當時知道有左既時候，我驚到只係識得係度喊，醫生同我講：「你唔洗驚住，今日照超聲嗰度無開，所以等到下星期去照下超聲波先，睇下個ＢＢ有幾大，你地再睇下有咩打算啦!」其實當時我既心情真係好無奈，不知所措，唔知有咩人可以幫到我，又唔知點面對屋企人，醫生話可能第一次有ＢＢ，所以有Ｄ唔舒服同埋會痛，所以開左Ｄ藥比我，叫我照完超聲波先反去覆診，就係咁以為無事咁反左屋企。

反到屋企諗住休息下就無事，仲係度煩緊唔知點算既時候，發覺好似越黎越唔對路，個肚好似越黎越痛，牙楓見我咁痛，所以佢即刻話：「不如去醫院啦!」所以我同牙楓一齊搭的士去左醫院，去到醫院既急症室都唔係即就比你見醫生，首先要先見護士，因為要分流，分下你夠竟有幾緊急，去到分流站見護士，護士問我：「你對上嗰次月經係幾時?」當時既我痛到諗到野，只係敷衍咁答左佢一句：「唔記得啦!我真係好痛牙!」跟住個護士即刻話：「小姐，唔該你記清楚，因為你幾時黎過月經同你而家有幾危險係好大關係嫁，唔該你盡量記清楚啦!」如果我講唔到個正確日子，就唔比我見醫生咁，所以我先去諗反有幾耐無黎過m，嗰日係3月15日，我記反上一次黎m既時間，已經係上年6月啦，日子我真係記唔到，好記得當時我講完上一次黎m係上年6月既情境，當時個護士look大左隻眼，攞左張月歷表出黎係度數，佢話：「下…已經37周幾啦!」個護士叫人推左張病床過黎，叫我即刻瞓係張床度，即刻入去比醫生檢查，當時我好痛，但係我唔會唔記得嗰一刻既畫面，因為我見到所有係急症室等緊睇病既人，全部都望住我，入到間醫生房，因為醫院有超聲波，醫生即刻查左d膠水既野係我肚上面，係部超聲波機既畫面上，我見到bb，醫生話bb個頭原來已經倒轉左啦，而家要即刻推上產房，上到產房，d護士叫我一痛就用力生，我嗰時真係好痛，痛到忍唔住係度叫，d護士仲話我唔好叫，留反d力用黎生bb，當時我既男朋友只可以係產房門口等，大約6:30pm我終於生左個bb出黎，生左個男仔，護士抱起bb比我睇下，當時我見到bb嗰一刻，我有d開心，開心既係我終於都生完，但亦覺得非常沉重，因為我唔知道點同屋企人講，我更加唔知我以後既日子會係點，當年我只得16歲…