出院之後我要開始學習做一個媽咪，從亦未試過咁辛苦，每日都無得瞓，無哂自己既私人時間，又擔心自己係咪照顧到bb呢，而我亦患上左產後抑鬱症，甚至曾經想放棄bb，不過當時最好彩既係媽咪不但無鬧我，反而仲會明白我既辛苦，幫我照顧bb。

因為要幫bb攞出世紙，而且又唔想出世紙上面寫住私生子，所以我同男朋友開始計劃結婚，當時結婚係完全無認真咁諗過，好似覺得有bb就自然要結婚，所以我地跳過哂所有既結婚程序，只有排期同簽紙，完全感受唔到結婚既快樂，目的就係想出世紙上面有爸爸，媽媽既名，而且我有bb既時候係未滿16歲，所以d警察都有拉到男朋友，告佢衰十一，但係因為我同佢結左婚，加上法官都知道佢係唯一搵錢照顧bb既人，所以都輕判左佢守行為，不過結婚既生活並唔係好似想像中咁理想，我地結左婚無幾耐就開始成日嘈交，記得有一晚，我地因為一d小事而嗌交，當佢好嬲既時候，佢郁手打左我兩巴，嗰一次係佢第一次打我，當時我係到諗，結左婚唔夠3個月就咁，我點樣可以同佢一世呢?就係咁嗰晚我落左disco搵反d friends，加上唔開心，我又再high反野，我曾經有諗過做一個安分守己既媽咪，但嗰一晚之後，我開始反我出黎蒲既生活，開頭我日頭都會照顧bb，夜晚就叫牙媽幫手照顧bb，而我就先出去玩，我同牙楓既關係越黎越惡劣，一見面都只係有鬧交。

記得有一晚，嗰一晚係我既生日，我同d friends唱k，老公就偷偷地帶左bb反去佢自己既屋企，當我朝早反到屋企既時候，媽咪同我講佢半夜抱走左bb，當我反到屋企見到間房空無一人既時候，我個心好痛，但係我無去同佢爭取，因為我知道16歲仲係咁貪玩既我，仲未有能力有耐性獨立去照顧bb，亦唔想再同呢個男人一齊，所以我選擇放棄左，由嗰一日起我同bb就分開左生活。