每當我想起我失去左我男朋友，而且仲比佢呃左，我覺得自己好蠢好無用，甚至覺得自己好無價值。回想同佢拍拖呢兩年，我因為愛佢所以願意將自己所有既野都同佢分享，甚至連之前男朋友送比我既鑽石戒指都可以比佢攞去擋，可惜對佢既信任只係換來一個傷心既結果。

嗰一段日子，我每日都只係諗方法去傷害自己，仲記得當時每一晚搭車返工都會係架車度喊，而且仲會諗如果撞車就好，因為我唔想再生存，我真係過得好辛苦，就算返到夜總會都只係為左飲酒high野，唔想清醒，到現在仍然深刻記得嗰段日子既痛苦。

當我返到屋企，一個人既時間係最難過，只係不斷喊同瞓唔到覺，後來甚至淨係想匿埋係屋企唔想見到任何人，每日我都無動力去做任何野，工唔想返，街唔想出，我淨係知自己好唔開心，成日都會有自殺既諗法，因為我諗如果我死左就可以唔洗再咁煩惱。我既諗法都變得非常負面，諗返自己廿幾年既人生，發現自己淨係識得玩同吸毒，現在既結果可能就係我既報應，我唔知自己可以做d咩野，我覺得好迷惘，而且認為自己係一個失敗者，只係係屋企high野去逃避。

直到有一次，我係屋企睇電視，我睇到一個關於抑鬱症既電視節目，我發現節目所提及既抑鬱症徵象也發生過在自己身上，甚至已經持續左一個唔短既時間，睇完個節目之後，我開始懷疑自己患上抑鬱症，亦都開始擔心自己既身體，雖然我好驚唔想去睇醫生，但我諗自己都唔想繼續過一d咁辛苦生活，如果我真係有抑鬱症，我都應該去面對，所以第二日我就去左政府既診所睇醫生，亦代表左我開始左改變既第一步…...