早前都講過，下學期將會是十分忙，對於我們整家來說可算是一個考驗。隨着下學期只剩下個多月，我愈來愈忙，都沒有空寫網誌了，因為Yoyo的報分試即將來臨！家姐的選科簡介會在上星期舉行，家姐今次都算keep到成績，班主任睇家姐每個科個別的全級排名，認為家姐如無意外都可以揀到想讀的科目，希望如此啦，繼續加油！

時間關係講住咁多，遲下再update。

四月十六日，復活節假期後第一天上課。三傻很都遲了上課，由於Ryan爸的預言又應驗了：他們必定遲起，所以我打算揸車送他們上學。果然如此，於是上課的第一天有司機，三傻開心極了。Ryan爸知道三傻由曼谷回來一定累得很，又由於Ryan爸一早請了假並成功批準了，做一日半日家庭司機何樂而不為呢？一家五口齊齊出動，三傻各自回校後，我跟Ryan爸開心嘆早餐去，正！很久沒有二人拍拖去食早餐，開心開心！

從曼谷回來之後，忙碌的生活回復正常，並且第一日已經要接受分數的考驗。第一個回家的當然是Yoyo，她拖着疲倦的身子報告分數，因為中英數常四科試卷已全部派畢。她第一科告訴我的是竟然是數學科，她告訴我她有90分的佳績，在班上的排名是哽頸四。嘩，真係估你唔到！數學一向70-80分，今次竟然有9字，有進步，keep住呀傻妹！第二科是中文，她說今次中文成績只屬滿意，我以為是八十幾分啦（因為呀妹從來無一科話唔滿意，要求都真係幾低吓）點知佢話係92分，嚇咗我一嚇，唔係話拎咗高分所以嚇，而係佢要求幾時變得咁高架．．．之後是英文科（一如我所料的「高分在後頭」吖！）佢話今次個個都好高分，佢都OK，有91（當時我諗，唔係應該啲分數「節節上升」架咩？）原來佢係話最高都只係94，佢係全班第三喎。咁你又話個個都好高分，信邊句至好呀？最後常識科，一黎就揭曉，97分，佢話開心到痺，咁誇呀。

是年的五日出埠之旅，地點沒有變，仍是曼谷。年年去開，有情意結，加上都想三傻有得relax下，鐵定年年都黎一次！今次有點特別，就是Panny姨媽一家三口都會跟我們去。由於Jason大表哥要考dse，未能一同前住，這是令Jeff仔稍為失望。不過不要緊啦，有三傻呀嘛，四個細路唔怕悶，Yeah！

出發的第一天，假期已放了好幾天，這個懶妹Yoyo，係都要拖到前一日至做好所有功課，結果呢，該日就由我為她執拾行李。三傻呢，係都要一人一個喼，結果五人行四個喼，幸好Yoyo的是較小型的喼，Ryan的也很輕便，只有Crystal的是大喼，所以細妹細佬有咩裝唔落都擺埋入去。由於多喼關係，沒法子搭巴士了，辛苦了Ryan爸深宵都要揸車（我們的航班是早上8:00起飛，所以很早要check in）約好Panny姨媽一家三口在機場等。他們都是揸車入機場，結果他們早到了，我們反而遲了五分鐘，因為成家人都慢吞吞！

到達機場後，第一時間寄好行李，再搵吓有咩地方食早餐。由於咁早無咩餐廳開咗，結果去食美心算了。

上機都無咩特別野啦，今次搏懵為Jeff仔申請要兒童餐，結果又OK喎，Cathay真係唔錯，個兒童餐又豐富，又有精美禮品！另外今次我們坐中間個行，兩行的中間四個位，剛剛好有八個。四個細路坐晒前面四個，我們四個大人坐後面四個，Fit！

都係住番上次間酒店，三傻熟晒架喇，至於Jeff仔係兩年前都住過一次，印象較模糊，結果三傻猛同Jeff仔sell呢間酒店！我地兩家人都勁Like呢間酒店，服務一流，設備一流，房內免費wifi任用，房間面積大，有廳有open kitchen，仲有洗衣機，可以話係無得彈！位置係市中心嘅中部，好近附近的大班商場。至於去食晚飯嘅地方，一般都打算搭的士，泰國搭meter taxi幾抵架，不過今次有八個人，據我所知，泰國的士載人係無limit架，你坐得入就得，但係多一兩個就無所謂啫，今次都抆水啲，都係book車去穩陣呀。結果我地決定去遠嘅地方就Book車，例如食晚飯嘅地方。近近地都唔book喇，Ryan爸話最好就行路去喎！

三傻考完試之後，連續幾日有節目加上忙個不停，今日才可偷吓懶寫吓Blog。今個Holiday共13日假期（4/4-15/4），仲要係計埋啲星期六日至有13日。我們今年其中有五日是「出埠」（以往是四日）。五日之前的時間已差不多Full Booking，五日之後時間所餘無幾。所以我告訴三傻，今次多咗一日，務必要係嗰五日之前做好晒功課。但萬萬想不到五日之前的時間竟然有數個活動，再加上Yoyo學校為了催谷小五小六，竟安排一本又一本TSA練習在放假時完成！（小六更加要回校為TSA補課）Yoyo以往復活假功課得幾份，放假時十分hea，現在竟然增加了那麼多，還有時間只有幾日可以在家做功課，真的有點擔心她做不完。Crystal功課一向很多，Ryan升中後也多了復活假功課，三傻今次要快快手做好功課呀！先至有一個我同Ryan精心安排的開心Holiday！

題外話，早兩日我們再闖OP去！為什麼呢？是關愛去OP的Jeff仔於早兩日生辰，我家姐他們的Panny姨媽當然有求必應，應承帶Jeff仔到OP一遊，更點名一定要同到Jason大表哥去！是次生日的Jeff仔當然是免費，還可以為一位同伴購買半價門票，由Jeff仔決定俾邊個用。此機會原本會是屬於Jason大表哥或者有好玩伴Yoyo，不過Jason大表哥和Crystal的身份證號碼同樣有「3」「5」順序連著，有六五折；Yoyo則未滿11歲，有半價門票，結果半價票當然留及Ryan啦！家姐早前因購物獲得兩張免費入場門劵，首選一定是我跟家姐用，每人慳咗二百八！結果一行七人無一須以正價購票，勁！兩位好爸爸呢？都放唔到假，於是二人資助食早餐和Lunch！哈哈！最後三傻夾錢買了一份頗大的禮物送給Jeff仔，還要在他不知情的情況下買的，開心c Jeff仔，抵Jeff仔咁鐘意同三傻玩！又一個開心的日子！

今天如常接考試早放學的妹妹回家，回程途中，收到Crystal電話，指她跟Ryan放學時間一樣，於是一起回家。結果我們在回家的路上遇上，為了讓妹妹放鬆一下，我提議去食個Lunch啦，一來俾妹妹relax 吓，二來我都不用頭痛也他們煮什麼午餐，總算一舉兩得。食Lunch時，三傻例牌報告吓「戰況」，以Ryan形容得最詳細，份卷有邊題他識唔識做都記得，Crystal照講吓有無唔識、有無邊度失分咁啦，至於Yoyo呢，考完就算，題目也一題都講唔出，佢話唔記得晒喇喎。Yoyo很無奈考試尚有兩天，很想快點考完，事關。。。考完試放假喇喎，復活節假happy啦！有Ryan爸精心安排嘅節目。但係都要快快快溫好啲書，時間始終都會過架嘛！三傻加油，中小學生加油，考緊dse的中六學生們都加油！