我個名叫豆豆，我係一個過來人，以前我好鍾意吸毒，因為有太多煩惱，又唔知點去解決，但係我而家已經戒左３年幾啦，我吸左１０年毒，除左吸毒之外仲發生左好多難忘既事，要講我既成長故事就要由小學四年級開始講起．．．．．．

係我小學四年級既時候，本來係一個普通既學生，突然有一日我的爸媽話要買樓，佢地亦因為咁要供樓，所以佢地亦開始要搵一份人工比較高時間比較長既工作，而我既生活亦漸漸改變左。

每日佢地都要反工，只留低我一個人係屋企，每日自己反學，自己放學，自己食飯，我覺得好孤獨。每個人都有自己既屋企，點解我既屋企人日日都唔理我呢？仲記得有一次我想約我Ｄ同學食飯，但佢同我講唔可以去，因為是中秋節，今日屋企做節，所以要反屋企食飯牙，當時我心諗，做節係咩呢？點解我唔洗既？好期待同屋企人係埋一齊食飯既感覺，唔想每日都咁孤單，慢慢開始討厭我既父母，討厭佢地唔理我，討厭自己一個人。

升到上中學，係一個暑假認識左一個男仔，可能我好寂寞啦，而且佢又成日陪我，所以好快同左呢個男仔一齊拍拖，岩岩同佢一齊既時候係幾開心既，每日都好鍾意同佢一齊，仲為左同佢一齊而逃學，初時都有暪住屋企人同佢一齊逃學，亦會係佢屋企過夜唔反屋企，雖然我屋企人因為我唔反屋企而報警，但當時反叛既我，反而令我更加想離家出走，最後因為我成日逃學既關係，學校都趕左我出校啦，比學校趕出校，我有Ｄ唔開心，好似有種比人放棄既感覺。

無反學既日子令我好多無野做既時間，而且我無反學之後，我同男朋友既感情都開始唔穩定，因為我成日都出左街玩，慢慢就同個初戀男朋友分開左，而且係出去玩既時候，比一班有黑社會背景既人聊我，同佢地認識左之後，成日同佢地一齊玩，就係咁開始左一條令我好難忘又後悔既吸毒之路．．．