偉仔真係型到跌渣！
唔在意身高其實扮美周郎都算過關。
但金城武做孔明就勉強左啲，
孔明比一般人印象係智冠天下、運籌帷幄，
足不出戶而知天下事、「臥龍」，
實在好難唔神化左佢，
但偏偏喺赤壁佢又唔係主角。
孔明o既形象應該係鋒芒內斂o既智者，
金城武比較跳脫，樣後生唔成熟，唔多適合呀。
不過都要睇佢表現點o既，
話唔定會有驚喜。
其他角色都幾得人驚，
張震做孫權OK，
胡軍扮趙雲直情嚇死人，
毫無英挺之氣！
打得多無雙真係接受唔到。

揸車唔會暈車，搭車就會暈車，
咁唔知我一路搭車一路玩孖寶賽車會唔會暈車呢，
下次要試下先得。

唉葉童。
真係年紀大嘞，
見到佢個眼妝就好無力！
唔關棚牙事，
根本唔認得佢樣嘞。

我細個都算睇佢大。
無線買過套台灣拍o既《倚天屠龍記》黎播，
我諗好多人果排都有追啦，
馬景濤做張無忌，
周海媚做周芷若，
葉童係做趙敏/敏敏穆特爾！

cast得最好係周海媚，
太屈機，連金庸自己都話佢係完美人選，
完全做到周芷若楚楚可憐但其實滿懷心計o既感覺…

圖係張翠山同殷素素造型…
成套最唔明係點解要搵返同角色做佢兩個。
可能想表達兩代孽緣o既巧合啦。
葉童做趙敏勝在討好，
趙敏其實好可愛，
同周芷若對比o既係，
趙敏表面形象係個奸詐妖女，
但對張無忌就最真最坦誠(後期)。

仲有另一套劇最深刻o既，
係喺亞視播o既《新白娘子傳記》，
呢套係我第一次接觸到《白蛇傳》。
我好中意《白蛇傳》個古仔架，
淒美程度同《梁祝》差唔多！
我仲記得睇過徐克拍果齣《青蛇》！
好似係張曼玉做小青，
好想睇返。
希望以後再有人用呢個題材。

趙雅芝做白素貞。
以我年紀追得及佢所拍o既劇，
呢套應該係唯一一套嘞，
趙雅芝有幾靚真係唔使多講啦！

葉童反串許仙。
細個對反串呢樣嘢冇乜概念，
所以間接好留意葉童。

黃子華又有show！
知道香港啲fren訂左飛去睇果晚，
我發夢自己都去左睇！
可能因為唔開心，
夢入面坐我後面果條友好煩！
係咁踢我張凳喎。
發個夢都唔比我稱心如意…
唉…如果我遲半年先返去咪好囉…
唉…黎美國搞啦個show…
再唔係就快啲出碟！

睇緊佢套《奸人堅》！
一如以往tvb垃圾師奶劇一套，
點解可以咁多年都毫無進步架呢，
除左黃子華偶然幾句對白好笑囉，
好明顯係為個show鋪人氣而拍架嘞，
真係睇到一地雞皮，
點解我哥可以睇得咁投入？

冇方向感冇到我咁都算智障o既一種嘞。
如果余文翰係同我一齊喺大陸蕩失路，
到今日可能已經同佢蕩左去青海啦掛。
今朝喺Forest Theater同Ryan點完數，
入Battle Park搵下有冇嘢要啦，
天氣好涼，郁動下都唔錯喎，
哼起歌來添呀拜託。
真箇秋高氣爽，景色怡人…
…咦！我行過左幾多個分岔？！
行行下完全唔知自己喺邊，
周圍都山呀河呀樹呀草呀咁，
完全唔見周圍有地圖，
傻架咩！Park出面就放地圖，
Park入面一張都唔見！
喺Park出面就唔係蕩失路啦！
行左好耐最後卒之都見到馬路，
跟住沿住Park外圍慢慢行返campus。
以為自己拍緊Cast Away！
歷時一個鐘以上，去到再meet Ryan佢仲未到添…
都好彩，搵到幾樣嘢，我記得起碼佔3分。