我好唔開心，我好想喊∼但係我又唔知可以點∼想走又唔得，好無耐！

尋晚幫兩個同事攪左個farewell party,本應該係好開心先係,因為佢地已經『脫苦海』,點解?因為公司實在太差啦,老細又衰,我都好想走,不過,仲未到我！

已經有兩個同事走左(今個月)架啦,我老細佢依然仲未識得醒,覺得自己好似無錯咁,根本佢就係死性不改！

今日,又有一個同事辭左職,呢個同事係同我一齊入職既,都已經相處左成年幾啦,佢好nice,好好人,成日都好錫我既,我起佢身上亦都學到好多好多野,我真係要多謝佢！

我係公司係最細個個,所以佢地每一個人都會好錫我,好關心我,成日都仲當我係小朋友咁呵護備至,雖然我真係孩子氣左d。
但係,我真係要好多謝佢地囉,我真係好唔捨得佢地,佢地對我實在太好啦,而家得返我一個,我會好驚,唔知點面對好,老細又咁衰,又唔知仲有d咩人可以信,個個都野心勃勃一味想你死！

每當我諗返起啱啱入來個陣,大家都唔識既,而家變到好似一家人咁,笑又一齊,喊又一齊,我覺得真係好難得。
試問有幾多個人會由同事變成一個可以互訴心事既老死呀?
講真,真係無乜幾多個！
我份人，由小學到而家，根本就無乜女仔朋友，經常都係我行我素，唔理人感受；但係識左佢地之後，我學識左好多野，同時我亦改變左好多，呢ｄ改變對我來講係一件好事！

我真你想同你地講：我大個女架啦∼唔好再擔心我啦！多謝晒你地照顧左我呢個『大細路』咁耐，又教識左我咁多野，又成日幫我分憂，陪我笑同喊！我好開心可以識到你地咁多位！

一路打日記,一路諗,就一路喊,我真係忍唔到啦∼唔好意思,我太渣啦∼失禮晒！