當我決定左點樣做之後，第二日下午我個friend就陪我去左旺角既一棟商業大廈，係商業大廈左穿右插，上左十幾層樓，跟住見到有一個好普通既住家門口，之後我個friend禁門鐘，有一個女人行出黎開門比我地，我地入左去，入面係一間住宅既隔局，但裝修成一間診所咁，分左幾間房，一間房有一張幫婦女檢查既床，一間房就有一張梳化，個廳就有d好似等睇醫生比人坐既長櫈，仲有一個好細既廁所，入到去既時候仲有兩個女仔係入面等緊，我係等緊入去睇醫生既時候，心裡一直好擔心，好緊張，好驚，曾經有突然想走既衝動。

等左一陣，到我入去，我入到去同醫生講我有左bb，我仲話已經驗過，醫生叫我驗多次，我就即刻去左個廁所度驗多次，再次驗出黎既結果仍然都係無變……醫生睇左結果之後問我，你係咪而家想做?我答佢係，當時我答係既時候無咩經過深思熟慮，因為我淨係知道呢件事一定要盡快解決，而且我認為自己無其他既選擇……

醫生比左d藥我，仲叫我出去等下，係我食完藥同等待既期間，見到另外嗰兩個女仔輪住入左去嗰間有一張幫婦女檢查既床既房，我係出面聽到房裡傳出好大聲既鐵鋏聲，仲聽到房入面既女仔既叫聲，過左大約15分鐘，醫生攞住一個大玻璃樽係間房度行出黎，玻璃樽入面全部都係血，我唔敢望清楚，亦都唔想望，我諗應該係做完手術，隔左一陣，第一個女仔出返黎，到第二個女仔入去，過程完全一樣，等待期間，我再次去多次廁所，看見廁所存放左好多玻璃樽，嗰一刻真係覺得好恐怖，心諗嗰個醫生幫人墮胎就好似家常便飯一樣，墮胎真係就係咁普通既一件事嗎?