|
2014 年 4 月 27 日 星期日  |
| 豆豆故事 45 |
分類: 未分類 |
八節既朋輩輔導員訓練小組好快就完結左，之後明愛亦請左我成為一個全職既朋輩輔導員，當時我仍然需要定期返去精神科覆診，加上小組真係令我有好多反思， 雖然當時我D friends間唔中都會叫我返大陸玩，我都會去，而去玩既時候都會食，我未能完完全全戒除吸毒既習慣，不過我比以前真係食少左好多。
直到開始係明愛返工，我既生活有左好大既改變，朋輩輔導員有好多不同既工作，其中一樣就係要去一D中學同D學生分享我既一D個人經歷，包括吸毒既經驗，意外懷孕既經歷等等。第一次分享既時候，真係好驚，好擔心D學生唔知會點睇自己，但當我分享完之後，雖然仲會有D緊張，但係整個過程都好開心，因為當我分享緊既時候，我見到D學生好專心咁聽，而且每次分享完之後，社工會派D紙仔比D同學，叫佢地寫返D鼓勵既說話比我，曾經有學生向我好坦白咁講，佢都好想試下食毒品，亦有學生曾經同我講佢既屋企人都有吸毒，甚至係紙仔上面睇到D學生話，聽完我既分享之後，佢唔會再接觸毒品，呢D寫左係紙仔上面既說話令我知道原來過去一D唔好既經歷，只要真心能夠改過，呢D經歷係可以變得有意義，甚至能夠幫助其他人，當學生與我有一D既近似既經歷，佢地就會好有共嗚感，更加可以打動到佢地既心。另外，當每一次分享之後，學生都會給予的一D正面既支持同鼓勵，呢D既鼓勵加強左我戒毒既決心，除此之外，我既工作亦要與社工定期去到一D娛樂場所，做一D外展工作，主要係去DISCO同夜總會去認識一D仲食緊毒品或者做緊PR既青少年，用一個過來人既身份去認識佢地，再同佢地分享，而我既生活亦比以前過得有意義，亦因為有左朋輩輔導員既呢個身份，令我更加覺得我喜歡現在既生活，我希望我可以徹底地改變自己。十年的吸毒日子換黎既係好多好多既傷害同唔開心，當我開始脫離以前既朋友，以前既圈子，我先發現原來係毒品以外既世界可以更活得快樂。
我而家仍然會係不同既公開場合與不同背景既人去分享我既經驗，包括學生，老師，社工，家長，不同既媒體，我希望用自己既經歷去影響其他人，我更希望透過我既分享令社區人士能夠明白吸毒既人背後其實都埋藏左好多既矛盾，好多既傷口，好多時佢地都有諗過去改變，只係要改變對於佢地黎講係一件好艱辛既事，我地唔係要認同佢地吸毒係正確，只係希望其他人能夠比多D體諒同機會佢地。
|
|
|
