記得第一次去西貢壁屋懲教所探佢，當我一見到佢，發覺佢無HIGH野幾日比平時清醒左，佢仲同我講:「早知唔HIGH啦，我諗今次一定入梗戒毒所……」

          14日後再一次上庭，今次係睇報告加判決，結果係佢D尿驗到有毒品成份，即時入喜靈洲戒毒所，呢個結果係我預料之內，呢14日我本來以為自己開始習慣無佢係身邊，但我第一次同佢牙媽去喜靈洲探佢，當時既場面令我好深刻，首先我地搭車搭船再搭船，用左2個半鐘去到喜靈洲，跟住先登記再去一間探監既房等佢黎，當佢黎到坐左係度，有塊玻璃係面前隔住左我地，我地只能透過傳聲電話講野，嗰一刻我同佢牙媽都忍唔住喊左出黎，雖然佢就係我既面前，但係又好似同佢好遠咁，甚至同佢對話既所有內容，全部都會比人聽到哂，之後幾次去探佢，我覺得佢D皮膚越黎越黑，佢話佢係入面日日都要露天做野，所以曬到咁黑，初時佢以為係戒毒所會無咁辛苦，但係同坐監真係完全無分別。

初初我成日都去探佢，但係車程來回5個鐘同埋100蚊既車費，慢慢我都去得無咁密……而我同佢既感情亦都開始慢慢轉淡，本來我一心諗住等佢出黎，但係當佢入左去之後，我唔鍾意留係屋企，好似一個人係屋企好悶好孤獨，所以我成日都會出去玩，雖然佢入去之前都有留左錢比我，我諗住忍下唔好用錢攞K仔，但係真係控制唔到自己，D錢用哂之後要做返夜總會。

當我做返PR之後，因為晚晚都飲到好醉，一醉左又更加控制唔到自己攞野，有時放工有D醉又唔想返到屋企得返自己一個，所以會同D FRIENDS去DISCO蒲一陣先返屋企，甚至唔想一個人係屋企悶，直頭會攞埋D 茄返屋企HIGH，結果又變返HIGH得越黎越多，嗰時通常同D 朋友一齊玩開始轉變到更喜歡自己一個人玩，一個人HIGH野，因為自己食既份量太多，自己既錢只能供給自己。