其實岩岩同BB分開住既時候，我每日都會喊，覺得自己好無用，好想去見下BB，但係自己又唔夠膽，況且我好唔想面對老公，加上我同佢媽咪既關係係極之差，由我同佢個仔岩岩一齊開始，佢就覺得我係出黎玩，唔係一個好女仔，好唔鍾意我，生左BB之後，佢仲成日都話我，都唔知係咪有左BB專登扮唔知，搞到而家咁搞到咁大獲…但其實呢個係咪真係只係我一個人既責任呢?

老公帶BB反左去佢自己屋企既大約一星期，發生左一件令我好傷心既事，嗰日大約朝早九點幾，我手提電話響，原來係佢打比我，佢同我講佢而家係我屋企樓下，想上黎我度攞反BB D衫，當時我聽到佢既語氣係好平心靜氣架，一D都無激動既情緒，大約過左5分鐘之後我開門比佢，點知原來佢牙媽同佢牙嫂都一齊上左黎，佢地先入去我房攞左BB D衫，之後再搬走我間房裹面佢曾經出過錢買既所有野，無論係佢自己用既，佢住係我度所以買黎一齊用既，定係佢送比我既，所有全部一次搬走，一路搬野既時候，佢牙媽一路係度鬧我，記得臨走嗰陣，我地又嘈起黎，嗰一次佢又再打左我兩拳，當時我完全失控咁坐左係個地下度喊，當時我覺得點解一個人可以無品到咁，就係因為呢件事，我唔想再同呢個人有任何瓜葛，我非常討厭佢同佢既家人，更加令我無勇氣去見BB，因為我唔想諗反起比佢攞走D野仲要比佢打既事。

呢件事之後我同佢無再聯絡，但事情並唔係完結，因為呢件事之後，我比以前食毒品食得更厲害，掛住BB既時候同埋諗起佢咁對我既時候，我都覺得自己好失敗，好想自己唔好繼續諗，好想麻醉自己，唔想自己清醒，當時我只係16歲，但係呢件事只係我吸毒生活既一個開始..