網友傳來奇文,對民主昌歐遊之政治圖謀頗費心思猜想,特留在文庫,待他日有空時翻出來笑吓;

奇文標題是一個"X還是Y"型的疑似選擇題,民主昌的標準答案當然是:

唔話佢知,等佢成日心思思!

網友提供的奇文出處在

http://forum.cyberctm.com/forum/viewthread.php?tid=399477&extra=page%3D1
內容:
吳國昌臨立法會選舉出游是做秀還是民主

近聞現任立法會議員、新一屆立法會參選領軍人吳國昌攜家人出游歐洲近十日，頗為唔信，待登入新澳門學社網站吳國昌日誌睇下，方知果有此事，而且仲睇到有人“忙裡偷閑”專登貼出其在歐洲游嘅零星照片，返頭仔細諗下，唔得唔為吳生之煞費苦心、精於算計深深折服！
四年一屆嘅立法會選舉可謂萬眾矚目、競爭非凡，宣傳期未真正到來，各組別都早已進入狀態、積極備戰甚至於摩拳擦掌、躍躍欲試，網上時事討論區中更是已經人頭攢動、硝煙迷漫，值得一提嘅係，向來佔據網上世界半壁江山、為吳生搖旗鼓氣嘅一幫“民主友”又點會點會在呢個關鍵時刻缺席呢？但係，但係，但係——但係吳生郤“突發己想”地決定攜家人出游喇！
好一個淡泊名利、與世無爭嘅參選人！但係點解佢早唔出游晚唔出游，點解“法輪聖火”傳到澳門果陣佢唔出游、香港“泛民”來到澳門果陣佢唔出游，偏偏挑呢個關鍵時刻“輕鬆”抽身而去？唔通佢真係以為選唔選得到都無所謂？唔通佢就唔擔心自己殫精竭慮換來嘅“民主”被建制派“付諸東流”？仲還佢以為自己早已為千萬選民內心認同，根本唔曬做野去準備就當選無疑？又仲還佢以為自己歷史使命已經完成可以全身而退呢？
我諗應該都唔係，呢個正係吳生嘅偉大精明之處，佢一邊擺出仿佛淡泊明利、置身世外嘅姿態，一邊又暗中籌劃、運籌帷幄、極力備戰、從唔放過抹黑對手嘅機會，而且出游本身正係佢呢次籌劃競選中嘅一個重要組成部分同自以為是嘅“亮點”，佢對呢次出游寄予厚望，厚望呢種“超凡脫俗”嘅姿態能夠令到果Ｄ對政治呢種野了解唔多而又心存幻想嘅選民陶醉！只係Ｄ選民就唔知，吳生真如自己所講係“忙裡偷閑”呀，而且佢真係好忙好忙好忙——喎！
其實，吳生一味諗住通過出游呢個做秀行動黎“陶醉”選民，反而忽視咗一個好重要嘅問題，呢個問題就係民主本身。民主制度本來自於社會，民主係一種狀態更係一個過程，民主係在社會中每一份子充滿熱情、積極參與中得以體現並發展完善，民主係世俗嘅，民主唔需要亦唔能夠超凡脫俗！吳生選擇超然真係對民主制度一個最大嘅嘲笑同戲弄，一個本身唔尊重民主、視選舉如兒戲嘅人，又點能夠成為一名稱職嘅民主踐行者？