由於宋Sir取消今日的英文補習,唔使寫家長信而開心,慶幸,但原來唔係咁嫁.
一早就起身,啓程去竹園的救世軍,今日D人好早就到左,派左每人一件青蘋果色的T-shirt,仲以為即刻換,原來要等到去到會場先換,坐響度,無野做,Apple掛住睇多啦A夢的漫畫,出發之前,再練下D太極招式,聽張姑娘簡介下流程.
以為個表演場地係係露天的，原來係室內的．到達理工大學的綜藝館,好靚,好大,Dtoilet又係咁靚,好乾淨,仲有兩種tissue俾你選,真係不愧係大學.練習左幾次親子十式又無野做,果兩個F.6的帶埋D功課去做,好醒目,Apple就唔識爭取機會啦,到左11:00am終於換衫啦...........之後又去聽下敏Miss,Lori,嘉娜同寶萍將會在記者招待會的講稿,她們好勁啊,我好期待呀...........然後又無野做啦.........
好早就去食lunch......中心請....去理大的canteen食...12:05pm到,要12:30pm食完,好準時.....幾好味啦.....食完就即刻入會場準備,去踩場,第一次採排,既然已經覺得有D緊張啦,採排左兩三次,就返回自己的座位,Apple,敏Miss,Lori, 嘉娜同寶萍卻去左個記者發怖會,Apple因為篇感想登左出來而上埋去,我好想都去埋一份,去睇下,好妒忌Apple啊,我想今晚可能會在電視度見到她們,好期待啊......又無得去睇喔,坐左成個鐘,好無聊,訓下,又溫下vocab,又睇下人地採排,見他們好似無咁齊,都覺得安心D,一直坐到兩點幾,記者會先完,Apple她們都返左黎,可惜Apple話無出鏡,有D失望,聽Apple講,她們三個講得好好,好想即刻睇呀,但又話無TVB同ATV去,就更加可惜啦.然後就出去接阿健同老逄,好多謝你地黎支持我呀,你地太好啦!!!我今日同梁智鴻擦身而過呀,好近距離,雖然他唔係我偶像,但都算明人一個呀.
開始果陣時永遠都係咁悶的,係D嘉賓的天地,然後就係表演隊伍出場,得三隊,當然我地係其中一隊,而且係最尾果隊,見到第一隊表演果陣時,我已經覺得好緊張,個肚仲有D痛,好擔心到時唔知會點,唔敢話俾人知,好快,就到我地啦,都好彩果陣時無事.首先去接受獎狀,然後就開始表演.好考我地的速度呀,一頒完獎就要即刻返後台排勢,然後立即出去表演.咁大個女,第二次表演,但在香港,係第一次.未出去果陣時,好驚,但一出到去,台下黑晒,見唔清楚Ｄ人,所以唔驚.在台上那4~5分鐘,我對我自己說要去享受它,事實上,呢D機會係好難得的,我應該去珍惜它.但我一直在忍住笑,真的好想笑,知道阿健坐在邊,都唔知望唔望好,一望又即刻想笑,原來那幾分鐘好快就過左啦.......
返回台下,就無專心啦,個節目都快完,D嘉賓又陸續走,我就同人傾講.兩邊都係長者,拎左桂珍同文姐的電話,我都知我唔會打,但都無壞,結交左呢個女扮男裝的文姐為男朋友.明明係個館的冷氣凍,竟然懶係我,因為我個'冰'字,我唔記得她個姓,又出謎語俾我估,呢d都叫係長者?俾她玩....最後她都開估.
以為今日係最後一日大家一齊,原來仲有一次大家出來重聚.唔知點解,我唔捨得他們.說真的,開頭我真的不太喜歡,甚至想中途退出,次次出席活動都有d懶,但而家我想同他們一齊耐D,真的不捨得他們.本來我以為文姐好cool,不易相處,但原來她係咁識得玩人;志偉雖然動作仍然是那麼好笑,但他已盡左自己最大的努力;阿周係我第一個識的長者,下次唔好再識錯我啦!好多謝你教我的那只舞;還有.......
我驚我會喊........
之後返到慈雲山去買野,俾個老闆睇破我去左格價,好想搵個洞鑽....
|
