兩年又過去了，又到Yoyo升中了！感謝各方親朋好友的祝福，Yoyo獲派第一志願的中學，亦即是Crystal和Ryan就讀的那間，感謝上天，三傻又可以一起上學了！！

昨天Crystal和Ryan需要上學，Ryan爸特意請假和我一起跟呀妹回校。呀妹學校今年派位結果都十分理想，Yoyo入到的那間中學，全級有四位同學也入了，而Yoyo的好友Wingki也是其中一位，兩位好朋友又同校了，我跟Wingki媽都十分開心！這間中學在Crystal那屆收了十個，在Ryan那屆收了八個，想不到在這屆，竟然只收了四個！呀妹真的十分幸運！知道結果之後，立即打給親友們報喜，但我們不能在學校逗留太久，因為我們要到迪士尼慶祝呢！於是趕快會合Crystal和Ryan，吃個quick lunch，回家換好便服就向迪士尼出發！

去迪士尼是妹妹的意思，Ryan爸跟她說，無論考到哪一間學校，也應該好好慶祝一下妹妹升中，於是早在六月就訂好酒店，9-10/7在迪士尼慶祝。如今得知獲派第一志願，特別玩得開心呢！！去迪士尼玩，也是一個不錯的暑假節目，今次的主角是Yoyo，Ryan爸也幫愛囡慶祝，任她選擇禮物呢！我們第一天在下午入園自己玩，第二天會合Jeff仔一家，晚上看畢煙花才離開樂園，還即興去食糖水呢。昨天零晨時份才回家，有得玩就唔覺累！今天Crystal要回校，Yoyo就要註冊，Ryan選擇陪呀妹註冊，於是三傻一起回校，也是首次三傻一起到中學呢！

Yoyo，獲派這間中學只是一個新開始，未來要繼續努力呀，相信你讀得很開心！加油！！

今天是Ryan爸的生日，待他放工後我們便驅車前往慶祝地點。最近，我們喜歡與我家姐－Panny姨媽一家，每逢家中有成員生日，就約定於生日聚一聚，吹吓水。當然，很大程度是讓三傻可以與Jeff仔和Jason表哥見面，但我和Ryan爸，Panny姨媽和Funny姨丈，大家都有源源不絕的話題，我們大家都覺得兩家人十分合得來。感恩上天賜我這位好家姐！
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

其實Yoyo在今次的非呈分試，十分輕鬆，而溫習當然無平時考試的多，但聽她說，她滿意自己今次的表現（未派卷喔）。我平時主力幫呀妹溫習，今次亦輕鬆不少，有時間做吓自己野，打理屋企竹等等。至於Ryan，中二的他今次自己表示搞得掂，不用我插手。其實我無刻意想幫他溫，但驚他辛苦，結果他表示自己應付得來，大個仔了，加油！Crystal的考試十分漫長，因為選科後的關係，並不是每天也要回校考試，有些科目也可能有較長的時間準備，所以我都叫佢唔好俾甘大壓力自己，時間有多，周末都跟我們去鬆一鬆。

上星期的端午節，Yoyo剛剛考完試，Ryan的考試才開始了兩天，Crystal也是。當天是公眾假期，Ryan爸有假放，佢當然想行街啦！問過家姐和阿哥，佢地都想行，考試方面溫唔溫得切呀？佢地話得，於是開開心心去街去！當然，Ryan爸錫住佢地，不想去甘遠，玩到心散，於是建議去行三傻最愛的IKEA，商場屬於區內，Ryan爸揸車，十分方便。開開心心又過了一天！

聰明的Blog友們應該記得昨天是我的生辰，520這個「大日子」，嘻嘻！感謝Ryan爸的安排，又去咗刷餐勁了！一年又一年過去，最大的生日願望都是一家人身體健康，平平安安，整整齊齊，當然最好三傻成績Keep住啦！明明是我生日，卻又好像三傻生日，希望他們學業進步等等，做咗c9咁多年，慣了！嘻嘻！
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
踏入五月，又是夏季來臨的時候，最令Yoyo媽我頭痛的，就是炎熱的天氣了！三傻勁怕熱，又大汗，次次出完街回家都好大陣汗味。記得以前提過，三傻怕熱，夏天出街最怕行室外地方，家中冷氣常開。我一點也沒有誇張，我自己本身也怕熱，誰不知三傻更怕熱，出街只行室內，冷氣商場，都已經不是就不就他們的問題，夏天的確讓人（至少是我們家）變得更懶！！三傻之中，兩個女就最大汗，Ryan都怕熱，但沒有家姐妹妹咁大汗，加上Crystal和Yoyo都係留長髮，仲要係齊陰，頭髮又厚（似Ryan爸）本身已經咁大汗，比着我都好難頂得順！在家中，由其是夏天溫書時，冇咗冷氣真係人都燥啲！

來到五月，其實Yoyo揀中學方面已經完成得八八九九，當然心儀的是家姐阿哥讀緊的那間（好朋友靖欣的妹妹靖橋也選了這間，因為家姐靖欣也是在這兒讀書的），但都怕入不到，安慰定Yoyo，要揀間都喜歡的做第二志願。今年比較花得多時間的，反而是在選擇第二志願的中學，因為家姐阿哥那時，老師派定定心丸，他們說沒大問題的，但今年到妹妹，因為多咗人揀呢間，加上收生方面好似減少咗，所以都搵定一間我和Ryan爸、Yoyo都喜歡的第二志願學校。四年前和兩年前的這個時候，我也有跟Crystal和Ryan去參觀比較符合我們意願的其他學校，但印象中都只是去參觀了一間，去擺在第二志願。今年呀妹，可能有同學仔一齊，都去咗三、四間中學參觀。對於第二志願的學校，都幾頭痕，各有各好，結果最後是選了當年阿哥排在第二志願那間。

忙完揀學校，就要開始諗諗暑假的活動，因為小六最後一次考試不如以往的重要，加上已經揀好學校了。問過Yoyo，她今年想參加的興趣班是羽毛球和學魔術，這兩樣興趣班是和好朋友Wingki一起選擇的，兩個想上一項運動班，Wingki對羽毛球有興趣，Yoyo也是，於是一致決定去學。至於魔術，竟然是Yoyo自己提議的，她想學新野，加上學魔術實唔會悶，又好玩。咁大期望呀！同Wingki一齊，阿女真係乜都好順攤，如果學羽毛球係我提議，Yoyo實拒絕。同Wingki識咗三年，我同Wingki媽都識咗兩年，大家都好熟，於是齊齊報名去。第一年同好朋友Wingki一齊報興趣班，希望Yoyo玩得開心啦！

今晚Ryan爸夜番，有排都未開飯（三傻放學番黎已經食咗好多零食）。加上Yoyo媽我越黎越冇記性！等我快快手打咗呢篇Blog先！
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

Yoyo的最後一次報分試結束，一星期後就是去畢業營的大日子。畢業營是每個小六生畢業前必經的事，今年輪到呀妹了。我個Blog唔係第一年寫，睇開的網友們肯定想講：咦，又唔見你寫下Crystal和Ryan去畢業營嘅？！哈哈，絕對不是偏心，而是寫他們都無野好寫／好睇啦！我家Crystal去畢業營流連忘返，Ryan有同學仔陪又玩到癲曬（哈哈，其實他這方面就絕對是一個男仔會有的性格）都無特別啦！我不是說Yoyo這個旅程不順利，只是大家應該會比較想知道一個痴身的女孩第一次去Camp的事吧！

考完試後，開始準備去Camp的東西，我也有搞笑問過她會不會想媽咪／爹地陪，她竟然好認真的想了一會，支支吾吾，我心想着：哎呀！自己一個得唔得架？！去Camp前幾日，也有家長學生跟負責老師的Briefing出席，絕無誇大，去Camp都要家長聽briefing，Ryan嗰時都無的，聽講是上年才增設，內容是教小朋友遇到什麼時要點點點，如何聯絡家長等。現在的小學生真的一年B過一年，去畢業營，家長最緊張，真的聽到有位家長私底下問可否跟去！所以，老師也提點大家：無論如何切勿想辦法入營跟小朋友見面。

終於到出發的大日子，以我的觀察，傻妹當然果然又很晚才能入睡，但可能平時上學都早慣，見佢起身又無話好眼瞓喎！Yoyo很早就要回校集合，但依通告所見是下午才入camp的。當然，依安全所見，梗係叫妹妹到咗方便就打過電話俾我地啦！郊外地方，老師一早在Briefing提過一定收得很差，甚至收唔到（訊號），奉勸各位小朋友唔好帶智能電話去，以免會唔見，拎個普通電話去便可，於是我地都只係俾咗個舊電話Yoyo帶去。當日Briefing家長們還有一樣注意事項，老師Save曬家長係回條留嘅電話號碼，開咗個Whatsapp chat group，俾家長跟進吓情況，如有需要，可以即時查詢子女的「近況」，即是有咩唔對路囉！其實校方並唔鼓勵呢樣野，即係去咗camp都仲俾家長可以知道發生咩事，但係家長熱烈要求加設呢樣野，以安全起見，校方認為尚可接受。講呢樣野嗰陣同學係同家長分開咗聽野架，即係Yoyo係唔知架。噢，離曬題添，講番第一日去到，Yoyo果然係聽話即時打咗俾我，仲話有啲失望，無得Whatsapp即時話我知有咩玩、有咩食，又話阿邊個邊個同學帶咗佢部智能手機黎，如果收得到，就要同我Whatsapp咁話喎，咁你個friend部電話咪好忙！（Crystal、Ryan小六年代Whatsapp都未出，你地已經好幸福喇！）臨瞓前，再打咗次黎，話要同我傾陣計，又話要同家姐阿哥傾陣，好想知佢唔係屋企呢幾個鐘，我地做咗啲乜野，傾傾吓，為咗防止「唔對路」的情況出現，都係叫佢收線快啲瞓覺，佢就依依不捨咁收線。

第二朝，又收到佢電話，今次我唔係屋企，去咗同Ryan爸撐枱腳食早餐（唔洗送佢番學呀嘛）。打唔到屋企電話，打到手提嗰陣同我講：打唔到番屋企好驚呀，好在手提打得通啫！傻妹，你去咗camp我唔出得街架咩！咁早打來，又問我做咗啲咩，傻妹，朝頭早會做咩呀？第一次外出，好好奇自己唔係屋企爹地媽咪家姐阿哥會做咩。Crystal同Ryan就唔會喇，可能平時都會出開街。至於妹妹，其實佢未真係叫做自己出過街，一來佢一定要我陪，二來就係佢暫時無咩需要自己出街！有時我都會話，你六年級啦都，得閒約吓同學仔玩啦（當然是指室內和安全的地方啦）試過幾個同學約去區內一間會所玩，佢話唔係幾識路，要我帶一次先，點知一路同佢去佢都係識路的，始終都係要我陪。（去會所的路很安全，有馬路，但有紅綠燈，佢絕對係識過的）

嘻，離曬題喇。做番個總結先，三日兩夜Camp打過十次俾我，未計番黎途中又打俾我幾次俾我話去到邊度，其實成個camp都幾好，當然我梗係有留意嗰個chat group啦，果然有好多家長查詢、同老師交流，搞到啲老師好忙。Yoyo都玩得幾開心，係鐘意打俾我啫。可能真係我要求高啦，打俾家長可能只係好小事，因為叫極唔好打都大把學生會打！

上次在更新網誌的時候，發現原來久未更新「公開」的網誌，也就是沒有被我加為好友的網友們，在這個月也看不到我的更新呢。我不會阻止我不認識的人到我的網誌參觀留言，但現實生活中我不認識的人，我並不會加為好友的（Qooza網誌）。十分抱歉！不過未被我加為好友，也會看到我的網誌更新的，不用擔心！只不過被我加為好友的，能夠看到較「私人」的網誌。所謂的「私人」，其實只是有相片在內的網誌，和偶爾有跟親友／朋友仔的合照。我一向的做法是，在互不相識的情況下，也能透過我的網誌簡單地分享一下生活鎖事。
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

是次的分享，是有關我家三傻的。我發現，我的網誌大部分都經常提及他們，可是網友們卻未有機會看見他們的樣子（我家三傻很害羞，否則我也一定會post一些他們的照片！）所以打算簡單談談三傻的性格，讓網友們對他們有一個簡單的印象吧！

先由家姐說起，Crystal是我的大女，由於她之下還有兩個弟妹，因此她自小就很獨立（某些方面），例如照顧自己，即是刷牙、洗澡等，我印象中她3、4歲已經可以自己做，不用我們幫忙。當然，她是大家姐，根本就花不了太多的時間在她身上，這點我有時回想起也很內疚，原來她毫不介意，真係大個女喇。Crytal是大女，小學、中學初期，兩個細佬妹都未升上小學／中學，這時我就有幫她溫習，跟功課，到Crystal小六，Ryan和Yoyo只是小四和小二，我那時主力幫她面對升中，也慶幸當時的決定沒有錯。校內方面，我一向認為Crystal的成績較好。至於校外方面，小時候的她也曾學過不少興趣班，因為家姐有主見，但又不想違背我們的決定，於是每樣興趣班也有嘗試，可是多數也表示沒有興趣，我們也不敢勉強她。學過最耐似乎是鋼琴，無錯，連Crystal也有學過鋼琴的，當時兩姊弟一齊報，結果家姐也學了三年，後來她也不多想學了，加上臨近升中，所以我和Ryan爸也同意讓她放棄學琴。Crystal對學野真係冇濃厚嘅興趣，有時候專心讀書可能會更好吧。

認識我的Blog友們也知道，我家二少Ryan是一個非一般男生，很多人都因此會問Ryan爸也是否這類的男生，但他說他小時候也是頑皮的小學生，更是么仔，家人鍚到燶呀。Ryan自小跟家姐妹妹相處，他接受程度高，細細個Yoyo已經好痴身，當時Ryan也是大約5、6歲，家姐就很獨立，所以有時個妹猛要我陪，Ryan都唔會嬲，反而同我一齊陪呀妹（呀妹細細個已經係做乜都要人陪住嗰種）Ryan有耐性，唔會三分鐘熱度，好似學琴咁，同家姐一齊報，最初都係想佢地有樣野學，唔會咁悶，Ryan一學就學咗七年，真係估佢唔到。有時見家姐細妹都無咁長情，問Ryan其實係唔係唔想學，驚我地唔鐘意先唔講出黎咋？佢又話其實佢鐘意學琴，鐘意彈琴喎！三傻的性格不同，Ryan是一個極度無主見的人。小學時期，每逢暑假也例必幫他補興趣班，例必徵詢一下他的意見，他每一次都以「無所謂」作回應，他不是舉旗不定，而是他沒有對什麼太大的興趣，也沒有什麼特別想參加。這又不代表他什麼興趣班也不想報，因為他每次上課也十分開心的。曾經有一年，我對他說如果他不太喜歡上興趣班的，我就不去幫他報名了，豈料他卻嚷着要我幫他選擇一至兩個興趣班給他參加。

我的么女Yoyo，一個好痴身的女孩。由小到大，她也是家中的「大小姐」，凡事以她為先。我一向也很認同「么仔／女是最難湊的」，因為我家Yoyo是最難湊的！到她開始上小學，小一上學頭一個月的上學也不太開心，我問她為什麼，她說因為要跟爸爸媽媽家姐和阿哥分開好耐！真係傻妹！小一小二的學校旅行，家長可以選擇參加，Yoyo一定要我陪去。我說，這麼多朋友陪你還要媽咪，她很堅持要我同往，我便硬着頭皮一同前往，結果原來很多家長也一同前來，他們是擔心子女的安全，而我不是不擔心，是Yoyo一定要我陪她同往， Ryan爸鍚囡鍚到燶，叫我順個囡意，一齊去。為何我好似不是太想？其實我並不是不想，而是Yoyo小學去旅行，代表當時也在讀同一間小學的Crystal和Ryan也是去旅行，如果我陪妹妹去，安排就會好複雜，因為三傻都唔同時間放學。到了三年級，家長不能同往，Yoyo開始在學校方面獨立。Yoyo是一個很適合讀傳統小學的女仔，因為她服從性高，好聽老師話，鐘意接收老師的指令做野。係呀，我都知佢係學校好乖，係屋企蝦我地啫！Yoyo在主見方面，她比Ryan有主見，但也會有舉旗不定的時候。她喜歡參加不同的興趣班，也有的是她自己話一定要參加嘅，同時亦會無啦啦話唔想去上堂，又話攰又盛咁，當然唔俾佢咁做啦！所以我好清楚Yoyo嘅性格，佢絕對唔可以去傳統嘅補習社補習，因為佢一定會補補下突然間唔想再補！好在佢暫時都無咁嘅需要！

嘩！呢篇blog打到我對手好攰啊！有時間再繼續講相關topic啦！