由我中學時代開始，我已常常聽到有關墮胎既事件，當時我估計墮胎係一件好痛又好傷身既事。當我真正咁坐係黑市診所既時候，心情除左驚之外，仲有傷心，我不斷係度怪責自己，點解我要淪落到呢個地部，到有事發生既時候，只有自己去面對，亦只有自己明白痛楚有幾痛……

回想到嗰日，醫生叫我入房前既一刻，我就好似無思想既公仔一樣，個腦空白一片，醫生叫我做咩就跟住吩咐去做，因為我無其他更好既選擇。

入到嗰間只有我同醫生兩個人既房，我既心跳只有加速同恐懼，醫生叫我瞓係嗰張婦科檢查既床上面，佢攞住一個裝滿工具既盆，跟住攞起一個鐵鋏，不時聽到鐵撞鐵既聲音，我只能合上雙眼，不敢望任何既事與物，但我仍然清楚感受到佢用鐵鋏擴大我既陰道，跟住將一條管放係裡面，之後唔知係度做d咩，隔左幾秒之後我感覺到好痛，佢不斷按我既腹部，我亦感受到我既子宮不斷收縮，佢一下一下將我子宮裡面既野吸出黎，雖然短短既十幾分鐘手術過程，但我一生都不會忘記嗰種獨有既痛楚。

手術完左之後，我著返條褲，醫生就將嗰個染滿血既玻璃樽攞返出去，我坐返起身見到個玻璃樽，嗰種既內疚感令我忍唔住流眼淚，我唔想大聲喊，因為我唔想比人知我有幾傷痛，因為呢個係我既選擇。

醫生返入黎叫我去隔離有梳發既嗰間房休息下，而我朋友亦都入左黎陪我，嗰時我都忍唔住真係喊左出黎，就連我朋友都唔知點安慰我，我既感受並唔好受，因為我傷害左自己，傷害左bb，但一切既痛楚只有我自己一個人知道，所受既痛楚唔只係表面上，最難受既內心的內疚..