去吉野家試下食，
名壽仲好食過佢！
或者我美化左回憶啦，
記得中學時去名壽有牛丼食，好好味。

又去婆婆度，
幫佢搞唔知乜戶口啲嘢，
勁麻煩！我理財頭腦好差。
老人家記性差正常，
但見婆婆同一樣嘢講完又講咁多次…
嗌我食金莎嗌左五、六次…
有啲心酸。

夜晚去大伯度，
一齊去深井食燒鵝。
阿寧高到吖！
上年eva返時仲未高過eva，
今年已經過左佢啦，
我好似高佢少少咋陰公…
細個玩埋一齊，
但大左就生疏哂，
見佢成日同菲傭loida講嘢，
成晚粒聲唔出，
都覺好難攀談。
劉盛譽就好得意，
話咁快7歲，乜都識講嘞。
一返屋企就跳跳札，
好似過度活躍咁！
真係鄧阿auntie慘。

出深水埗去探婆婆，
5年冇見，應該唔記得我個樣啦，
見到佢仲健健康康咁好開心，
唔係行將就木咁，我諗我會忍唔住喊。
一齊去飲茶，係咁夾嘢佢食，
但婆婆就係咁唔食。

喺附近順便剪左個7頭。
返到婆婆屋企，一切依舊，
但係覺得地方細左好多，
因為我對佢屋企o既記憶仲停喺細個果時。

執執下嘢婆婆喺度話說當年，
老人家記憶冇咁好，
零零散散，我理解到六七成啦，
原來當年婆婆讀書時睇到
某個唔知邊個o既日記…(偷睇？)
話做人要努力，唔好做社會o既寄生蟲，
比到婆婆好大震撼，
所以發奮學習，閑時睇好多書。
當時廣東鄉下，冇一個好o既醫生，
喺我太婆生婆婆時得左啲唔知乜病，
發燒，到最後仲有精神問題添，
因為咁我婆婆就立志做個婦產科醫生咁，
最後亦都如願，喺大陸行醫十幾年。

之後日軍打到黎，
我太婆、婆婆走難黎到香港…(好似)
到我媽出世、我出世o既幾十年空隙，婆婆倒是沒提。
婆婆係咁數佢個大女青鷥(我大姨媽)，
話佢又唔肯做嘢，淨係顧住個女喎，
好奇怪，明明係上幾代o既人，
呢方面竟然一啲都唔守舊。

講到不過黎到香港搵唔到錢，
其實自己都冇面，
真係汗顏，只怕自己都唔係搵錢o既料，
唉，婆婆喺果個時候做到醫生，
我諗難過依家百倍，
我以婆婆為榮。

婆婆前排跌親腳，
時不時悔氣喺度講「等我百年歸老…」
真係心中有啲難過…
我大姨丈阿佳喺香港做裝修地盤，
但唔多黎婆婆度探佢，
我哋話嗌佢黎美國一齊住，等可以照顧佢，
佢又唔肯，話慣左自己…
學黃子華話齋，做人最衰就係唔知自己幾時死！

黃昏時分到左香港，
成程飛機，
好似18個鐘都冇離開過陽光。

踏上香港土地，
毫無真實感，
畢竟已經5年啦，
不免有啲疏離感。
之前o既十五、六年喺香港o既生活，
好似統統升格哂做童年記憶。
不過一搭返巴士，
以前o既記憶不停湧上心頭，
273A，碰巧係hwy 40我返大學o既exit#，
呢班車經華明、彩園到上水火車站(好似)，
我中學四年日日都搭。
景色好多都認得，
亦見到好多轉變。

由景盛苑去粉嶺站果條路起左蓋，
今次返黎住o既蔚翠花園就近上水站。
見識到成日比人講o既
「未落哂車啲人就逼上車」行徑，
行人行路好快，成日驚阻住條路。
有啲唔習慣，變左美國大鄉里添。
喺他鄉有過覺得非要返香港生活不可o既時候，
但慢慢，自己都唔係咁肯定。

carol生日快樂！
我哋半夜十二點sneak入佢屋企玩surprise喎，
跟住去左Fast Eddie's，
我冇帶ID…好彩冇收ID？
幾個人去左督波，其他喺吧枱飲酒…
醉左o既人真係好好笑，
又坐地下又大嗌stop sign之類咁啦，
變左細蚊仔，好好笑，
所以都係做少飲果個好，
唔係邊有得笑。

努力左12分鐘o既結果，
同阿彭砌o既
佢就due個ppt我先聊佢玩game，
損友咪係我呢啲囉。
咦原來啲jigsaw痕我cap得切，
見淺淺哋，仲以為冇左嘞添…

可能自己都孤單o既關係，
好中意電影入面o既solo，
演戲基本上係要呃觀眾，
但相反一個人獨處時係最誠實，
好矛盾喎，所以獨角戲立見真章，
港產我諗起阿飛正傳最後果幕，
雖然我未睇過套戲…且我邊有咁老，
但呢幕成日有人提，而我覺得好有味道…

啱睇返Leon, the Professional，
Jean Reno型銀到呢，
點解可以咁傳神！
喺接納Mathilda之前有幾場得佢自己，
抹槍、飲奶、sit-up，
樣樣都做到好有說服力，
根本就係個一板一眼o既殺手。

仲有the Lives of Others o既Wiesler，
有幕係講佢監視完個作家，多姿多彩o既生活，
返到屋企對住o既係冰冷o既屋企，
自己整o既嘢食，同埋部電視機。
可能係我想像，但我覺得自己真係睇到Wiesler o既空虛。