今次要講既就係我近期最愛既牌子 - Nature's Gate (天然之扉)!!
小妹係用一個新既牌子之前，都會上網搵下有關佢既資料，望下邊度生產，有無d人comment話有問題咁~而呢隻牌子係1972年成立，直到今日係美國都仲係天然有機產品銷量No.1~!!大大話話都over 40年，真係唔係講笑~!!
以前見到Nature's Gate個外觀真係唔多討好，成枝洗潔精咁款，真係完全吸引唔到我去買~!!而家會留意佢，當然係因為佢有機，同埋小妹一直有一個髮質過幼既問題，所以我一直都唔多敢染髮，怕越斷越多~同埋我d頭髮咁幼，薄到好似紗咁，唔係是是但但一枝洗頭水可以滿足到我ga啦~!!
係HK買枝好少少for fine hair用既shampoo都要over $100，其實都幾肉痛，但唔用呢d專門既shampoo，我d頭髮真係唔見得人~!!
發現左Nature's Gate之後，我就揀左一枝應該岩我髮質用既洗頭水~!!我仲係台灣網站搵左少少資料﹕
Nature's Gate呢個牌子不含矽靈 (會令頭髮逐漸喪失彈性、毛孔被阻塞、更會令頭皮既毛乳逐漸萎縮，頭皮容易發癢，甚至可能併發落髮、脫髮的後遺)、SLS、SLES、動物衍生成分、化學防腐劑、鄰苯二甲酸鹽、人工色素 <-- 老實講，有d我都唔知係乜~!!
但呢個牌子不含任何動物成分，堅決反對動物實驗 <-- 呢樣係我最buy既，因為我本身好鍾意小動物，真係唔覺得人可以咁殘忍去對佢地~ 就係咁，我揀左下面呢款for我d幼細頭髮用啦~!!
Organics Herbal Blend - Lemongrass & Clary Sage (for fine hair)
有機菁萃髮絲豐盈配方
"有機檸檬草給予活力，賦活清新，有機迷迭香幫助清新細軟扁塌的髮絲，幫助增加髮絲豐盈，小麥蛋白幫助修護，平順分岔，有機鼠尾草精油幫助健康頭皮與髮質，讓髮絲柔柔亮亮，好好梳理!" <-- 睇到呢段野，已經心花露放，唔知係咪真係咁掂~
shampoo質地比普通洗頭水較結身，透明既shampoo一倒出黎已經有淡淡檸檬草味，我好鍾意呢陣味，佢係好清淡個種香味，當然唔會好似洗潔精咁啦~!!
話晒係organic product，通常都會比較少泡，溝d水睇睇先~d泡真係唔多......
睇埋conditioner個質地......陣檸檬草香味仲勁過shampoo~~超like
係手試左幾張相，之後小妹就當然即刻洗返個頭先啦，洗頭照就唔post得比大家睇啦~
我呢隻白老鼠親自試左之後，有以下comments﹕
1. shampoo倒出黎係結少少，但可以接受，完全無問題，因為隻味實在太吸引，洗完頭個人都精神晒~
(因為小妹慣左朝早起身洗頭，洗頭一刻個人根本未回魂，呢陣檸檬草真係幫到我提神，哈)
2. shampoo雖然唔會好多泡，但洗個陣好清爽，用完唔乾~!!以前我試過其他牌子既豐盈系列，佢地d shampoo會洗到個頭好乾，d頭髮旱d，望落去就緊係多d啦~
3. 對於我呢d幼頭髮既女仔黎講，最怕就係d conditioner用完之後，過份補濕同太潤，咁樣我地d頭髮會好易"立'，但今次小妹用Nature's Gate呢隻conditioner，完全無呢個問題~用完d頭髮好滑，但又唔會太潤~
呢款shampoo & conditioner小妹已經用左一星期，效果非常滿意，平時我返工去到4-5pm左右，個頭都會出左少少油~但而家完全無左呢個問題，到收工個陣，個髮型都仲keep到，唔會塌晒落黎~!!最重要係以organic product黎講，佢一d都唔貴，仲好抵用~
總括黎講，Nature's Gate既shampoo & conditioner直情係Miliza既救星~!!我d朋友而家都開始用緊呢個牌子，大家都用唔同款，下次我又問下佢地用成點先~ |
~不過小妹用過既眼影牌子唔多，我唔可以將e.l.f.同所有牌子比較~有人話e.l.f.既眼影，單色一盒盒個款做得仲出色，有機會我一定要再試埋~!!到時再同大家share~!!
