發生左BB件事之後，我差唔多17歲既時候，之後我又開始同反以前班FRIENDS玩，有時又會跟D朋友一齊去落D，落BAR，唱K，總之每日都有節目，每日都要出去玩既心態其實係唔想留係屋企悶之外，仲好想得到朋友既認同，有時好攰唔想出去，但最後都出左去，因為好怕唔出一晚，D FRIENDS就會唔搵你，好怕得反自己一個好孤獨既感覺，記得嗰時雖然每晚都去玩，但都唔洗自己出錢，無論入埸，酒或者毒品既錢都係D FRIENDS請，不過嗰時都係D FRIENDS比到先食,食唔食都OK，無得食毒品既話，飲下酒又一晚，唔洗一定要HIGH野。
記得有一晚，我落左銅鑼灣某一間DISCO，跳跳下舞既時，突然有個女人話想同我做個FRIEND，我諗住只係識下應該唔會有D咩問題，所以咪同佢一齊玩囉，跟住之後佢叫我去佢張台飲下酒，所以我就同左我另外嗰2個女仔朋友一齊過左去佢張台度玩，當時去到佢張台，已經覺得有D唔尋常，因為平時落開D，都係男多女少，但我去到佢張台，差唔多20人有18人都係女仔，我咪問佢，你地有咁多女既？你地咁多女一齊開台玩架,？跟住佢話佢係做夜總會既主任，呢D係我公司既同事，當時我未接觸過夜總會，淨係知道應該係好似平時睇關於夜總會既電影咁，做一Ｄ關於要陪客又陪酒既工作，不過當時我諗我一定唔會做呢D工，只係同佢地做下FRIEND，玩下，落下D，無咩所謂啦，就係咁我地玩下玩下就同佢交換左電話號碼，之後佢間唔中都會打比我叫我去玩，有時無地方去既時候都會應酬下佢，就係咁慢慢同佢越黎越熟，佢仲契埋我做契妹，但認識左佢之後，對我既人生有一個重大既改變……
|
