為左戒毒我會避開一d不必要既約㑹，避開一d高危既人同地方，因為咁樣可以令我減少左好多接觸到毒品既機會，不過有d野真係避無可避，就係我居住既地方，由細係屋邨玩到大，好難去避免撞到一d邨內有背景既人，以前見到佢地係好遠，我已經會大聲同佢地打招呼，目的想表示自己識好多人咁，但而家就扮哂睇唔到，好快咁行過，盡量都唔想比佢地見到我，初時都幾成功無比佢地發現。
戒毒3個月左右，我既生活仍然日日如是，不過心癮同身癮發作嗰陣已經無之前咁辛苦，開始漸漸過返一d比以前正常既生活，不過原來有d野都總要去面對。有一次我落街買野食，當我準備返屋企既時侯，遠處有一班人大叫我個名，當時心諗:「既然咁耐無見，不如過去打聲招呼啦!」嗰一班係曾經同我玩過既friends，一行到埋去之後，佢地唔係同我講好耐無見，亦都唔係問呢排點!見到我既第一句說話就係:「嘩!乜你肥左咁多既!你搞咩牙!搞成咁!」嗰一刻我真係好尷尬，因為我無出去玩之後，日日就係屋企食同瞓，所以呢三個月黎我肥左好多，雖然我知道自己比以前健康左，但當佢地笑我既時候，感覺真係好難受，我係一個好著重外表既人，但戒毒之後換來既反而係一d恥笑，當時我無發脾氣，只係好尷尬咁笑左一笑，跟住就返左屋企。返到屋企之後，我既情緒先開始發洩出黎，一路喊一路問自己點解會變成咁? 係咪食返毒品就可以變返以前咁?我好掙扎，我知道呢個標榜住瘦先至靚既社會，對於我黎講，我會覺得很大既壓力，我一直都被呢件事捆擾住，突然諗起一個從未諗過既方法，就係每日朝早落街跑步，其實自己都唔敢相信自己會諗得出呢個方法，但再諗深一層，我有抑鬱症，做運動唔單止可以令個人開心d，而且又可以減肥，既然毒品我都夠膽去試，點解做運動就要考慮咁多呢?所以我就開始左做運動既生活。我間左朝早去跑步，因為可以唔洗咁容易撞到人。
當我做左運動之後，我既康復速度真係快左很多，感覺舒服左好多，又可以令我既生活唔洗咁沉悶。戒毒五年，現在既我仍然堅持住做運動，但目標已經唔再係因為抑鬱症，更唔係希望減肥，而係希望令自己更健康。
|
