寫咗呢個blog咁耐，我將我由小學到廿幾歲既經歷完全坦蕩蕩咁寫出嚟，十幾年黎有開心亦有唔開心，但我發現開心既野都集中係16歲之前，因為當時既我仍然唔知咩叫做驚，直到之後係我人生中不斷發生好難忘既事，例如：生BB，墮胎，返夜總會等等，我開始感到我既人生好失敗，我當時真係有想過改變，但我真係唔知點去改變﹕改變我既學歷?改變我既圈子?改變我既生活習慣?最後，我只能夠繼續我一向習慣的方式去生活。
可能社會既人都會認為我係一個唔潔身自愛，自作自受，愚蠢既人，其實我都有後悔，不過我亦估唔到我會有咁既發展，係呢個圈子越耐，我就發現越難去改變，因為係我身邊對我好既選擇已經越來越少，所以只能照住自己行緊路繼續行落去。
不過到現在，我確實有著明顯既改變，之前我寫左33篇故事，都係發生係我23歲之前既日子，嚟到呢一篇，我開始有改變，不過在改變前仍然要經歷一段難以形容既痛苦日子，係這段日子裡面，我真係好想放棄自己既生命，亦都係呢段痛苦日子令我願意為自己作出最大既改變，希望一直有追看我個blog既朋友，亦都見證住我改變既開始…
我仍然同我大約大我10年既男朋友一齊，有一日佢黎左我屋企瞓，係佢瞓覺途中，佢既手提電話突然間響起，於是我就接左嗰個電話，聽到一個從大陸打來既電話，電話中聽到一把廣東話講得唔清楚既女人既聲，佢同我講話要搵我既男朋友，於是我就同佢講話我男朋友瞓緊覺，當收線之後，我既直覺都覺得好奇怪…
|
