雖然無同我個friend跟社工去做body check，不過當佢去完body check之後佢打比我，佢話社工叫佢參加一個叫朋輩輔導員訓練小組，而且參加完訓練小組之後就可以成為朋輩輔導員，仲會介紹工作，而我個friend叫我陪佢去，當時我諗，我得中二學歷，參加小組又可以學多D野，所以我決定參加。
總共有8次小組，而每次小組既內容都會有不同既主題，包括，家庭，愛情，性，毒品，死亡等等，起初我無諗過自己會分享過往既經歷，記得係第一次小組，主題係多角度思考，呢一節既小組係同D組員一齊玩一D輕鬆既遊戲，感覺都幾開心，有左抑鬱症咁耐都未試過可以咁輕鬆去玩遊戲，而且呢次小組令我明白每件事都可以從不同既角度去睇，當我唔開心嗰陣，又真係可以令我重新思考自己既問題，由於幫助到自己，所以令我有興趣繼續參加。
其實整個小組有兩節都令我非常深刻，其中一節係家庭，因為由細到大我都唔會同d friends講自己屋企，目的要保護自己，但係當其他組員都咁坦誠講自己屋企既時候，我亦都好真誠咁分享左自己既故事，嗰次係我第一次係其他人面前講自己既事，而且我同其他組員個個都講到喊，雖然我地口口聲聲話好憎自己既屋企人，但心底裡仍然係好著緊自己既屋企人。
另一個深刻既主題係死亡，嗰次社工叫我地想像下自己既葬禮，我重來都無諗過自己死左之後會點，而且當我未經歷呢節既時候，我成日都會好想死同傷害自己，因為我覺得唔開心，但當我好認真咁去諗我葬禮既畫面，我反而感覺到好悲傷，因為我發現如果我死左，最傷心既係我既屋企人，呢節既小組令我知道死唔可以解決問題，見到身邊既人傷心，我一樣會感到傷心，嗰一次小組之後，我開始識得珍惜自己。
其實起初我都好驚同啲組員發生衝突，但後來我發覺小組氣氛輕鬆，而且組員既性格好友善，係我戒毒既日子參加左呢個小組，不但令我覺得沉悶既康復生活有左d意義，亦都令我對過往既生活方式有不同既反思，係小組認識左幾個真心一齊想戒毒既朋友，更加令我發覺無毒品既生活亦都可以過得好開心。
|
