係我戒毒既日子，日日都只可以留係屋企，平時出入既地方就只能去屋企樓下買野食，生活過得好悶。當時習慣夜夜笙歌既我，覺得好唔習慣，雖然明知戒毒是個正確既選擇，但係我仍然害怕一個人孤獨係屋企既日子。有時d friends打黎叫我出去玩，但係我都會拒絕，因為由我無讀書開始，身邊既朋友都係一d黑社會背景或者係有吸毒既人，同佢地出去玩就一定會接觸到毒品，加上佢地叫我去既地方都係disco，以前去親disco都會high野，所以我去到好難忍得住唔high，所以為左減少引誘，我只好留係屋企，不過心底裡仍然覺得好寂寞，好孤獨。

我仲清楚記得嗰段戒毒既日子非常痛苦，每日都會因為抑鬱症而帶來既負面情緒而困擾，心諗只要食一啖毒品就能將唔開心既情緒暫時舒緩，呢個就係心癮既魔力，我心裡清楚知道呢一個係惡性循環，當我覺得辛苦嗰陣就希望利用毒品麻醉自己，但當我清醒反之後，反而會令我抑鬱症既病情越黎越嚴重，所以每日都掙扎著，矛盾著，甚至內疚著，後悔自己點解會食毒品，所以才會導致今日既後果，自己會怪責自己當時的無知，當時既好奇心，每當毒癮發作，我就會咩都唔想做，瞓係張床度，個腦就只係諗住毒品，會對自己大發脾氣，傷害自己，用盡一切既方法令自己唔好再諗落去，其實自己根本無信心可以堅持落去。不過每星期返精神科覆診既時候，就係我當時唯一能夠同人傾訴既地方，一個有外界支持既地方，所以我好珍惜見醫生護士既時間，因為每一次我都會將我既痛苦話比佢地知，我亦都感覺到佢地係同我一齊去搵解決既方法。

呢段日子維持左幾個月，直到有一件深刻既事發生，就係呢件事讓我以後既生活有極大既不同……