交通事務局 汪雲 局長：

 自從七月一號「新巴士模式」以嚟，坊間罵聲四起，由扣錯錢、班次混亂至新車死火等澳門人未見過嘅千奇百怪現象乜都有。自舊模式、臨時合約至現時「新模式」，交局本應有充足嘅時間準備對付人手不足問題，交通事務局自從成立以嚟，集大權於一身，唔可以再抵賴係「跨部門溝通」問題。新澳門學社總結市民關注嘅公交問題如下：

 一、公交何來優先？

 自從「新模式」實行以嚟，居民嚟繁忙嘅中區一帶經常見到「火車」現象，一部部巴士排隊等埋站。塞車問題嘅癥結係私家車落地冇王管。「公交優先」只係口號，交局成立咁耐未有過實際措拖去控制車輛增長。俾巴士公司多出啲車，最後都會喺旺區樽頸位塞到陷曬，因為條路根本行唔到咁多車。交局成立咗超過三年，咁基本嘅問題都冇嘗試過去解決，係挑戰緊澳門人嘅耐性。

 二、班次、人力不足、巴士冇力行...

 雖然個別時段中區火車排長龍，但係好多車班次根本同巴士站寫嗰張出車時間唔相同。好多居民都覺得俾巴士站張紙呃咗。巴士公司辯駁話「人力不足」，如果真係「人力不足」就唔應該俾佢承包咁多主要線路！無疑，交局統理埋考牌職能之後，根本冇去重視過「考重型車牌等到蚊瞓」問題，如果有心做，應該增加資源投入，縮短排期時間加快考牌速度。新巴士公司對新入行嘅巴士司機，冇做足培訓，搞到係咁出現飛站、行錯路、撞車嘅情況。綠色巴士經常死火，更顯示車輛質素有問題，令市民質疑交局有冇認真驗車！今次巴士公交「新模式」，之前宣傳係威係勢，落場搞到一鑊泡，造成居民對交局產生咁大嘅期望落差。

三、「澳門通」壟斷夾擾民

 新澳門學社不斷收到居民反映，除咗用澳門通轉乘扣多咗錢之外，想攞翻錢原來要走去到「澳門通」公司冇雷公咁遠嘅世貿中心總部，分明擾民。好多居民廢事為咗一個幾毫走咁遠，所謂山大斬埋有柴，澳門居民權益最終受損「相當可觀」。

依加本地居民優惠車費都係透過「澳門通」完成，但係交局對澳門通公司嘅運作係無欲無求嘅，未曾見過交局有咩規管，目前轉乘錯漏百出，每次都只係交待事後點補鑊，但係從未未雨綢繆計劃一開始點去監管。

 四、莊閒不分

 新公交模式之下，交局貴為老闆，三巴變成承包商，按交局嘅指引同要求行事，有賞有罰無可厚非。點知，交局全無當家作主嘅心態，面對個別公司嘅差劣表現，竟有顏面叫公眾「體諒」，實在莊閒不分。咁樣「體諒」落去，你地交局勢必以應付公交亂局為由，大肆擴充人手同設備，實行主人服待惡妹仔。

對於種種以上嘅問題，學社好希望同你坐底傾吓探討，我哋想約你下個星期二(即係8月23號)下晝3點。

新澳門學社

2011年8月19日