當我離開左黑市診所之後，我就上左個friend屋企繼續休息，雖然身體虛弱，但見個friend約左班friend夜晚去蒲，自己唔想自己一個人返屋企同埋好驚自己返到屋企又要自己孤獨一個，所以到夜晚又跟左個friend出左去玩。雖然我無咩心情，但係我好想high野麻醉自己，嗰晚我食左好多好多k仔，後來自己一個踎左係廁所既廁格裡面喊，因為我個心好痛，我失去左bb，失去左男朋友，好像咩都無哂咁，真係好煩，我只想靠毒品黎減輕一下我既心痛，我真係唔知仲有d咩其他方法可以令我舒服d，每一晚返夜總會見到既男人都咁花心，就連自己既男朋友都咁唔負責任，嗰一刻我對男人真係失去左信心。

嗰晚我成晚都好迷，點知後來我撞到個朋友，係一個會請我食毒品嘅朋友，我識左佢一段日子，其實佢係想溝我，不過我之前有男朋友同埋都唔鍾意佢，所以一直都無咩點理佢，但嗰晚真係好唔開心既關係，好想有人陪我，所以我地就係咁玩下玩下一齊左，雖然我唔愛佢，但起碼可以係佢度得到短暫既溫暖。開頭同佢一齊既心態只係想騎牛搵馬，點知佢對於我之後既日子影響得非常大……

自從同左佢一齊之後，我連夜總會都無返，每晚就係同佢一齊係disco陪佢做野同等佢收工，因為佢同佢d兄弟一齊住，所以每日朝早收工就會同佢一齊返去佢度，開始左我日又high夜又high既生活，夜晚落disco不停咁食，就連返到佢度都會不停咁食，一日24小時除左瞓覺之外，做任何既野都會有毒品先覺得唔悶，但當時既我仍然覺得無咩問題，唔會覺自己會上癮，因為我唔係食白粉，唔會搞到好似食白粉咁嚴重……之後我同佢會點發展呢?而我又食成點呢?