我寫左呢個blog咁耐都只係寫自己既個人經歷，一直都無深入咁介紹過自己而家既情況，令到好多有睇我個blog既朋友都以為仍然仲係吸緊毒，所以今次我特別寫左一篇特別篇，等大家可以再了解多d現在既我，除此之外由今篇開始，我會將我現在既生活點滴少少咁少少咁記低，因為一個過來人戒毒之後要面對返一個正常既生活，當中會有好多掙扎，迷惘同困難，我希望大家睇左我個blog之後除左可以更了解青年人既心態之外，而且更希望令大家明白一個人既改變係非常需要別人既支持，機會同諒解。
如果有睇開我個blog既人都知道我係一個吸毒10年既過來人，不過我覺得自己只係一個普通既青少年，而且仲係一個好需要愛既女仔，係我未成年既時候，我試過吸毒，未婚懷孕，出賣自己身體，抑鬱症，當中的經歷令我好後悔，但更令我有反思。
現在既我已經唔會再日癲倒，做事唔會不顧後果了。現在既我有兩個不同既身份，第一個身份係一間福利機構既朋輩輔導員，我既工作係與別人分享我以前既經歷，透過我既分享可以幫助到有需要幫助既人。而我第二個身份係一個大專學生，由我開始出黎玩既時候，我中二就已經開始無讀書，掉低書包13年，要我重新投入校園，對我黎講又係另一個大逃戰。在我廿幾年的人生中，有開心，有唔開心，當中改變更是付出過無數既眼淚。
夠竟我係點樣由一個吸毒既女仔成為一個有目標有方向既學生，希望大家繼續追看豆豆的故事。
|
