雖然對自己戒毒無信心，但我仍然keep住有返精神科覆診。每次覆診都會驗尿，但每次既結果都驗到有毒品成份，我好奇咁問醫生:「我忍住唔食，反而覺得身體好唔舒服，要點先可以戒到?」跟住醫生好有耐性咁回答我:「其實唔可以一次就完全戒哂，因為食左咁多年身體已經適應，如果突然唔食，你既身體反應會好大，就好似上次發燒咁。其實每個人唔同，所以唔好灰心，逐少逐少咁戒，次數同份量逐漸減少，咁樣會無咁辛苦。」我雖然明白醫生既意思，但心裡仍然有好多疑問。
有一次覆診既時候個姑娘問我需唔需要社工同我傾下，當時的確心裡有好多好多既唔開心，又唔知可以同邊個講，所以我一口答應左。第二日個社工打比我，叫我去佢中心見佢，雖然有d驚，唔知佢會有d咩同我講，但我當時已經有種感覺好想同人講下自己既事，不過又唔敢講比熟人聽，可能就係咁我嗰時選擇左將我吸毒同夜總會工作既事講比呢個社工聽，我講左我既疑惑同擔心，我知我每一次返工都會忍唔住攞毒品，但我又唔可以唔返工，因為如果唔返工我就無錢過生活，所以為住呢點而好矛盾，聽完我既擔心後，嗰個社工卻直接同我講:「你返工你認為你搵到錢咩?你每次返工都將d錢全部攞哂毒品，咁樣返工真係搵到錢咩?」嗰一刻佢提醒左我，係呢個困局裡面，我一直就只係諗有咩方法可以令自己食少d，但係我從來無諗過我每日返既夜總會就係令我成日食毒品既地方，返工飲左酒就更加令自己控制唔到自己，結果我就開始嘗試無返夜總會了，不過當中都會經歷有好多引誘同矛盾，改變圈子亦唔係想像中咁容易既事，嗰年我已經22歲，的確無返工之後我比以前食少左好多，因為無返工無收入，所以我亦都唔會有錢去攞毒品，係偶然間朋友請我去玩，先會出去一次，我既生活真係有左巨大既變化，由日日出去玩變到成日留係屋企調理返身體同精神，其實嗰段日子我常常感覺到孤獨，對我黎講亦係一段過得好艱難既日子，戒毒原來並唔係想像中咁容易。
|
