前幾日功課太忙，上唔到網，跟住部腦仲要壞鬼左開唔到機，跟住前日阿哥返左黎，攪返掂部機，但係佢又霸返部電腦，結果依家先寫到日記．．．．．．（汗．．．）

依幾日都幾多特別事架，不過一次過打會打死我．．．．．．ｓｏ．．．士旦啦．．．．．．．

今日表弟又係度，煩到我就黎死，家下佢仲係我隔離，糟住要打機，我就黎比佢攪到我思覺失調架啦．．．．．．希望佢快ｄ走啦．．．．．．Ｔ．Ｔ

今日上語文堂戈時，張ｍｉｓｓ話同我地玩個遊戲，但係要先搵人知道個遊戲規則幫佢手，結果我同嘉思妹都做左全班唯一知依個叫”黑色魔法”遊戲既規則既人。上課正式玩既時候，我同嘉思妹輪流咁上去做估同指既，上左ｎ次，上到有點悶，班同學仲未諗到有咩規律，最無奈係聽到周圍ｄ同學係度亂咁估，又估甚次數，又話有甚麼字眼上既不同，聽到佢地咁樣，仲要以為自己估岩左，戈種感覺真係超無奈．．．．．．＝．＝不過見到佢地估唔到，又會有點心涼既感覺，嘻嘻．．．．．^^||

到左中午，因為琴日嘉思妹冇錢食飯，借左我錢，但係仲未有錢可以還，結果攪到今日連我都冇錢食飯，於是兩個人係課室食餅乾，仲唔小心食到成地都係，不過嘉思妹用左一個好簡單既方法解決－－撥曬ｄ野去佢後邊個呂林澤個位度，有咩事就賴佢．．．．．．（果然係好方法∼∼嘻嘻．．．．）

今朝我過左去表弟度同佢補習，之後下午我帶左佢去屋企附近個公園畫風景畫，見到佢好活躍，成日跑黎跑去，覺得有種好輕鬆既感覺，望見佢咁天真，咁開心，咁無憂無累，真係好羨慕佢．．．．．．

人越係長大，要諗要煩既野就越多，真係好想返去細個戈時，好似表弟咁無憂無累咁過日子．．．．．．

（死啦．．．今次篇日記咁短咁既．．．．．．）

今日梁ｓｉｒ黎分校啦．．．我係時候同梁ｓｉｒ講我唔參加美術比賽既事，原本諗住中午上完數培去搵佢既，點知數培好遲先落課，攪到我根本冇時間去搵佢，於是諗住放學之後去搵佢．．．．．．

第七節既時候我已經諗定，一放學即係刻落去搵梁ｓｉｒ，然後趕去撘專車，點知因為之前我ｄ暑期作業做得唔好，所以要留低做曬先可以走！！！我放學唔單止要去搵梁ｓｉｒ，仲要返去同表弟補習架嘛！但係依家要我留低．．．諗住第七節做好佢交左先，咁就唔洗留堂，點知先記起自己本簿根本唔見左，想做都冇得做∼！！！戈時我真係唔知點好，於是落課之後走去同黃老師講我唔留低，黃老師當然唔想我咁樣走左去架啦，但係我真係唔可以唔返去架嘛，我又唔知點開口，戈時真係好想喊架，但係一直死忍住，最後黃老師都比我走，叫我星期一交返ｄ作業，於是我即刻”汁”好ｄ野諗住落去搵梁ｓｉｒ。

入到去梁ｓｉｒ佢地戈個室，梁ｓｉｒ問我點，我咪話我唔想參加美術比賽囉，其實係戈時我真係好想好想喊，因為返學咁耐，功課上、學習上、仲有補習、數培、義工組等等等等所有野都攪到我好忙好大壓力，而且我畫水彩畫根本又唔好，梁ｓｉｒ又係都要我參加美術比賽，咪等於叫我出羞！！仲有近日阿哥既走，爸爸媽咪上左大陸，攪到我連有通知都比唔到佢地簽名，甚至我隻鞋爛左我都未買到，每一日都淨係得我一個係屋企，對住部電腦唔開歌既話，成間屋真係一ｄ聲都冇，各種壓力，各種恐懼，真係攪到我好辛苦，我一直唔敢喊，想搵人傾訴下，又唔知點開口，當時對住梁ｓｉｒ，佢不斷問我”做咩唔參加呀”，”都唔會有咩咁忙姐下話”，我戈時忍喊真係忍得好辛苦，我又唔知點開口同佢講我有幾辛苦，結果最後，我都係忍唔住，喊左出黎，當時係我返左學咁耐，第一次喊．．．．．．我一路喊，一路想答佢問我戈ｄ問題，但係戈時我根本係喊到開唔到聲，佢係咁問我野，我根本答唔到佢，心入邊有好多話，好多苦想講出黎，但係又講唔到，戈種感覺真係好難受，後來我慢慢可以講到野，但係都唔知點同佢講，雖然最後梁ｓｉｒ都比我唔參加美術比賽，但係當我喊住咁返出去既時候，阿菁阿枝問我點，我都答唔到佢地，因為我一諗起依排發生既事同各種各樣既壓力，我就好想喊，但係我實在唔想令大家擔心，結果一路死忍住，真係好辛苦、好辛苦．．．．．．

我一直好想自己可以輕輕鬆鬆咁面對一切，咩壓力咩痛苦都唔當係一回事，但係．．．我實在做唔到．．．．．．

或者我的而且確係”晴天娃娃”－－總係對人歡笑，背人垂淚．．．．．．

今日唔知做咩我ｄ野接二連三既唔見呀∼！！！

首先係數培筆記簿（身為副班長冇筆記簿．．．＝．＝），唔知做咩中午上完數培就唔見左，搵到我就黎死都唔知去左邊，都唔知係咪漏左係多媒體室．．．．．．今日第七節係輔導堂，原本以為可以有時間做下功課，但係數培簿又冇，想做數培功課都唔得。想寫隨筆既初稿，點知連膠擦都唔見埋！！想拎本之前既暑期作業既簿出黎補做返之前唔識戈ｄ題，點知本簿又唔見左！！！！！

想做咩就唔見咩，戈時真係激死我啦！！！攪到心情超差，不過之後好快就冇咩事，反正我點激氣，ｄ野都唔會自己返黎架啦，唯有聽日再搵下啦．．．．．．唉．．．．．．

跟住我返到屋企，上左一陣網，諗住睇睇ｄ野先去表弟度同佢補習，點知戈個波波居然話係車度一直見到我∼！！但係我根本唔知，更加唔知邊個係佢，戈時感覺好奇怪．．．好似比人監視住我又唔知咁．．．．．．＝ｏ＝之後我同表弟補完習返黎，沖完涼又攪掂曬ｄ野之後又上網，點知係ｉｃｑ見到一個好耐冇見佢上，係ｉｃｑ識既ｆｄ，唔知做咩同佢傾傾下無端端我地兩個變左古代人，佢叫”手指兄”，我就係．．．”杜甫”．．．．．．^^||之後我地狂用ｄ文就就既語黎講野，又講甚麼西洋玩意，差ｄ笑死我．．．．．．^o^

突然間記起聽日係星期五，即係梁ｓｉｒ過黎分校既日子．．．．．．我聽日一定要決絕ｄ同佢講我唔參加美術比賽∼！！！！