由醫院回家途中，我真係諗清楚要決心戒毒。我好擔心自己既病況，亦都煩緊唔知同唔同屋企人講我既病情，因為我唔知點同我牙媽開口。

回到家中，我見到我牙媽係度睇緊電視，當時我有少少想同佢講，但係我唔想比佢知道我係因為吸毒先至患上抑鬱症，所以好矛盾，我掙扎左一陣，最後都忍唔住同我牙媽講:「頭先我去左睇醫生，醫生話我患上左抑鬱症。」跟住佢即刻好緊張咁行到黎我既面前，但當時佢並無覺得好驚訝，而且仲同我講:「下一次幾時去覆診?不如下次我陪你去。」我當然叫佢唔洗，因為我唔想比佢知道我有吸毒既習慣。咁多年黎雖然佢曾經有懷疑過我有吸毒，但我從未試過真真正正被佢發現，不過聽到佢既回應確實令我有d驚訝，之前我無期望過佢會關心我，因為諗返好細個時候，佢已經唔理我，但今次既關心，令我對佢既態度有少許既軟化，但係我同佢之間既關係並無咁容易就可以有改變。

為左戒毒，我不斷諗有d咩方法可以幫到自己，初初我諗住少d出去玩，忍住唔去攞野，就可以戒到，但忍左兩日，我無啦啦發燒，脾氣好暴躁，係屋企咩都無哂心機做，失眠，再加上d朋友又不斷叫我出去玩，我又成日都覺悶，所以忍唔到兩日又食返，雖然我比以前少左出去玩，但係當時我仲有返夜總會，雖然每晚返工前我都會提醒自己唔好攞野，但係每一次坐完枱飲左酒，d自制能力就會好差，控制唔到自己，結果又係咁去左攞野黎high，根本就忍唔住，唯一同之前有分別既就係食完之後會好內疚，會諗自己已經將身體搞成咁，但仍然仲要去攞黎食，對住毒品既時候，點解自己係咁無用?我揾唔到一個有效既方法，係呢段日子裡面，我試過戒過好多次，但都係失敗，一直以為自己可以控制到毒品，點知係控制唔到，嗰時我覺得呢個無用既我一世都唔會戒得到毒品……