由於我懷疑自己患上了抑鬱症，所以我第二日就去左政府既診所睇醫生。當我等緊睇醫生既時候，其實我都好驚唔知點同醫生講，但係嗰刻我諗起16歲發生既一件事(豆豆故事 3有提及此事)，就係因為害怕面對自己有左BB，而逃避唔去醫院睇醫生，以致將事情拖到自己唔能夠承擔既處境。我覺得自己唔可以再犯同樣既錯，所以我決定要面對。

當我入到醫生房時，我將我既情況話比醫生知，佢只係問左我一個問題，問我呢個情況持續左幾耐?我話由我第一次無啦啦喊同有自殺既諗法已經係3年前既事，但隨住HIGH野HIGH得越多，再加上同男朋友分手，呢D情況出現得越來越頻密，之後佢就二話不說將我轉介到精神科專科，所以我就開始左每星期都要到精神科覆診既日子。由於我向醫生坦白咁講左自己有HIGH野既習慣，所以我被安排到一個專醫治因為濫藥而引起情緒問題既部門。原來，因為濫藥而有情緒問題既人係有好多。

還記得第一次到精神科見醫生的時侯，他將吸毒會帶來既後遺症真實咁話比我知，而且我發現自己真係有發生過，例如，有幻覺、心情暴燥、傷害自己等，呢D全部代表左毒品影響緊我既身體，甚至影響緊我個腦既功能，所以嗰一刻我真係開始擔心，因為我一直都希望利用毒品令自己開心D，但估唔到換來既只是抑鬱症。所以我由醫院回家途中不斷係度諗，我真係要決心戒毒，因為我真係不想自己繼續破壞自己既身體。就係嗰一日，正式展開左我人生既一個新開始，雖然我有左戒毒既決心，但係原來並唔係我想像中咁容易，當中既辛苦到今日仍然清楚記得，原來戒毒並唔只係戒掉一個習慣，係需要改變現在既一切一切，經歷左無數辛苦既晚上，亦都經歷左由零開始既學習。