戒毒除左要面對孤獨，仲要面對斷癮所帶來既唔舒服，要抵抗唔舒服就只有忍。每當毒癮發作，除了喊同戒手，跟本就搵唔到其他方法令我分散注意力，我只可以透過痛楚去減輕自己既心癮。

記得有一晚，好深刻既一晚。嗰晚我好唔開心，因為心裡有好多掙扎，我唔想食毒品去麻醉自己，但因為吊癮令我好辛苦而大發脾氣，我開始喊，開始傷害自己，心諗點解我要一個人咁痛苦，我唔想再咁辛苦落去，自己夠竟堅持住d咩?我無力量再堅持落去……就係嗰個晚上，我想放棄自己既生命，因為我唔想再比抑鬱症捆擾自己。就係呢個時候，我牙媽岩岩返到屋企，佢聽到我間房好嘈，其實自從患上抑鬱症之後成日都會控制唔到自己既情緒，所以呢個情況佢已經見怪不怪，我亦都唔會期望佢會理我，係我傷害自己既期間，佢突然用鎖匙開我房門，佢入左黎，我仍然非常激動，甚至係佢既面前失控咁傷害自己，喊住咁同佢講:「我好想死，真係好辛苦，我覺得唔會有人明白我。」我牙媽一直望住我，我一隻手攞住戒刀，一隻手不停流血，佢見到呢個情況，佢竟然好冷靜咁同我講:「如果你要戒手，不如你戒係我手上，如果你要死，不如我陪你一齊死，我呢一世人只有你呢個女，如果你死左我留係呢個世界上都無意思，其他人可能唔會明白你有幾痛苦，但我明白，我真係明白。」聽完呢番說話，嗰一刻我唔知點樣回應佢，我只係好惡咁同佢講:「出返去，我既野唔洗你理。」因為我好要面，跟住我好大力咁閂返房門，當佢出返去之後，我開始冷靜，心裡覺得好痛好痛，不停咁流眼淚，心諗:「對唔住，媽咪，一直都覺得吸毒係我個人既問題，但你對我講既說話令我知道我唔單止傷害緊自己既身體，而且我傷害左你，咁多年黎，原來你同我係一樣咁辛苦。」

嗰一晚之後，我真正感受到愛，我知道我唔再孤單，我唔想令我牙媽失望，唔想令愛我既人傷心，我牙媽比我既支持，亦都成為左我戒毒既動力，嗰晚既說話永遠都係我心裡面，永遠都唔會忘記。