的Fans，不過我真係想低調，睇咗自己知好啦，唔好分享出去，如果唔係我會比人起底。無論係批評又好讚賞又好，我都樂於接受，但惡意攻擊的，恕我無法接受。真的感謝每一位帶比我中學回憶嘅人。好啦，希望我會再有大學的回憶，如果入到嘅話。
- 全Blog完 - |
