話說我又唔知幾耐冇打過Blog啦，今次再打我諗已經係半年後，冇計啦，為應付個A-Level，唯有忍手唔打B-)，而家考完啦，都咪話唔驚，但呢段時間應該係最休閒、最輕鬆嘅時候，因為冇咩好顧慮，日日出吓街、返吓工咁，不知幾寫意，所以我亦都有時間打吓Blog啦。
中學生涯話咁快就完咗，呢段時間都發生好多好多嘅事，有啲令到我成長，有啲令到我反思，由中一王中七，都有過好多難忘嘅回憶，諗返起都叫人回味無窮，以下就係一啲分享啦!拿!講明先，如果以下有咩事令你反感(包括嘔吐、頭暈、想鬧我、想講粗口)，請你暫時關掉瀏覽器，並稍作休息，然後思考一吓點解我會咁做，認真嫁，有啲回憶我諗返起都覺得係好難頂，不過我當然唔係咩都講唒出嚟，有啲事我都知唔講得，所以有啲事我會開名，有啲事你問我我都唔會講係邊個，自己知就好啦，廢事日後又比人食花生，同埋都想尊重返當時人!仲有呢，如果下面冇講你嘅，可能我同你回憶真係唔多，又或者我唔記得咗，又或者唔講得，但唔緊要啦，我同你嘅回憶會長存心底:-)好啦，而家就由中一開始:
中一(1B班): 傻勁
1. 班相回顧
睇返張班相，第一時間見到Rocky個樣好似細路呀，真係勁有童真勁似細路(可愛)，然後望吓隔離嘅安哥，嗯……..有霸氣，原來我同佢一班。好!再望上少少，Creamy呀!，……嗯…… B-)
2. 戴眼鏡 好樣衰
話說我小學先開始戴眼鏡，跟住一直戴到中一，但我喺屋企係唔戴。每日搭巴士返學，上車前都係冇戴，跟住落車後就會戴咗。當時個樣真係成個Kai子咁，雖然好斯文，但真係好樣衰，相信冇乜人認得我以前中一嘅樣，我嗰時副眼鏡仲要勁唔靚，而家諗返起，真係好似維珍所講嘅「毒撚」!!(但當時好似未出現呢個詞語，我嗰時都唔知咩係粗口)就係咁樣就戴咗一年，中二開始就冇再戴lu~
3. 牛肉麵的來源
「嘔麵!嘔麵!」，而家成日聽人咁叫我，但原來我呢個花名，背後係有人幫我改嫁!仲記得以前我識咗家家家，跟住唔知點解，佢叫叫吓我就叫咗「牛肉麵」，聽落幾順耳幾啱音，好啦，就咁叫啦!但後來慢慢轉變，就出現咗「牛麵」、「嘔麵」等等嘅稱號。我記得當時仲有人叫我做「Jacky仔」，但唔係好記得邊個改啦，但就好記得阿寶係咁叫過我!好似MSN個名都用過「Jacky仔」。但而家多咗人叫我「Jacky」啦!
4. 家家家帶我入網吧
你話我唔打機?傻啦，我都係正常男仔，點會唔打機吖?!當然，我以前都有打，但因為屋企次次都唔比我打，所以就要搵方法打啦。仲好記得，我一定記得，當時第一次入網吧，真係咩人都有、咩機都打，而帶我入去嘅人就係「家家家」(唔好意思爆左你出嚟:-P)，我當時仲好驚咁問佢:「會唔會有壞人嫁?會唔會比人打?!」就係咁，我就入咗去網吧啦，當時嗰間嘢喺富康花園唔知邊度…仲記得當時我有玩嘅Online Games有: 彩虹冒險(而家執咗)、跑Online、勁舞團、CSO，單機嘅有LF2= =，我而家仲有玩嘅就係CS 1.6，不過都唔係成日玩嫁啦，仲細咩?!
5. 最好朋友
當時都識咗唔少人，但最好嗰兩個，就係廖軒逸同埋肥金啦．曾經喺坐巴士嘅時候，我向廖生講過一句說話:「其實我覺得你係我最好嘅朋友!」，佢就答:「我都覺!」，當時真係超開心，因為搵到個知己，之後可能大家唔同級，就冇咩再聯絡，但而家我間唔中都見到佢嫁。而另一個就係肥金，當時肥金點樣，嘻嘻嘻，請你再比我講呢句啦，佢當時個樣好得意，無論佢係發嬲定笑，或者冇表情，諗起都想笑，但係呢，佢最大缺點就係寫字太「靚」，相信有唔少人見識過!但而家已經改善咗啦!哈哈!當時咩都同佢地兩個講，相信最熟就係佢地兩個。
6. Ronald撞爆我副眼鏡
記得當時我仲係戴眼鏡，以前係坐Ronald隔離的。有次啦，老師入咗嚟要打招呼，差唔多全班都企唒起身，我見Ronald未起身(佢喺度唔知畫車定做咩)，咁我咪諗住嗚低身成個頭「控」埋去睇佢喺度做乜嘢，點知我一「控」埋去，佢突然以佢最高速嘅速度一嘢彈起身，當場撞到我副眼鏡，我成副眼鏡左面一條臂斷咗，繼而成副跌咗落地，我嗰時都唔知笑好定喊好，佢仲要係咁「禁」住個額頭問我有冇留血，而家諗返起真係好好笑^_^。就係咁，我就換咗第二副眼鏡啦，不過都係唔好睇嘅，所以都冇乜點戴，其實就係而家用緊呢副，所以我已經好多年冇驗眼啦，度數應該唔啱。
7. So Kai好樣衰
呢件事我真係冇可能唔記得，So Kai，攞你出嚟講，唔好意思，我知你唔介意嘅。中一時識咗個同學，佢個名係「蘇啟X」，跟住佢就改自己花名做「So Kai」，其實佢冇乜嘢，正常人一個，但唔知點解，我覺得佢真係好……，有次我諗住同佢玩，仲記得係小丸子音樂堂，佢坐我隔離，然後我真係講笑咁同佢講:「其實你真係好樣衰!」，我諗住佢一笑置之唔理我啦，點知佢回應我話:「嗯(點頭)，我知，好多人都咁話我(低頭)。」，我再問:「你認真嫁?」，佢再話:「係呀!好多人都咁講過。」，跟住佢又笑笑口咁上堂。差啲以為自己做咗千古罪人，哈哈，不過佢嘅Kai樣我真係唔會忘記到!
8. 比Miss So罰抄
中一最傷心嘅一件事，莫過於比老師罰抄。嗰時嘅數學堂，教緊Geometry，每日上堂前，Miss So都會叫一咋人出去黑板默吓啲定理，我仲好記得有∠sum of △、adj. ∠s on st. line、vert. opp. ∠s等等。有好多次都叫咗我出去默，但講真，鬼記得咩= =，差唔多次次默完次次都唔識，結果係點，咪係比佢罰抄囉，第一次抄都冇咩嘢，但之後嗰幾次，我真係抄到頹，我記得一個定理好似要抄10次，我承認呢個係一個好好嘅方法要我去記住呢啲定理，但次次咁抄法真係想死，之後佢叫我抄，我成堂都會苦瓜乾咁嘅樣上堂，因為真係好sad。
9. MSN名單
我唔知大家仲有冇印象，中一嘅時候有個傻仔喺度整埋啲咩MSN名單。嗰時大家仲玩緊MSN，Facebook未有好似而家咁普及，見咁多人玩MSN，有個傻仔就好似好偉大咁，整咗一個MSN名單嘅物體，裏面主要Save低唒全級嘅MSN addresses(當然有啲冇Save啦)，點知份嘢一出街，就惡評如潮，曾經喺PE堂換衫聽人講過:「嘩!有條Kai子喺度整埋啲咩MSN名單，你有冇睇呀?!」。整嗰條友咪就係我囉，嗰時諗住搞返壇嘢比自己滿足吓，點知比人咁講法，真係……但我當時唔係放棄唔搞呀，而係因為冇時間再搞，但而家諗返起真係覺得PE堂嗰個人話得我啱，講真咁嘅名單有邊個會睇……但我仍然唔會放棄有大搞作呢種精神!
10. 偷屋企錢
嗰時唔知自己係咪年少無知，竟然連屋企人嘅錢都敢偷，估唔到我係咁嘅人呢?話說我父母根本唔會比零用錢我哋用，咁我細佬細個咪好勇敢咁偷屋企錢囉，點知我就有養學養，跟埋一齊偷。偷錢都唔係最大問題，點洗先係問題，中一時，我偷返嚟嘅錢，係請人食嘢，仲要唔止一次，每次小息一打鐘，我就會連同幾個同學急步咁衝落去小食部，連個小食部阿姨都認得我，一見到，就大叫:「喂!有錢仔!食咩呀?!」(但我真係唔想佢咁叫我)，跟住我啲同學開始叫嘢食啦，比錢嘅當然係我啦!(睇到呢度有印象嘅人應該知講乜)
起初我都冇咩嘢，覺得請吓同學仔食嘢都冇咩問題，直到有一次放學，我去小食部交飯單，當時冇咩人，小食部阿姨突然同我講:「喂!有錢仔!你點解成日請人食嘢嘅?!其實屋企比你嘅錢你都唔好咁唒法吖!你爹嗲媽咪咁辛苦賺返嚟嘅錢你咁樣洗法嫁咩?!......而家唔係我唔做你生意，而係……錢唔係咁洗嫁嘛，你明唔明我講乜呀?......你自己諗吓啦!」嗰時我真係好似比人挖醒咗咁，以後唔再用父母錢請人食嘢，我喺度諗: 究竟我係咪應該唔好再偷父母錢呢?我所謂嘅「朋友」究竟係咪建基於金錢利益之上呢?我點解會做出呢啲行為?甚至我當時懷疑自己良心去咗邊呢。
經過反思之後，我決定唔再亂咁請人食嘢，最後我都係比父母發現咗。我對唔住我父母，對唔住我自己，更對唔住我細佬……呢件事亦都令我成長咗。喂!我好似借咗錢比人哋，佢而家仲未還，已經係中一啦，條數都唔細，我仲好記得個數字，知道嘅快啲還!
11. 混亂的愛情
相信係我對愛情嘅無知，我中一一年內「愛上」過5個女仔，但全部追求失敗(勁魚)。嗰時我根本唔知咩係愛情，可能到而家我都仲未知，嗰時覺得一個男仔覺得一個女仔靚，就應該放膽去追，諗返都覺得自己好荒謬，好膠，覺得男仔有返個女仔係好正常，認為愛情係基於男方對女方有「好感」，繼而追求一段關係，之後就可以長久下去，就喺我自己對愛情嘅了解下，我開始「發動攻勢」。
但我當時真係好樣衰(戴住Kai眼鏡)，我都唔知憑咩去鐘意人，而我當時真係以貌取人，竟然鐘意隔離班最靚嘅女仔，但我想講我完全冇同人有任何嘅交流。當時喺早會時經常望住人哋又長又密嘅秀髮，就開始對對方產生所謂「好感」，跟住下一步就開始寫情信，表達愛意啦，點知人哋一收到，就連埋幾個Friends，一齊入咗女廁睇啦，佢哋仲要嘲笑，最後，我比個女仔喺ICQ用粗口鬧鬧鬧，又話我樣衰、又話我打字慢呀等等。不過真係多謝佢鬧醒我!
第二個係我當時小學六年級識得嘅五年級同學(追佢時佢已經係六年級)，都有幾句傾，但唔係識咗好耐。當時又唔知做咩「愛上」咗佢啦，我仲要傻到人哋生日，我送咗個大公仔比人，又寫信，但我冇表白嫁吓!(因為應該又係失敗)。最後唔知點樣，佢冇回信，但之後講返話佢Feel到我鐘意佢，但因為唔記得所以冇回，姐係失敗啦!
第三、四個就係自己班的，當時可能我真係好想快啲拍拖，又亂咁話鐘意人，但我乜都冇做，又同人唔熟，就咁叫人幫我表白，結果係點，自己估到啦，當時我諗我自己已經進入失控狀態。
第五個更荒謬，係網友，當時都有玩Online Games，當然個女仔都係網上識嫁啦，佢仲Send埋張相比我睇添，跟住咪又寫情信(用極都係呢招)，最後佢就派咗一張好大嘅好人卡比我啦，話咩你咁好一定搵到好女仔嘅，自此，我唔再亂嚟……
以上行為，全屬白痴(毒男)行經，如果對於以上情節有任何反感，請即時停止閱讀!好啦，認真講句，我真係唔能夠原諒自己中一時嘅行為，我根本視愛情如玩物，冇真真正正去了解一個人，就去所謂「愛」，不過相信中一嘅呢種傻勁，唔會再存在!
中二(2D班): 天真
1. 班相回顧
睇返中二張班相，第一時間見到陳麗珠好靚，但係呢，樹彤個樣真係冇變過。等我再望下先，啊!Ray Chan好靚仔呀，不過最靚女呢，都係維珍! :-)
2. 可愛與感性的班主任
中二啦，有兩個好好嘅班主任，一個係莊Sir、一個係Miss Cho。首先講Miss Cho先啦，佢呀，成日話我哋班人係豆豉，又話佢大我哋兩年，哈哈哈哈……不過印象最深都係EPA(經濟及公共事務)堂抄筆記，因為好少老師會喺EPA堂寫筆記，上堂又開心喎，所以佢對維繫我哋嘅團結真係幫咗唔少忙。至於莊Sir，其實都好「錫」我哋，經常細說人生大道理，好老師一個。
我仲記得以前有寫「雙週記」，有幾次上IS(綜合科學)堂，我真係唔小心冇帶到IS書，你知我唔係成日唔帶嘢，而係有真係會唔記得，但係呢，莊Sir見人每次冇帶，就罰人抄，我真係唔想做一啲冇意義嘅事，因為抄咗唔見得會記得帶書，所以佢每次叫我抄，我之後都冇心機上IS堂。之後，我真係忍唔到，我喺雙週記同佢講啦，但我真係講道理嫁，寫咗一頁多啲啲啦，我諗佢應該唔會點回，只係叫我下次記得帶書就冇事啦，點知佢就回咗一頁半，我成頁紙都係紅色字，內容就話唔知自己咁做會令唔小心唔帶書嘅同學唔開心，決定改過第二個方法。呢件事令我明白到，原來老師真係會同你講道理，唔係吓吓都亂嚟，之後有人唔帶書，莊Sir都冇第一時間罰抄，而係比機會，提醒佢哋下次再帶!老師通常好有權威，行為好少會比學生影響，但佢唔同，因為佢更了解學生需要啲咩。
3. 玩殘歐陽/比歐陽玩殘
代課老師，相信大家都知係乜，但我中二英文堂嘅代課老師，真係一場惡夢。話說嗰時Miss Lo因為要生BB，所以學校就請咗一個姓歐陽嘅代課老師，都唔知係佢性格唔好定係我哋唔習慣啦，我哋班某啲同學經常同佢發生言語衝突，堂堂都驚住佢唔知有咩會搞，所以次次上堂就好似走上戰場咁，亦都因為咁，部份同學其實都唔係好Like佢。到咗有一次，唔知我哋係咪忍無可忍啦，有啲同學諗住同歐陽玩吓，就想整估佢，我仲記得嗰日，有人將膠水定唔知「張湖」嘅物體整落個門柄度，等佢一開門就成手都係，但我記得佢入咗嚟好似冇事;第二樣嘢就係有人整啲粉筆粉落張教師桌嘅櫈度，等佢坐落去，點知佢真係中招!成班人就望住佢寫黑板嘅時候，個屎忽位有一大咋粉，哈哈哈……最後點?緊係比Miss Cho鬧啦，不過呢啲就係我哋頑皮嘅回憶!
4. A Whole New World
唔知點解，中二嗰時成班玩咗一次歌唱比賽，講起嚟真係一件好耐嘅事啦，嗰時Miss Cho仲話我哋男仔太低Key，不過冇計啦，鬼叫首歌個男人咁高Key咩，咪降八度，況且嗰時鬼識唱歌咩，唔知係好彩定係咩啦，竟然入到決賽，不過呢，最後好似三甲不入(唔記得係咪啦)，但點都好啦，最記得就係維珍飛粒大星星出嚟，A Shooting Star~，都預咗台下會笑嫁啦，總結嚟講都係好玩啦!
5. 嘔落小儀件校褸
我呢世人冇咩怕，最怕就係頭暈。因為頭暈真係好唔舒服，個頭又重喎，有時仲會嘔。話說我有一日唔舒服，返到學校都有啲唔係幾妥嫁啦，朝早仲嘔咗幾嘢，我諗住嘔完應該冇咩嘢啦，所以繼續上堂。上到EPA堂，我已經成條死魚咁瞓咗喺度，Miss Cho走嚟摸我個頭，我冇發燒，我話冇嘢繼續上堂啦，第二個小息，我見自己好返啲，諗住落去小食部買嘢食，一買就買咗個肉鬆手卷，食完都冇咩嘢，跟住上返課室上中文堂，我嗰時坐窗邊嘅，小儀就坐我前面，錢Sir一路講書，我就一路趴喺度。我真係唔想嫁，我突然覺得個胃有一堆嘢想湧上嚟，我以為係胃氣所以冇理度，點知又湧多一次，今次真係上到個口度，之後，我已經對準窗邊，諗住噴出窗口嫁啦，但唔知點解會落唒去張檯度，啲紫菜加液體，一路流流流，好快已經去到小儀件校褸度，喺呢個時候我聽到有人尖叫，錢Sir仲繼續講書，一秒之後小儀擰轉面，即刻擺出一個好驚訝嘅樣，跟手即刻攞走件校褸，之後錢Sir衝過嚟諗住扶起我，但太遲啦，件校褸已經「奶」唒嘢，至於我，嘔完成口都係嘢，連隻腳都有，臨行出班房門口之前仲想嘔多嘢，但都係忍住咗。最後Miss Cho仲喺度話我:「牛肉麵你病仲去食手卷!」真係真係真係好對唔住呀小儀(>.
6. 班衫的友誼+「加一」服務費
話說中二嗰時嘅班會要整班衫，咁都要有人去同製造商傾細節嫁，嗰次應該都係我中學生涯第一次正式同一班人出街啦。嗰時都好似去咗幾次，不過重點都唔係班衫，而係去嘅嗰班人，以我記憶，嗰時應該有豉油碟、阿筠、阿蚊、劉翠、唔知仲有冇啦(印象朦朧)，我都唔知咩事，佢哋(嗰三個女仔)成日都拍打我手臂= =，不過我嗰時唔知冇膽定咩啦，冇還擊。阿蚊拍完我跟住就喺度傻笑:「嘻嘻嘻…」(點呀= =?)，劉翠呀?，我話我同你一樣都係姓劉嫁!?，阿筠，打得最多最大力嗰個= =虐待呀(>.
哎呀!我中二真係傻到不得了。話說又唔知幾時同人出街啦，不過以下嘅嘢都係樹彤提我先記得咋，我印象好朦朧。嗰時係食完嘢，唔知找數定做咩啦，總之有人比咗錢，我要比返人啦，跟住彭彭就同我講要「加一」(比返10%錢)，我唔知聽錯定係聽唔到，我…………………比咗$1佢。跟住個個喺度笑笑笑，「加一」唔係$1呀!原來嗰時我真係真心膠= =
7. 我要見社工
萬萬都想不到，我要去到見社工，不過唔係我太唔聽話或者犯咗咩校規，而係我屋企人唔識教我哋。中二嗰時，唔係講笑，我阿媽仲可以攞「騰」條「fit」我，仲有好多好離譜嘅教法，不過而家已經好咗好多，冇好似以前咁。至於見社工，隨咗Iman之外，嗰時應該仲有其他老師嫁，好似Miss Cho、彭Sir，傾啲咩唔講啦，嗰時仲要帶咗阿妹嚟，唔知點解嗰時會有同學同我阿妹玩，嗰時佢唔知得4歲定5歲。
8. 心酸的愛情
見到個標題我都唔想打啦，例牌又係唔開名，但我同佢而家相處得好開心嫁，冇尷尬咩都冇。又話說呢有一次調位，就調咗佢隔離啦，嗰時好多嘢講(應該係佢多嘢講，哈)，上堂講、乜都講，又話咩楊利偉(楊偉傑)個樣好假，又好笑喎，乜嘢都笑一餐，咁佢真係開朗嘅，有幾次真係笑到我爆肚，慢慢咁樣，開始有feel啦，仲記得有次上中文堂，佢比錢Sir串:「啊~有個女仔係咁同隔離嗰個同學講嘢喎，個男仔又醒喎，係咁望住我~」點知有一次，講講吓，佢問我而家鍾意邊個(我都唔知點答)，一開始我話冇冇冇，佢又唔信(我真係唔識講大話?)，跟住佢又係咁chok我，比佢chok chok吓，我就開始比貼士叫佢自己估啦，跟住講講講，個範圍已經縮窄到只有佢同另外一個人，傻嘅都知我講緊佢啦，點會係第二個，但佢繼續問問問，咁點姐?唔通我真係同佢講咩……
就喺我唔知點嘅時候，我就決定，唉，死就死啦，我就寫咗條數學公式，叫佢自己計，同佢講嗰個學號就係我鍾意嗰個，仲要放咗學先比佢，點知返到屋企，我發覺原來條式錯咗(頂你劉日健)，跟住即刻Send去Hotmail改返條式……
點知之後返到學校，仲記得係第一日換冬季，見佢又唔理我，又唔敢同我講嘢，我心諗我今次又「奶嘢」，跟住音樂科要我哋去聽音樂會，見到佢同第二個男仔拖手，諗起都心酸，之後我只好死心，感覺慢慢冇咗，又冇嘢啦!
中三(3E班): 簡單
1. 班相回顧
嚟到中三啦，睇吓班相先，Kenny真係好似小朋友呀，都唔似中學生。啊!陳嘉玲小朋友?點解我好似冇咩印象同你一班嘅?
2. 奇怪的班主任組合
哈!都唔知係巧合定係咩啦，中三嘅兩位班主任都好特別，一位係胸肌好勁嘅Mr. Yu，而另一位係已經離校嘅Mrs. Peacock。國強老師，出名講嘢直，有嗰句講嗰句，有時真係頂佢唔順嫁，但咁都好，學生有錯緊係要話嫁啦，唔係咩係老師呀?!但係呢，最記得有一次，唔記得咗幾時佢罰咗一咋人抄校規，我真係唔想再抄，曾經對過自己講:「如果佢再罰我，我死都唔抄!」，講到佢好似好衰咁，其實唔係嫁，其實佢都係我哋3E嘅阿爸咁，我都知道佢係一個好講道理嘅人，冇嘢唔會無啦啦鬧你，我最記得佢嗰句「你啱我錯」、「Sorry about that」、「唔好後悔，要『前』悔」，英文，真係你威唒。
至於Mrs. Peacock，對於唔識講中文嘅佢，一開始溝通真係有問題，有時有嘢想答佢，但又唔知點用英文講，但慢慢習慣，就冇問題。仲記得我有次上堂瞓教，當我瞓得好「lum」嗰時，佢就走埋嚟，一嘢拍落我張檯度，但係我冇即時嚇到彈起，係慢慢抬起頭，佢當時講咗句:「You seem very tired」，我問返人，原來佢拍我之前，係有大聲講過:「Look at Jacky! Look at Jacky!」。又記得有一次，我唔記得帶Listening本Textbook，跟住我就呆咗咁坐喺度，佢又唔比我做其他嘢，只係比我呆坐，咁我咪瞓囉，點知佢即刻叫醒我:「Jacky!」。有次呢，有同學問佢全名係咩，佢話:「Are you ready?」，跟住就講咗一個三個英文字但有好多音節(我諗都有10個)嘅名，成班即時拍爛手掌。
3. 不是精英班
初中嘅時候，D、E班都係「精英班」，其實有咩話精唔精英，咁樣標籤法咪盞搞到其他班憎恨，中二嘅時候莊Sir都話過唔想我哋比人叫「精英班」，「精英班」又唔係有咩特別對待，唔明咁樣做為咩。事源係試過同人嘈，跟住講講吓就比人問:「你估你精英班大哂呀?!」。仲有呀，其實我邊係精英，讀書又唔係特別勁，係咪先?所以我當時都唔認自己係「精英班」，只係認自己係3E班!
4. 「王」班帽
為咗唔好次次都整班衫，中三嘅班會就提議咗整一頂帽啦。頂帽黑白色，而家仲有留住，帽上面有個「王」字，旅行嗰時帶咗出嚟，睇返相都幾靚。有諗過出街都帶出嚟，跟住心諗都係唔好啦:-P
5. 趙璐與家家家
又係家政堂，唔知標題上嘅兩位人士做咩啦，次次家政堂，都起勢咁攞啲長尺嚟「開片」，仲要喺家政室追嚟追去，睇見都心寒，有次差啲fing中我= =。可能兩位都係太活躍啦，當我哋忙緊車衫嘅時候，佢地就喺度fing嚟fing去，但望住佢哋咁樣又真係幾搞笑。
6. 馬姐
樹宜當你睇到呢度嘅時候應該O咗，「竟然我都有嘢講?!」。係呀，「馬姐」囉，你話係劉程耀改你呢個名，但我都唔知點解會改= =，「馮」字冇咗個「冫」?不過呢，我到而家都唔知點解你會叫樹宜，我只係知道樹彤點解叫樹彤，我一開始成日以為「樹宜=樹彤+皓宜」
7. 肥蟲的垃圾書包+肥翅塊面好肥 有一排我係坐肥蟲隔離，中一嘅時候都知佢係一個懶人，去到中三，嘩!佢個書包真係不堪入目，一咋好亂嘅書+筆記，當時好認真問咗佢一句:「你個書包係咪裝垃圾嫁?」，真係後悔當時冇幫佢嘅書包影一張相，連佢櫃桶都係勁亂，可見佢係一個唔整齊嘅人B-) 當然，佢都有好人嘅一面，真心覺得佢係一個好人，哈哈!
肥翅其實中二已經識嫁啦，嗰時應該係肥蟲「介紹」，佢有咩特點，我覺得佢塊面肥囉，哈哈!所以我經常搞佢塊面，唔知佢會唔會介意呢，但真係好好笑，佢成日做出一啲好誇張的表情，不過唔知係咪以前大家都太低能，我記得有幾次我哋幾條友「圍打」佢，佢叫「救命呀!」，諗返都好笑(^_^)。不過我最記得就係我成日問佢:「點解你塊面咁肥嘅?」，但佢都係例牌唔理我= =。仲有呢，唔知我以前貪玩定咩啦，我行行吓樓梯會打斜行，肥翅囉，無啦啦喺度學我，跟住肥蟲同家家家就喺度笑我，原來我以前真係咁小朋友>
8. 友誼之破壞
以前我唔識諗，人哋一句講笑我就當人認真，直到有一次，我同家家家反面了。嗰時喺MSN，唔記得做咩，講講吓嘢，佢無啦啦爆咗句粗，但其實真係隨口嗡吓，點知我當時勁火，話要同佢冷戰，佢唔知我認真，之後就繼續串我，返到學校，我真係冇同佢講嘢，聽返當時人講，其實佢都好驚訝，唔知我點解會嬲，我而家諗返起，我都諗唔明點解我要嬲，就係咁，我哋一個月冇講過嘢，我當時坐喺課室最前排，我真係好想喊:-(
而家諗返起，真係好傻呀，點解人哋一句說話就搞到自己咁?其實人哋都係同你講吓姐，唔洗玩到咁絕呀?好彩，到咗而家，我哋仲係朋友!證明我又成長咗啦!
中四(4A班): 瘋狂
1. 班相回顧
唔好話我唔讚你啦，而家認真講一句，真係真心(唔信嘅我可以親口同你講):「維珍你好靚女呀!!!!!!!!」，睇吓張相先，我哋嗰時仲係好靚仔靚女，但一個會考，就個個變唒樣，大家可以拎中四同中五張相出嚟對比吓，小儀喎!......嗯……B-)
2. 得你先識做班主任
關Sir，一諗起你，我就有好多嘢想講。如果學校有最佳班主任大獎，你一定攞硬。係你!處處提點我哋!係你!知道學生要咩!係你!對得我哋最好!如果冇你，今日真係冇我哋!真係無言感激!可能我哋嘅回憶實在太多啦，都唔知由邊度講起好。但我記得你係「智」唔係「志」，我亦都好記得你嗰啲好特別嘅教學方法，咩「大佬」、「二佬」唔知咩啦，總之就好得意啦，「一係就唔好玩，要玩就要用心玩」，如果冇你，我Maths都唔會係呢個成績(好多人都認同)，你實在太強啦!
3. 點解要迫我玩集誦?
真係唔明唔明唔明，我要考會考嫁，都唔知集誦搵唔到人吖，還是冇人參加，竟然搵中四去參加集誦，如果我午膳唔洗去練集誦，我一定多好多時間。好啦，唔緊要啦，玩咪玩囉，還點嗰時仲有肥金陪我，喺集誦都識到人，咪跟住柯老師同譚老師玩吓囉，我哋就「迢迢牽牛星~」。好唔容易，就到咗比賽啦，都緊張嫁，我哋第一隊出場，其實都冇咩嘢，同平時練習咁朗誦返出嚟，最後結果係三甲不入啦，分數都好似唔高，評判就話好多學校都誤會咗某一句嘅意思，應該唔係咁樣唸的，真係有啲後悔。但我記得中一參加過攞過第一嫁!
4. 內斂→好煩
識我嘅都知道，本身我都唔係好鍾意講嘢，其實唔係唔想講，而係唔知有咩好講，對於一啲陌生人，我以前真係好少講嘢，但而家唔會啦，我會好似正常人一樣，盡量諗吓有咩好講，想講就講。呢個改變都係4A帶比我的，因為大家都要對住兩年，根本冇可能兩年都冇嘢講，點都要留吓一啲印象比人，如果唔係就會變透明人，多你一個唔多，少你一個唔少，曾經我亦都諗過一個問題: 就係我喺4A其實有幾重要?，成日都諗，如果我唔係電腦勁，如果我唔係鍾意拍片，如果我係女仔，可能真係冇人會理我、冇人會當我存在過，但我都知我咁諗係大錯特錯，因為人本身係有佢自己嘅價值(例如我呢篇Blog帶比大家娛樂)，有佢自己嘅強項，所以喺一班人裏面，其實冇一個人係完成透明，只係有幾透明，亦都冇可能完全唔透明，所以成日都話，4/5A一個都不能少!
不過重點都唔係以上嘅嘢，而係我性格上嘅改變。熟我嘅人都會知道，其實我好煩，曾經試過五分鐘之耐打過幾次電話比人，不過真係有需要，我試過一開始就喺電話問:「其實你覺唔覺得我好煩呀?」，佢就話:「乜你而家先知?」，但跟住又繼續講其他重要嘢。
眾所周知，一個人根本冇可能同每個同學都熟，所以希望唔熟我的同學，有機會慢慢認識你!
5. 點解我鐘意拍片+電腦?
其實要講返小學嫁啦，嗰時小學已經好鍾意上電腦堂。到咗六年級，開始有電腦，開始研究，記得第一個開嘅軟件，就係防毒軟件，叫做「Norton AntiVirus 2003」，直到而家，我都係比錢買正版嘅防毒軟件，跟住亦都開始對部主機好有興趣，部機先後Upgrade過幾次，可能亦因為咁，我部機用咗已經八年，雖然有時會壞，但都唔係因為機件老化，而且運作速度仲拍得住主流電腦，只係PC Games一定唔得，但得要求低嘅Online Games都冇問題。亦都因為咁，我都會幫同學搞一搞部電腦，雖然唔講得上係專業資格，但總算幫到人。
至於拍片，應該係我第一次用菲琳相機開始，嗰時都愛上影相，之後就用數碼相機，仲可以拍片，所以無論班內有咩大小活動，我一定會帶相機，至今亦得人肯定(唔係自大)，總算有些少貢獻，不過我係鍾意拍片多過影相，希望日後都係從事呢方面嘅工作!
6. 愛情陷阱
我諗唔會有人會忘記呢段回憶。曾經花過好多時間、好多心機、好多心血去搞呢壇嘢，雖然最後以些微分數之差攞唔到冠軍，但嗰時大家都玩得好開心，而家睇返段片都好感動。除咗我哋之外，我亦都知道阿Sir都犧牲咗好多嘢。最記得就係Toby嘅造型，真係望返都恐怖呀，大家跳舞都好落力，唱歌都好用力，我唔係唱唔係跳，要扯實老倫，望見你哋咁比心機，真係好感動。
7. 唱K
第一次入K房唱歌，我都唔記得幾時啦，可能我第二個興趣，就係唱歌，唔敢話唱得好好聽，但都唔難聽，但係鍾意唱歌就真嘅。以前覺得入得K房嘅一定係唔讀書的人、吸毒的人、壞人，屋企人都覺得係咁，但係咪傻啦，邊係咁嫁。就係咁，唔知係咪對唱K上癮，我而家時時刻刻都想去唱，所以呢個暑假一定係咁唱。講起唱歌，其實真係有諗過做歌手，但諗諗吓，而家個樂壇咁樣，真係有啲驚，都係做返攝影師算啦，係咪先?
8. 志威
唔記得點解會識得呢位人兄，但佢而家係我最重要嘅朋友。中四嘅時候我對佢嘅印象，係唔多講嘢、坐埋一邊(根本上同我一樣)，一直以嚟都唔記得點解會識到佢，係咪一齊坐過呢?定還是一齊去自修室?真係唔記得啦。好啦，條友叫我唔好講佢咁多，咁我就唔講啦，因為我都唔知有咩好講，但有時都幾憎佢，因為佢有時對我好冷淡。
9. 中途離隊: 趙璐
去到外國讀書嘅你，唔知近排生活如何呢?有冇溝仔XD?認真坦白地說，其實唔係同你好熟，但你永遠都係我哋嘅一份子，見你喺Facebook講嘅嘢，都知你同我一樣係好重情，希望你喺外國仲會記得我哋啦。仲記唔記得之前嘅歡送會，可以知道我哋真係好重視你嫁!
10. 學校水戰
嗰次應該係玩得最癲嘅一次，冇諗過可以喺學校掟水彈。玩到濕唒身，連底褲都濕埋，有人仲要走入去游泳池裝水，點知比人話，人哋有小朋友上緊堂呀，跟住仲要喪到開埋消防喉，跟住第二日學校早會宣佈話有人搞過條喉，但唔知邊個。我諗下次真係要買個防水相機先得，萬一射中我就大獲啦。可惜到最後連我自己都比人淋水，係淋水，唔係射水。
11. 再受傷害的友誼
唔知係咪以前積積埋埋對我嘅不滿定係唔開心，或者同我做朋友好辛苦。其實都有導火線……打到呢度，我已經想喊，但既然都開咗個頭，不如埋埋個尾。但我在此鄭重道歉，雖然冇可能挽回返你，但你帶比我嘅歡樂，我係唔會忘記，亦好多謝你，仲要同你講聲對唔住，原來我帶咗咁多辛苦比你，亦都希望你唔好介意我再提起呢段往事，我盡量以最少嘅影響力嚟講呢件事啦。
有一日，你無啦啦喺MSN同我講絕交，當時我真係O唒咀，究竟咩事，定還是你係講笑，但後來我知道，你係認真，當時我真係接受唔到，因為我係一個非常非常非常重情嘅人，入咗去就唔會咁輕易放手，當時成個月，我喊過、試過瞓唔著覺、試過想唔返學，甚至試過喺課室強忍眼淚、搵人傾數，我試過令自己去改變嚟去遷就你，但無論我做咩嘢，都唔能夠改變你，雖然我到而家都唔明點解你要咁做，但我知道你係好辛苦先下呢個決定，亦都唔會心軟，所以我會尊重。最後，我都成功地放低呢段友誼，雖然我冇咗呢一段友誼，但你就令我成長，令我驚得起風浪，等我下次接受更大損失嘅時候，我仍然能夠屹立不倒，有人成日話年青人唔能夠承受痛楚，但問題根本唔係能唔能夠承受，而係有冇承受過，所以我一定可以度過每一個難關。真係最後，還是要感謝你，我對你係正面嫁，我亦都唔記仇，相信呢段友誼一定係一個好好嘅烙印，正所謂「天下無不散之筵席」，希望日後見到我都要同我打招呼呀!
12. 社區中心的女仔
大家食花生時間又到，真係強烈要求食花生者打返1000字讀後感。花生開始:
應該係暑假嘅時候，話就話要準備會考姐，咁都要有正常嘅社交生活嫁，唔係日日溫書，所以我就去咗樓下一個社區中心參加一個小組，同我細佬一齊參加嫁，但嗰個小組除咗導師之外，全部人都細過我，有個女仔，唔敢話好靚，我都唔係以貌取人，但佢同我年紀應該係最接近(細我一年掛?)，起初對佢都冇乜嘢，冇乜兩句，但慢慢開始，又係我啲無知少年嘅Feel，開始問佢攞電話，我諗佢都係對我Feel(唔好問點解，睇埋就知)。
小組完嘅最後一日，佢同樣係問我鍾意邊個，我話只係有Feel，但佢係咁問我，我唔想重蹈覆轍，仲記得嗰日係做義工，要幫手搞活動，大家都好開心，就喺臨走嘅時候，我叫咗佢出嚟，問佢:「你係咪真係好想知我鍾意邊個?」，佢望住我一秒(甜笑)，話:「係呀!」，我嗰時個心真係就跳出嚟，定咗三秒，深呼吸，但個口喺咁震，佢又係咁望實我，咁我又唔好意思要佢等我講，我鼓起勇氣，開口話:「……拿!有Feel咋，唔係鍾意!」，(頂你肯講未)我嗰時真係唔敢講，但佢再問:「咁你對邊個有Feel?」，我唯有講:「我鍾意阿A(A=佢個名)」，嘩我之後急急腳就走咗啦。最後，其實我都係以學業為重，我Send Message同佢講:「等我考完會考再算。」，佢話佢明白，話會等我，話對我都有Feel。
但係，我好後悔，維繫感情真係好重要(奉勸各位情人，當有咩大事要分開/冇得見面，一定要諗辦法保持感情)，唔知係咪我太著重學業，亦都可能係我知道佢太多缺點，加上之後我已經對自己班內某人有Feel，所以考之前，我都冇再搵佢，其實點會一啲時間都冇，幾冇時間都可以保持聯絡，鞏固感情，不過感覺真係好奇怪，話冇就冇，我自己都唔想。當我考完之後，我都唔敢搵佢，到咗最後，佢寫咗封信比我，話知道我對佢已經冇感覺，話會放低我，我唔敢覆。
我…好內疚，浪費咗人哋咁多青春，我講幾多次對唔住都冇用，但佢話佢唔係好傷心，我都好安慰(可能佢呃我啦，但我見佢之後同其他男仔一齊，仲食煙)，睇到呢度，可能大家都覺得我係負心漢、衰人、花心，冇錯，我認!但係，當時我哋識咗只有三個月，加上根本唔係愛得佢好深(係有Feel)，再加上佢迫我講，如果我隨隨便便就同佢一齊，咁咪傷害更大?因為我真係唔想呃自己，過唔到自己嗰關，所以先下呢個決定。
其實我想講，我並唔係唔專一，我係識得諗的。講真，如果大家真係愛得大家好深好深，根本就唔係等表白嗰刻先係情侶，而係表白之前，雙方會透過彼此嘅行為，例如係Send肉麻短訊、單獨約出街、傾電話、日日諗住對方，幾本上已經認定大家係愛人，表白，只係一種表達嘅形式，正正式式Confirm大家係情侶，肯定對雙方嘅感覺，而唔係你表白嗰刻人哋先嚟鍾意你，呢到亦都帶出另一個道理，無論你做幾多嘢都好，如果你感動唔到人，你做咩都冇用。
可能大家對我以上嘅嘢有好多想反駁、想糾正我，但相信你所講嘅嘢，我都一早明、一早知，所以期望你唔好唒口水而鬧我啦，嘻嘻!
其實已經橫誇咗中四五，所以到此為止啦!
中五(5A班): 悲喜交雜
1. 班相回顧
校長你係得嘅，大家都成熟咗好多，同中四完全係兩個樣嚟，尤其是係我，我滄桑咗好多。老倫想點先，咁串!
2. 彭彭成日病
我諗你應該係我哋班嘅大病人，成日都見你病咗返唔到學。由傷風感冒到肚痛胃病，你應該試過唒，有時我哋都幾擔心你，記住要時刻Keep好個身體，成日病真係咩都做唔到，唔知你而家仲係咪成日都病呢?
3. 講是講非
中四開始已經聽到好多是是非非，大的小的通通都有，不過唔好以為我會喺度講，而係想話，呢個世界原來就係咁多人喺你背後講你壞話，但你都唔知，我真係到咗中四先知，中五先明呢個道理，不過都唔可以責怪講壞話嘅人，因為有時佢哋咁樣講真係情有可原，我亦都可以理解。所以話: 人真係唔好做咁多壞事、奇怪事，分分鐘比人講緊你都唔知，當然我一定比人講過啦，其實都唔出奇，邊會有人冇比人講過先，睇吓講你咩嘅姐!但有啲聽到真係好驚訝!
4. 補習補全科
話你知，我中五補習係補唒7科。有人話:「有冇搞錯呀!西史都補!?」、「你電腦已經好勁啦喎!」，我承認其實我真係有啲浪費金錢，點解西史都可以補，乜嘢都可以補，我嗰時其實係想放心啲，可能心理上放心啲，始終唔補好似學少咗嘢(但出到嚟嘅成績唔見得學多咗嘢)，西史嗰條友又廢(指補習老師)，我都唔知補嚟做乜。至於電腦，有腦嘅都知我電腦邊個教，唔補真係唔得，電腦考試都唔係考我日常應用嗰啲嘢，所以先補。其他科更加唔洗講啦，一定大把人補，中文係我本身廢，英文?心照啦!數學係教得好，其實都可以唔洗補，但學多啲真係冇壞，補習教得都幾好，地理唔補我食屎，經濟?又心照啦!就係咁，我補咗7科，搞到時間分配上真係好辛苦。
5. 藍小姐(5C班)成日漏手冊
講緊邊位?自己認啦!唔知佢大懵定做咩啦!成日上完堂都漏啲書呀、筆記呀、手冊呀喺我櫃桶，哈哈!有次我返到屋企無啦啦有佢本手冊喺我書包度添，勁!但算啦，可能佢真係一時唔記得，下次唔好啦!對你認識不多，在此收筆。
6. 阿Kai
我都唔記得同你坐咗幾耐啦，不過相信我比你嘅印象就係靜，其實我唔係唔講嘢，而係唔知講咩好= =。不過我知你都唔係Kai嘅，仲有少少串添，有時你會覺得我串緊你，其實唔係，我真係好少串人，無啦啦唔會串你。記得有次Sky姐上堂，都唔知佢啲頭髮做咩成日一講嘢就彈吓彈吓，你叫我望吓佢個頭，我即時笑到傻咗(因為真係好好笑)，結果我哋成堂Econ堂就係咁望實佢個頭笑咗一餐。
7. 阿蚊好Cute
呢個唔講唔得，記得中五一開始未調位，阿蚊坐咗喺隔離，我都諗唔到用咩形容你，總之你就係傻奸奸、成日傻笑的樣子啦，有次明明係我隔離嘅Toby講嘢，你就無啦啦問我:「啱啱係咪你講嘢呀(傻樣)?」，我答:「吓?我邊有講嘢呀?Toby講咋。」，你:「係呀?點解你同Toby把聲咁似嘅?」，我: 無言……(一啲都唔似囉)。但我想講其實你真係可愛嘅，塊面肥肥大大白白的，個樣又傻又Cute咁，都幾討人喜歡。不過我都知你表面傻姐，內心好真誠，有時仲好搞笑。
8. 維珍話我係「毒撚」!
本身同維珍一啲都唔熟，一啲都唔熟，一啲都唔熟，一啲都唔熟，但自從嗰次調咗位之後，我就同維珍坐啦，起初真係唔夠膽同佢講嘢，因為之前見過佢鬧人嘅樣，我呢啲咁細膽嘅人又點敢同佢講嘢，都唔知佢會唔會食咗我。講到佢好似好恐怖咁，而家又嚟一個轉折嘅修辭技巧，其實佢心靈好弱小，有次佢對住我喊(咩事唔提啦)，我嗰時都唔知點好，心諗: 佢洗唔洗人安慰呢?佢應該好堅強嫁喎，但其實並非，每人都有懦弱的時候，維珍都一樣，由此可見，幾堅強的女人都須要(男)人去扶持。
讚完你，緊係有彈啦，就係你無時無刻都話我係毒撚。一聽呢個詞語，其實都唔知咩意思，咩叫毒撚，有毒嘅撚?!個撚有毒?!無啦啦做咩話我條撚?!仲要有毒?!，當我百思不得其解嘅時候，我只好應句:「咩呀?」，後來知道呢個詞語係咩意思，真係完全接受唔到，有好大差別，我未至於咁嘅地步呀?或者咁睇啦，如果佢冇話我係毒撚，我諗佢而家已經唔記得我啦，就比佢叫過夠啦，習慣成自然Ma，但出街唔好咁叫我呀!
「健健!健健!」，每次聽到都打幾個冷震，完全唔習慣佢咁叫我，當佢每次咁叫我，我心諗: 又想點?，但算啦，哎呀，如果佢而家叫我全名我仲唔習慣，話時話佢真係冇叫過我全名，所以有得佢叫啦。呢個「健健!」其實都會令到我好開心，就係維珍唔識數學嘅時候，佢就會問:「你識唔識呢條數點計呀?我計極都計唔到?_?」，之後我就會好詳細好詳細咁解釋比佢聽啦，佢明咗之後，就會好感激好大聲咁講:「嘩!健健你好叻呀!」(我諗成班都聽到= =，因為前面有同學望住我哋笑)
讚完彈完，講句真心話啦。其實維珍真係令我改變咗好多，亦令我人氣上升唔少，你問我會唔會討厭佢?咁緊係討厭啦，話我毒撚喎!你問我會唔會感激佢?咁又感激喎，因為佢令我性格改咗好多!你問我會唔會鍾意佢?咁就唔知啦!因為佢又靚又驕傲。不過呢，同佢做朋友就一定十萬個OK，維珍，多謝你，你帶比我嘅回憶可以係一個傳奇!我唔係毒撚呀!!!!!!!!!!!!!!!!!!
9. 個個爭住睇我本隨筆
話說中文科要我哋喺暑假寫隨筆，唔知我啲文章太有娛樂成份定係寫得好好啦，無啦啦比人搶咗周圍傳，維珍仲要大大聲讀比全世界知，起初認真嬲，有乜可能咁做嫁，我都有私隱嫁，你講樣搞法全世界都知唒啦，但見個個聽得咁開心，我都唔介意分享啦，況且又唔係有咩唔出得街，基本上我咩都出唒街。睇返自己本隨筆覺得自己真係好白癡，點解咁嘅嘢都寫得出，抵比人嘲笑!歡迎任何人士再借閱本人之隨筆!
10. Toby屎忽鬼
Toby:「嘩!好熱呀!」
我:「屙屎啦!」
Toby:「嘩!今日份測驗真係勁難囉!」
我:「屙屎啦!」
Toby:「幫我攞條毛巾返嚟吖!唔該!」
我:「屙屎啦!」
其實都唔知點解，我哋嘅溝通就係咁，離唔開「屎」。每次佢同親我講嘢，如果唔係咩好緊急嘅嘢，我就會應佢呢句，跟住就會係咁笑。Toby係我哋班嘅好男人，好多人都咁覺得，咁又係嘅，佢真係夠義氣，雖然而家唔係成日見到佢，但我仲好懷念嗰時一齊「屙屎」嘅日子(好似講到太核突)。上次見到佢，佢都仲係照樣叫我「牛屎」……
11. 電腦堂=搞笑堂?
電腦堂有咩做?你話呢?先唔講有咩做先，因為大家都會知嫁啦。不過我哋上堂真係好好玩，話說老倫成日都同阿Sir駁嘴，仲要駁得好好笑，咩「信你一成、雙目失明」，不過呢啲都係同阿Sir開吓玩笑姐，最爆嘅都係有次區同學(5B班)未交SBA，咁阿Sir咪叫老倫幫手叫區同學交囉，點知講講吓，阿Sir無啦啦爆咗句:「女人講嘅嘢邊信得過嫁?!」，真係笑死我同老倫。不過更加好笑嘅就係黃同學(5B班)啦，成日上堂係咁笑，正因為我成日玩阿Sir，例如喺佢上堂前，將個喇叭開到大一大，等佢登入嗰陣時，就會聽到好大聲嘅登入聲，又有一次，我將兩把界刀插咗入去兩個螢幕中間條「la」度(教師桌係有兩個螢幕平排咁放喺度)，跟住黃同學就係咁笑，仲有好多嘢都好好笑，不能盡錄。之前Last Day放咗段片，不過得電腦人睇得到，內容係我哋班友同阿Sir玩，真係好好好好好好好好好好好笑!
12. 萍姨成日虐待我
唔記得幾時同你開始熟，但你成日都係咁打我，係又打唔係又打，真係好似虐待我咁= =我啲計數機呀、Files呀、文具呀、手呀，全部比你畫花唒，不過都好，等我永遠記住你呢個朋友。
13. Kai公?!
喂呀!你條友又話買PS3，幾時可以上你屋企玩呀!? 中三識你，中五先熟，你啲言行舉止真係成個大佬咁，無啦啦講講吓嘢爆句粗都有嘅。但我記得你阿媽真係好好人，多謝上次餐飯! 你唔好再掛住同我講溝女嘅嘢啦，乜我哋真係咁少話題?
14. Billy
因為我真係唔知點叫你，所以就叫你做Billy。你喺我哋班好似出唒名，但點都好啦，見你比人屈得咁慘，就讚你好人啦!你Last Day無啦啦亂咁拎咗張濕紙巾比我，仲叫我記住你，Billy，我好難唔記得你呢個名XD多謝你上次請我飲嘢!
15. 河哥
記得中五一開始，根本唔知你係邊個嚟，但而家就變咗做我最重要嘅朋友，如果唔係你處處提點，我諗我今日所犯嘅錯將會更多更多。一開始有人Send咗你張相嗰陣，話你個樣好奇怪，唔知係咪呢?但我到而家都未睇過你幅相。下刪500字……大家都知嘅嘢唔講啦! Yellow Yellow Yellow!
16. 會考放榜
唔知呢一Part會唔會得罪好多人。話說放榜之前，真係估唔到自己會升到中六，因為自己讀書真心唔係勁，都預咗可能升唔返，到咗放榜嗰日，我真心緊張，點知出到嚟嘅成績都OK，我望到都放下心頭大石。我見到有人喊，但佢唔係因為升唔到而喊，而係因為升到而喊。至於升唔到的，有啲唔出聲、有啲呆咗，場面真係好恐怖!
17. 圖書館暑期工
參加咗某機構嘅「暑期義工體驗計畫」，計畫就係類似返工咁，不過每日只係賺到車馬費，都唔知係好事定壞事啦，人工真係低到呢，但就可以賺到經驗。話說我去咗圖書館度做，學識咗點樣幫人借還書、幫手註冊新書、幫手註銷舊書，仲知點樣對付啲麻煩友，真係學到好多嘢。仲有呀，我識到一班好好嘅朋友，到而家仲有約出嚟玩、聚吓舊咁，但由於呢件事都唔係好關學校事，所以都係喺度收筆啦!
18. 傷害最深+大的愛情
今次可以話係最Hurt嘅一次，但避免當時人介意，所以都係唔多講啦，Sorry，其實我真係好想講，我亦都知道呢Part根本係最精彩嘅一Part，但呢件事嘅影響實在太大，所以我唯有以簡略為上!但我同佢而家已經冇嘢嫁啦!
話說我對社區中心嘅女仔冇感覺之後，就對班內某個女仔有Feel啦，點解?唔好講啦，一講就要一五一十講唒嫁啦，總之我出到情信、錄音、佢喺我鏡頭下嘅學校生活片都唔成功啦，總之我今次最努力但都失敗啦，可能嗰時佢已經有男友，所以正常都唔會理我啦，可惜我嗰時唔知，如果唔係我一定唔追，因為我一定唔會追有男友嘅女仔，好後悔。
亦都因為咁，影響咗我本身嘅朋友圈子，我好後悔，但我冇怪任何人，冇任何惡意，我只可以講得咁多咋，其實有好多細節，但我要尊重當時人，所以收筆!有咩想知就私底下問啦，睇吓你值唔值得我講你聽!
19. 第三次的友誼傷害
又係我友情圈子再受挑戰嘅時候啦，上面都講咗因為愛上咗某女仔而影響日後本身嘅朋友關係。再加上中四時同人絕交，佢哋之後出去玩，都冇再叫我啦，因為要避免尷尬，你問我傷唔傷心?緊係傷心啦!所以我到而家都好內疚、好唔開心，因為呢段友誼係我親手破壞，你哋討厭我係應該，因為我真係做得唔啱，而家每次提起個心都酸一酸，但我無論講幾多次對唔住都冇用，我只求你原諒我，但唔渴望你哋會好似以前冇事發生咁樣對我，只希望我會留比你哋一個好印象，再見(^_^) 感謝你們的美好回憶。
中六(6A班): 全新生活
請閱讀下一篇Blog
|
